നെടുങ്കണ്ടം: ടയര് മാറ്റ വിവാദത്തിനിടെ ടയര് കട ഉദ്ഘാടനം ചെയ്ത് മന്ത്രി എം.എം മണി. വാഹന യാത്രികര്ക്ക് സഹായകരമായി ടയര് കടകള് സംസ്ഥാനത്ത് ഉടനീളം പൊട്ടി മുളയ്ക്കട്ടെയെന്നാണ് ട്രോളന്മാരെ മുന്നില്ക്കണ്ടുകൊള്ളുള്ള മന്ത്രിയുടെ ആശംസ. തന്റെ വാഹനത്തിന്റെ ടയറുകള് മാറ്റിയത് ചിലര് ബോധപൂര്വ്വം വിവാദമാക്കിയതാണെന്നും മന്ത്രി പറഞ്ഞു. വാഹനത്തിന്റെ 34 ടയറുകള് മാറ്റിയ മന്ത്രിയെന്ന വിമര്ശനം കേള്ക്കുന്നതിനിടെയാണ് എം.എം മണി കല്ലാറില് ടയര് കട ഉദ്ഘാടനത്തിന് എത്തിയത്.
മണിയാശാന്റെ വാഹനം തന്നെ ആദ്യ അലൈമെന്റ് പരിശോധന നടത്തണമെന്ന സ്ഥാപന ഉടമയുടെ ആവശ്യത്തിനു മന്ത്രി നൊ പറഞ്ഞില്ല. 34 ടയര് മാറ്റി വിവാദത്തിലായ ഏഴാം നമ്പര് സ്റ്റേറ്റ് കാര് തന്നെയായിരുന്നു പുതിയ കടയിലെ ആദ്യ അതിഥി. കാറിനു ചെറിയ കുഴപ്പങ്ങളുണ്ടെന്നും അത് പരിഹരിച്ചെന്നും വര്ക്ക്ഷോപ്പ് ജീവനക്കാര് മന്ത്രിയെ അറിയിച്ചു.
മറ്റു മന്ത്രിമാര് സഞ്ചരിക്കുന്നതിനേക്കാള് കൂടുതല് ദൂരം തന്റെ വാഹനമോടുന്നുണ്ട്. അപ്പോള് ടയറിന്റെ തേയ്മാനും സ്വാഭാവികമാണെന്നുമാണ് എം.എം മണിയുടെ വാദം. രണ്ടു മാസം മുന്പ് തിരുവനന്തപുരത്ത് വച്ച് വണ്ടിയുടെ ടയര് നട്ടുകള് ഒടിഞ്ഞ് തൂങ്ങിയെന്നും രണ്ട് തവണയും അപകടത്തില് നിന്ന് രക്ഷപ്പെട്ട് തലനാരിഴയ്ക്കാണെന്നും മന്ത്രി പറഞ്ഞു.
