പ്രമേഹമുണ്ടോ ? പല്ല് സൂക്ഷിക്കണം

ദിവസം ചെല്ലുന്തോറും പ്രമേഹരോഗികളുടെ എണ്ണം വര്‍ധിച്ചുവരികയാണ്. ജീവിതശൈലിയില്‍ വന്ന മാറ്റങ്ങള്‍ തന്നെയാണ് ഇതിന് പ്രധാന കാരണം. പാരമ്പര്യവും ഒരു ഘടകമാണ്. പ്രമേഹവും മോണരോഗവും തമ്മില്‍ അഭേദ്യമായ ബന്ധമുണ്ട്. മാത്രമല്ല, പ്രമേഹ രോഗികളില്‍ വായിലും പല്ലുകളിലും ചില വ്യതിയാനങ്ങള്‍ സംഭവിക്കാറുമുണ്ട്.

മറ്റെല്ലാ അവയവങ്ങളുടെയും സംരക്ഷണം പോലെ തന്നെ പ്രമേഹരോഗികള്‍ ദന്തസംരക്ഷണത്തില്‍ അതീവ ശ്രദ്ധ പുലര്‍ത്തേണ്ടതുണ്ട്. പ്രമേഹ രോഗികളില്‍ പലതരത്തിലുള്ള ദന്തരോഗങ്ങള്‍ കാണപ്പെടുന്നുണ്ട്. നേരത്തേ കണ്ടെത്തി ശ്രദ്ധയും പരിചരണവും നല്‍കിയാല്‍ പല്ലിന്റെയും മോണയുടെയും ആരോഗ്യപ്രശ്‌നങ്ങള്‍ ഒരുപരിധിവരെ തടയാനാകും.

മോണരോഗവും പ്രമേഹവും തമ്മില്‍ ബന്ധമുണ്ട്. മോണരോഗമുള്ളവരില്‍ രക്തത്തിലെ പഞ്ചസാരയുടെ അളവ് നിയന്ത്രിച്ച് നിര്‍ത്താന്‍ ബുദ്ധിമുട്ടാണ്. അനിയന്ത്രിതമായ പ്രമേഹമുള്ളവരില്‍ മോണരോഗത്തിന്റെ സാധ്യത മൂന്നു മുതല്‍ നാലു മടങ്ങ് വര്‍ധിക്കുന്നു.

പ്രമേഹത്തിന്റെ ദൂഷ്യഫലങ്ങളില്‍ ആറാമത്തേതില്‍ മോണ രോഗവും ഉള്‍പ്പെടുത്തിയിട്ടുണ്ട്. 2018-ലെ അന്താരാഷ്ട്ര പ്രമേഹ ചികിത്സാ മാര്‍ഗ നിര്‍ദേശങ്ങളില്‍ പ്രമേഹ രോഗിയുടെ പല്ലിന്റെയും മോണയുടെയും പരിശോധനകൂടി പ്രാരംഭ പരിശോധനകളില്‍ നടത്തണമെന്ന് അനുശാസിക്കുന്നുണ്ട്.

സാധാരണയായി ഉമിനീരിന്റെ പ്രവര്‍ത്തനമാണ് ദന്തക്ഷയം തടയുന്നതില്‍ പ്രധാന പങ്ക് വഹിക്കുന്നത്. എന്നാല്‍ പ്രമേഹരോഗികളില്‍ വായിലെ ഉമിനീരിന്റെ അളവ് കുറഞ്ഞ് ചെറിയ വരള്‍ച്ച അനുഭവപ്പെടാറുണ്ട്.

അതിനാല്‍ പ്രമേഹരോഗികളില്‍ ഭക്ഷണാവശിഷ്ടങ്ങള്‍ യഥാസമയം പൂര്‍ണമായും നീക്കപ്പെടാതെ അണുക്കളുടെ രാസപ്രവര്‍ത്തനം ത്വരിതപ്പെട്ട് അമ്ലസ്വഭാവം കൈവരികയും ഒടുവില്‍ തീവ്രമായ തോതില്‍ ദന്തക്ഷയം ഉണ്ടാകാനും കാരണമാവുന്നു.

