നാടകത്തില്‍ പോയാല്‍ പെണ്ണ് പിഴച്ച് പോവുമെന്ന് പറഞ്ഞ് അമ്മ കിണറ്റില്‍ ചാടാന്‍ പോയി; അഭിനയത്തിന്റെ അരനൂറ്റാണ്ടു തികച്ച് കവിയൂര്‍ പൊന്നമ്മ

കവിയൂര്‍ പൊന്നമ്മ സിനിമയിലെത്തിയിട്ട് അരനൂറ്റാണ്ട് പിന്നിട്ടിരിക്കുന്നു. കൃത്യമായി പറഞ്ഞാല്‍ അമ്പത്തിനാല് വര്‍ഷം .അമ്പത്തിനാല് വര്‍ഷത്തിനിടയില്‍ കവിയൂര്‍ പൊന്നമ്മ അഭിനയിച്ചത് എണ്ണൂറിലധികം സിനിമകളില്‍ ..!

ഇപ്പോള്‍ കവിയൂര്‍ പൊന്നമ്മയ്ക്ക് എഴുപത്തിയെട്ട് വയസ്സായി. പ്രായം കൂടുംതോറും കവിയൂര്‍ പൊന്നമ്മയുടെ മനസ്സിന് യുവത്വത്തിന്റെ പ്രസരിപ്പാണ്.

മലയാളത്തിലെ പഴയ തലമുറയിലെയും പുതിയ തലമുറയിലെയും താരങ്ങളുടെ അമ്മയായി നിറഞ്ഞാടിയ കവിയൂര്‍ പൊന്നമ്മ സിനിമാ മംഗളത്തോട് സംസാരിക്കുന്നു.

സത്യം പറഞ്ഞാല്‍ സിനിമാ മംഗളവുമായി സംസാരിക്കാനിരിക്കുമ്പോഴാണ് ഞാന്‍ സിനിമയിലെത്തിയിട്ട് അമ്പത്തിനാല് വര്‍ഷം പിന്നിട്ടുവെന്നറിയുന്നത്. കടന്നുവന്ന വഴികളിലേക്ക് തിരിഞ്ഞു നോക്കുമ്പോള്‍ എല്ലാം ഇന്നലെ കഴിഞ്ഞ പോലെ തോന്നുന്നു.

കാലം എത്ര വേഗമാണ് മുന്നോട്ട് പോവുന്നത്. സിനിമാ താരമെന്ന നിലയില്‍ എനിക്ക് എന്തെന്നില്ലാത്ത അഭിമാനവും ആഹ്‌ളാദവുമുണ്ട്.

ഇപ്പോഴും ക്യാമറയുടെ മുന്നില്‍ കഥാപാത്രമായി അഭിനയിക്കാന്‍ കഴിയുന്നത് തന്നെ ദൈവാനുഗ്രഹമെന്നല്ലാതെ എന്ത് പറയാന്‍ ഇന്നലെകളിലേക്ക് തിരിഞ്ഞു നോക്കുമ്പോള്‍ മനസ്സ് നിറയെ സംതൃപ്തിയാണുള്ളത്.

കുടുംബത്തിന് കലാപരമായ പശ്ചാത്തലമൊന്നും ഇല്ലായിരുന്നു. ഞാന്‍ പാട്ട് പാടുമായിരുന്നു. അച്ഛനും അമ്മയ്ക്കും ഞാന്‍ പാട്ട് പാടുന്നത് കേള്‍ക്കാന്‍ ഇഷ്ടമായിരുന്നു. അതുകൊണ്ട് തന്നെ ഏഴാമത്തെ വയസ്സില്‍ എന്നെ സംഗീതം പഠിപ്പിക്കാന്‍ വിട്ടു. പ്രശസ്ത സംഗീതജ്ഞനായിരുന്ന എല്‍.പി.ആര്‍. വര്‍മ്മയാണ് ഗുരു. വര്‍മ്മ സാറിന്റെ കീഴില്‍ പാട്ട് പഠിക്കാന്‍ തുടങ്ങിയതോടെ സ്‌കൂള്‍ കലോത്സവങ്ങളിലെല്ലാം എനിക്ക് സമ്മാനം ലഭിക്കാന്‍ തുടങ്ങി.

ചെറിയ പ്രായത്തില്‍ തന്നെ വലിയ സംഗീതജ്ഞരെ ഞാന്‍ ആരാധിച്ചു തുടങ്ങിയിരുന്നു. എം.എല്‍.വസന്തകുമാരി, ഡി.കെ. പട്ടമ്മാള്‍, എം.എസ്.സുബ്ബലക്ഷ്മി ഉള്‍പ്പടെയുള്ളവരുടെ കച്ചേരി കേള്‍ക്കാന്‍ എനിക്ക് ഭാഗ്യമുണ്ടായിട്ടുണ്ട്.

ഒരിക്കല്‍ കച്ചേരി നടക്കുന്നതിനിടയില്‍ കെ.പി.കേശവമേനോന്‍ എന്നെ മടിയില്‍ പിടിച്ചിരുത്തി എന്റെ തലയില്‍ കൈവച്ച് നീ നന്നായി വരു മെന്ന് അനുഗ്രഹിച്ചത് മറക്കാനാവാത്ത അനുഭവമാണ്.

അക്കാലത്ത് നാടകത്തില്‍ പാട്ട് പാടാന്‍ ഒരു കുട്ടിയെ വേണമായിരുന്നു. ഞാന്‍ നന്നായി പാട്ടു പാടുമെന്നറിഞ്ഞ് സംഗീത സംവിധായകന്‍ ദേവരാജന്‍ മാഷ് എന്റെ വീട്ടില്‍ വന്നു. അദ്ദേഹം ഒരു കീര്‍ത്തനം പാടാന്‍ എന്നോട് ആവശ്യപ്പെട്ടു.

