തിരുവനന്തപുരം: ടി.പി. ചന്ദ്രശേഖരന് അനുസ്മരണ പരിപാടിയില് പങ്കെടുക്കുന്നതിന് സിപിഎം വിലക്കിയിട്ടില്ലെന്ന് സിപിഐ സംസ്ഥാന സെക്രട്ടറി കാനം രാജേന്ദ്രന്. ടിപി അനുസ്മരണ പരിപാടിയില് പങ്കെടുക്കുന്നതിന് സിപിഐ ഉള്പ്പെടെയുള്ള ഘടകകക്ഷികളെ സിപിഎം വിലക്കിയെന്ന ആര്എംപിയുടെ വാദങ്ങള് കാനം തള്ളി. നേരത്തെ നിശ്ചയിച്ചിരുന്ന പരിപാടികള് ഉള്ളതിനാലാണ് ആര്എംപിയുടെ ക്ഷണം നിരസിക്കേണ്ടി വന്നതെന്നും കാനം കൂട്ടിച്ചേര്ത്തു.
അനുസ്മരണ ചടങ്ങില് നിന്ന് സിപിഎം ആവശ്യപ്പെട്ടതിനാല് പിന്മാറുന്നുവെന്ന് കാനം പറഞ്ഞതായി ആര്എംപി സംസ്ഥാന സെക്രട്ടറി എന്.വേണുവാണ് വെളിപ്പെടുത്തിയത്. പരിപാടിയില് പങ്കെടുക്കരുതെന്ന് സിപിഎം ആവശ്യപ്പെട്ടതായി താന് പറഞ്ഞിട്ടില്ലെന്നും, പരാമര്ശം അടിസ്ഥാനരഹിതമാണെന്നും കാനം വ്യക്തമാക്കി.
ജനുവരി രണ്ടിന് ഓര്ക്കാട്ടേരിയില് നടക്കുന്ന അനുസ്മരണ പരിപാടി മുന് മുഖ്യമന്ത്രി ഉമ്മന് ചാണ്ടിയാണ് ഉദ്ഘാടനം ചെയ്യുന്നത്. മൂന്നു നിലകളിലായി പൂര്ത്തിയാക്കിയ ടിപി ഭവന് എന്ന് പേരിട്ടിരിക്കുന്ന് സ്മാരകത്തിന്റെ ഉദ്ഘാടനം ആര്എംപി അഖിലേന്ത്യാ ജനറല് സെക്രട്ടറി മാംഗത്റാം പസ്ല നിര്വഹിക്കും.