ഇതുകൂടാതെ നാവിനും കവിളിനും എരിച്ചിലും പുകച്ചിലും ഇടയ്ക്കിടെ അനുഭവപ്പെടുന്നു. നാവിലെ രസമുകുളങ്ങളുടെ പ്രവര്‍ത്തനത്തെയും ബാധിക്കുന്നതിന്റെ ഫലമായി രുചിക്ക് വ്യത്യാസവും അനുഭവപ്പെടുന്നു.

പല്ലുകള്‍ നഷ്ടപ്പെടുന്ന പ്രമേഹരോഗി കൃത്രിമ ദന്തങ്ങള്‍ വയ്ക്കുമ്പോഴും അസ്വസ്ഥതകള്‍ ഉണ്ടാകാറുണ്ട്. സാധാരണയില്‍ നിന്നും വ്യത്യസ്തമായി വളരെ വേഗത്തില്‍ അസ്ഥി തേഞ്ഞു പോകുകയും അതിന്റെ ഫലമായി വായിലെ അണയുടെ നീളവും വീതിയും ഇടയ്ക്കിടെ മാറാനും കാരണമാവുന്നു. അതുകാരണം ഒരു വര്‍ഷം മുമ്പ് ഉണ്ടായിരുന്ന അളവില്‍ നിര്‍മ്മിച്ച വയ്പ്പുപല്ലുകള്‍ ഉറപ്പില്ലാതാവുകയും ചവയ്ക്കുന്ന സമയത്തോ അല്ലാതെയോ ഊരി വരികയും ചെയ്യും. അതിനാല്‍ പ്രമേഹ രോഗികള്‍ക്ക് വയ്പ്പുപല്ലുകള്‍ ഇടയ്ക്കിടെ മാറ്റേണ്ടി വരാറുണ്ട്.

പ്രമേഹരോഗികളില്‍ രാസപ്രവര്‍ത്തനം മൂലം സാധാരണയില്‍ നിന്നും ഉയര്‍ന്ന തോതില്‍ കീറ്റോണ്‍ സംയുക്തങ്ങള്‍ ഉല്‍പാദിപ്പിക്കപ്പെടുന്നു. ഇവയുടെ ഗന്ധം രോഗിയുടെ ശ്വാസത്തിലും കലരാറുണ്ട്. വായ്‌നാറ്റത്തിന് കാരണമാവുന്ന അസ്ഥിര നൈസര്‍ഗിക സംയുക്തങ്ങള്‍ ഇവിടെ അളവില്‍ കൂടുതല്‍ ഉണ്ടാവുന്നു. പല്ലില്‍ അടിഞ്ഞിരിക്കുന്ന അഴുക്ക് അഥവാ കക്ക കൂടിയാവുമ്പോള്‍ ഈ പ്രവര്‍ത്തനം ത്വരിതപ്പെടുന്നു.

സാധാരണക്കാരെ അപേക്ഷിച്ച് പ്രമേഹരോഗികളില്‍ മോണയിലെ പഴുപ്പ് അടിക്കടി കാണപ്പെടാറുണ്ട്. മോണരോഗത്തിന്റെ പ്രാരംഭചികിത്സയായ പല്ല് വൃത്തിയാക്കുക എന്നതിനോടൊപ്പം പ്രമേഹം കൂടി നിയന്ത്രിച്ചുനിര്‍ത്തി ആവശ്യമായ ആന്റി ബയോട്ടിക് മരുന്നുകളും കഴിക്കേണ്ടത് അത്യാവശ്യമാണ്.

