നടനും മിമിക്രി കലാകാരനുമായിരുന്ന കലാഭവന് അബി അന്തരിച്ചിട്ട് ഇന്ന് രണ്ടാം വാര്ഷികമാണ്. രക്ത സംബന്ധമായ അസുഖം മൂലം 2017 നവംബര് 30ന് കൊച്ചിയിലെ സ്വകാര്യ ആശുപത്രിയില് വെച്ചായിരുന്നു അബി മരിക്കുന്നത്. 1990കളിലെ മിമിക്രി ലോകത്ത് സൂപ്പര് താരമായിരുന്നു അബി. ആമിനത്താത്ത എന്ന അബി അവതരിപ്പിച്ചിരുന്ന കഥാപാത്രം പ്രേക്ഷകര് ഒരിക്കലും മറക്കാതെ ഹൃദയത്തില് സൂക്ഷിച്ചിക്കുന്നതാണ്.
അതേസമയം വാപ്പച്ചിയുടെ ഓര്മ്മദിനം പങ്കുവെച്ച് മകന് ഷെയ്ന് നിഗം സോഷ്യല്മീഡിയയില് കുറിപ്പ് പങ്കുവെച്ചിട്ടുണ്ട്. ഇന്ന് വാപ്പിച്ചിയുടെ ഓര്മ്മദിനമാണെന്നും നിങ്ങളുടെ പ്രാര്ത്ഥനകളില് ഉള്പ്പെടുത്തണമെന്നുമാണ് ഷെയ്ന്റെ കുറിപ്പ്. മകനെ മികച്ച ഒരു നടന് ആക്കണമെന്നത് അബിയുടെ എക്കാലത്തേയും ആഗ്രഹമായിരുന്നു. എന്നാല് ഷെയ്ന് മികച്ച കഥാപാത്രങ്ങളെ അവതരിപ്പിച്ച് മലയാള സിനിമയില് വലിയ താരമായി വളരുന്നത് കാണാന് അബിയുണ്ടായില്ല. സുനിലയാണ് അബിയുടെ ഭാര്യ, ഷെയിനെ കൂടാതെ അഹാന, അലീന എന്നിങ്ങനെ രണ്ട് മക്കള് കൂടി അബിയ്ക്കുണ്ട്.
അബി തന്റെ കലാ ജീവിതം ആരംഭിക്കുന്നത് കൊച്ചിന് കലാഭവനിലൂടെയാണ്. വേദികളില് സിനിമ താരങ്ങളെ അനുകരിച്ച് അബി കൈയ്യടി നേടി. ദിലീപ്, നാദിര്ഷ, ഹരിശ്രീ അശോകന് എന്നിവര്ക്കൊപ്പം മിമിക്രി വേദികളില് തിളങ്ങി നിന്ന താരമായിരുന്നു അബി. മമ്മൂട്ടിയുടെയും അമിതാഭ് ബച്ചന്റെയും ശബ്ദം അനുകരിച്ചാണ് അബി കൂടുതല് ശ്രദ്ധ നേടിയത്.
നിരവധി സിനിമകളിലും അബി വേഷമിട്ടിട്ടുണ്ട്. ആദ്യമായി അഭിനയിച്ചത് മമ്മൂട്ടി നായകനായ നയം വ്യക്തമാക്കുന്നു എന്ന ചിത്രത്തിലാണ്. പിന്നീട് രസികന്, വാര്ധക്യ പുരാണം, എല്ലാവരും ചൊല്ലണ്, ചെപ്പു കിലുക്കണ ചങ്ങാതി, സൈന്യം, മഴവില് കൂടാരം, ആനപ്പാറ അച്ചാമ്മ, പോര്ട്ടര്, കിരീടിമില്ലാത്ത രാജാക്കന്മാര്, ഭീഷ്മാചാര്യ ഇങ്ങനെ നിരവധി ചിത്രങ്ങളില് താരം അഭിനയിച്ചു.