ശരീരത്തിലെ മറ്റേത് ഭാഗങ്ങളിലെയും പോലെ തന്നെ വായിലെയും ശസ്ത്രക്രിയയ്ക്ക് ശേഷമോ അല്ലെങ്കില്‍ പല്ല് എടുത്തതിന് ശേഷമോ മുറിവുണങ്ങാന്‍ കാലതാമസം നേരിടേണ്ടി വരുന്നതും പ്രമേഹരോഗികളില്‍ കാണുന്ന മറ്റൊരു പ്രശ്‌നമാണ്. ചില രോഗികളുടെ വായില്‍ കാണപ്പെടുന്ന ത്വക്ക് രോഗങ്ങളിലൊന്നായ ഓറല്‍ ലൈക്കന്‍ പ്ലാനസ് എന്ന അസുഖവും വര്‍ദ്ധിച്ച തോതില്‍ കണ്ടുവരാറുണ്ട്.

രാവിലെയും വൈകിട്ടും മൂന്നു മുതല്‍ അഞ്ച് മിനിട്ട് മൃദുലമായ നാരുകളുള്ള ബ്രഷ് കൊണ്ട് പല്ല് വൃത്തിയാക്കുക. പല്ലിനിടയില്‍ കയറുന്ന ഭക്ഷണാവശിഷ്ടങ്ങള്‍ എടുത്തു കളയാനായി ദന്തല്‍ ഫ്‌ലോസ് എന്ന നൂല് അല്ലെങ്കില്‍ ഇന്റര്‍ദന്തല്‍ ബ്രഷ് ഉപയോഗിക്കുക. പല്ലുകള്‍ക്കിടയിലെ അകലം നിര്‍ണയിച്ചതിന് ശേഷം ഇതില്‍ ഏതാണ് അഭികാമ്യമെന്ന് ഡോക്ടര്‍ നിര്‍ദേശിക്കും.

1. പല്ലില്‍ പറ്റിപ്പിടിക്കുന്ന കക്ക അഥവാ കാല്‍ക്കുലസ് യഥാസമയം നീക്കം ചെയ്യുക. ആറുമാസത്തിലൊരിക്കല്‍ ദന്തവിദഗ്ധനെ കണ്ട് അള്‍ട്രാസോണിക് ഉപകരണം കൊണ്ടുള്ള ക്ലീനിംഗ് അഥവാ സ്‌കെയിലിംഗ് ചെയ്യുക.

2. മധുരപദാര്‍ഥങ്ങള്‍ കഴിവതും ഒഴിവാക്കുക. പല്ലില്‍ ഒട്ടിപ്പിടിക്കുന്ന തരത്തിലുള്ള മിഠായികള്‍, ക്രീം ബിസ്‌ക്കറ്റുകള്‍, വറ്റലുകള്‍, കേക്കുകള്‍ തുടങ്ങിയവ കഴിച്ചതിന് ശേഷം ഉടന്‍ തന്നെ വായ നന്നായി കഴുകി വൃത്തിയാക്കുക.

3. മോണയില്‍ അമിതമായി ചുവപ്പു നിറം കാണുക, രക്തസ്രാവം മോണയില്‍ നിന്നുമുണ്ടാവുക. ഇത്തരം ലക്ഷണങ്ങള്‍ അവഗണിക്കാതെ തുടക്കത്തിലേ ചികിത്സ തേടുക.

4. മോണയിലെ രക്തചംക്രമണം കൂട്ടാന്‍ മോണ തിരുമ്മുന്നത് നല്ലതാണ്. വൃത്തിയുള്ള വിരലുകളോ ഇതിനായുള്ള ആയുര്‍വേദ മരുന്നുകളോ ഉപയോഗിക്കാവുന്നതാണ്.

5. കൂര്‍ത്ത പല്ലുകളോ വയ്പു പല്ലുകളോ വായില്‍ മുറിവുണ്ടാക്കുന്നുണ്ടെങ്കില്‍ യഥാസമയം ചികിത്സ തേടുക.

6. വയ്പു പല്ലുകള്‍ക്ക് ചലനം സംഭവിച്ച് അവയുടെ പിടുത്തം നഷ്ടപ്പെടുമ്പോള്‍ തന്നെ ഡോക്ടറെ കണ്ട് അതിനുള്ള പരിഹാരം തേടുക.

7. പ്രമേഹനിയന്ത്രണത്തിനും വായിലെ മറ്റു കാരണങ്ങളും നീക്കം ചെയ്തിട്ടും വായ്‌നാറ്റം തുടരുന്നുവെങ്കില്‍ മറ്റ് കാരണങ്ങളായ ഗ്യാസ്ട്രബിള്‍, സൈനസൈറ്റിസ്, ശ്വാസകോശസംബന്ധമായ രോഗങ്ങള്‍, കരള്‍ രോഗങ്ങള്‍, വൃക്കരോഗങ്ങള്‍ എന്നിവയാണോ എന്ന് നിര്‍ണയിച്ച് ചികിത്സ തേടുക.

8. പ്രമേഹത്തിന് ഡോക്ടര്‍ നിര്‍ദേശിച്ചിട്ടുള്ള മരുന്നുകളും ഇന്‍സുലിന്‍ കുത്തിവയ്പ്പും മുടങ്ങാതെ സ്ഥിരമായി എടുക്കുക.

9. വീട്ടില്‍ ഗ്ലൂക്കോമീറ്റര്‍ വാങ്ങി ദിവസവുമുള്ള രക്തത്തിലെ പഞ്ചസാരയുടെ അളവ് പരിശോധിക്കുക. വ്യതിയാനം ഉണ്ടെങ്കില്‍ ഡോക്ടറുടെ ശ്രദ്ധയില്‍പ്പെടുത്തുക.

10. ദന്തരോഗത്തിന്റെ ഒരു ലക്ഷണവും തോന്നിയില്ലെങ്കില്‍ കൂടി പ്രമേഹ രോഗികള്‍ മൂന്നു മാസത്തില്‍ അല്ലെങ്കില്‍ കുറഞ്ഞത് ആറുമാസത്തിലൊരിക്കലോ ദന്തരോഗവിദഗ്ധനെ കണ്ട് വായ പരിശോധിക്കേണ്ടതാണ്.

11. മാസത്തില്‍ ഒരിക്കലെങ്കിലും രക്തത്തിലെ പഞ്ചസാരയുടെ സുവര്‍ണ അളവുകോലായ ണ്ണ്വക്കക്ക്യ അഥവാ ഗ്ലൈക്കോസി ലേറ്റഡ് ഹീമോഗ്ലോബിന്‍ പരിശോധിക്കുക. സാധാരണ മറ്റു ദിവസങ്ങളില്‍ ലഭിക്കുന്ന ഫാസ്റ്റിംഗ് അല്ലെങ്കില്‍ ഗ്ഗഗ്ഗങ്ങങ്ങ അളവുകളേക്കാള്‍ ഏതാണ്ട് മൂന്നു മാസത്തെ പ്രമേഹ നിയന്ത്രണത്തെക്കുറിച്ച് അറിവ് നല്‍കാന്‍ ഈ പരിശോധന സഹായിക്കും.ഇത്തരം കാര്യങ്ങള്‍ അതീവ ജാഗ്രതയോടെ പാലിച്ചാല്‍ പ്രമേഹരോഗികള്‍ക്ക് ലളിതമായി ചെയ്യാന്‍ കഴിയുന്ന ഒന്നാണ് ദന്തസംരക്ഷണം. പുഞ്ചിരിയോടെ വെറും പുഞ്ചിരിയല്ല ആരോഗ്യ കരമായ പുഞ്ചിരിയോടെ പ്രമേഹത്തോടൊപ്പം ജീവിക്കാം മുന്നേറാം.