നന്നായി പാടിയെന്ന് പറഞ്ഞ് ദേവരാജന്‍ മാഷ് പോയി. കുറേ ദിവസം കഴിഞ്ഞപ്പോള്‍ നാടകത്തില്‍ പാട്ട് പാടാന്‍ എന്നെ തെരഞ്ഞെടുത്ത വിവരം അറിഞ്ഞു.

അച്ഛന് സന്തോഷമായി. നാടകത്തില്‍ പോയാല്‍ പെണ്ണ് പിഴച്ച് പോവുമെന്ന് പറഞ്ഞ് അമ്മ കിണറ്റില്‍ ചാടാന്‍ പോയി. റിഹേഴ്‌സല്‍ മൂന്ന് മാസമായിരുന്നു. മൂലധനമെന്ന നാടകമായിരുന്നു അത്.

നാടകത്തില്‍ പാടുക മാത്രമല്ല നന്നായി അഭിനയിക്കണമെന്ന് സംവിധായകന്‍ തോപ്പില്‍ ഭാസി ചേട്ടന്‍ പറഞ്ഞപ്പോള്‍ എന്തെന്നില്ലാത്ത സന്തോഷം തോന്നി. അതോടൊപ്പം അഭിനയിക്കാന്‍ അറിയുമോ എന്ന പേടിയും എന്റെ മനസ്സിലുണ്ടായി.

പക്ഷേ എന്റെ അഭിനയം നന്നായിട്ടുണ്ടെന്ന് നാടകം കണ്ടവര്‍ പറഞ്ഞപ്പോള്‍ സന്തോഷം തോന്നി. ഇതിനിടയിലാണ് എന്റെ ഗുരുനാഥനായ പി.ആര്‍. വര്‍മ്മ സംഗീതം നല്‍കുന്ന ഒരു ചിത്രത്തില്‍ പാട്ട് പാടാന്‍ എനിക്ക് അവസരം ലഭിച്ചത്. അച്ഛന്റെ കൂടെ ഞാന്‍ മദിരാശിയിലേക്ക് പോയി. എന്നെ കണ്ടപ്പോള്‍ പാട്ടുപാടുക മാത്രമല്ല അഭിനയിക്കുകയും വേണമെന്ന് ചിത്രത്തിന്റെ സംവിധായകന്‍ ശശികുമാര്‍ പറഞ്ഞു. അങ്ങനെയാണ് ഞാന്‍ ആദ്യമായി കുടുംബിനി എന്ന ചിത്രത്തില്‍ അഭിനയിച്ചത്.

അത് സത്യമാണ്. 22-ാമത്തെ വയസ്സില്‍ ആണ് 'തൊമ്മന്റെ മക്കള്‍' എന്ന ചിത്രത്തില്‍ സത്യന്‍ സാറിന്റെയും മധു സാറിന്റെയും അമ്മയായി ഞാന്‍ അഭിനയിച്ചത്.

പുഷ്പാഞ്ജലി എന്ന ചിത്രത്തിലാണ് ഞാന്‍ പ്രേം നസീറിന്റെ അമ്മയായത്. മമ്മൂട്ടി, മോഹന്‍ലാല്‍ ഉള്‍പ്പടെ മലയാളത്തിലെ നിരവധി താരങ്ങളുടെ അമ്മയായി അഭിനയിക്കാനുള്ള അവസരം ലഭിച്ചതില്‍ അതിയായ ചാരിതാര്‍ത്ഥ്യമുണ്ട്.

രണ്ടു പേരും പ്രതിഭാധനരായ അഭിനേതാക്കളല്ലേ.. മോഹന്‍ലാലിന്റെ അമ്മയായി ഒരുപാട് സിനിമകളില്‍ അഭിനയിച്ചിട്ടുണ്ട്. പ്രേക്ഷകര്‍ ഞങ്ങളെ കാണുന്നത് അമ്മയും മകനുമായിട്ടാണ്.മോഹന്‍ലാലിനെ ഞാന്‍ കുട്ടാ എന്നാണ് വിളിക്കുന്നത്.

കുറച്ച് മുമ്പ് ഒരു സപ്താഹത്തില്‍ പങ്കെടുക്കാന്‍ ഞാന്‍ പോവുകയായിരുന്നു. അവിടെ വച്ച് പ്രായം ചെന്ന അമ്മ ചോദിച്ചത് മകനെ കൊണ്ടുവരാമായിരുന്നില്ലേ എന്നാണ്. അവര്‍ ഉദ്ദേശിച്ചത് മോഹന്‍ലാലിനെയായിരുന്നു എന്ന് ചോദിച്ചപ്പോള്‍ മനസ്സിലായി. മമ്മൂസിനെ കാണുന്നവര്‍ വിചാരിക്കുന്നത് ഭയങ്കര ദേഷ്യക്കാരനാണെന്നാണ്. പക്ഷേ മമ്മൂസ് ഉള്ളിന്റെയുള്ളില്‍ വളരെ നല്ല മനുഷ്യനാണ്.

അതൊരു സത്യം തന്നെയാണ്. കാലത്തിന്റെ മാറ്റത്തില്‍ മക്കള്‍ക്ക് അച്ഛനമ്മമാരെ വേണ്ടതായിരിക്കുന്നു. എല്ലാവരും അവരവരിലേക്ക് ചുരുങ്ങുകയാണ്. ഒരു പരിധി വരെ സിനിമയെയും അത് ബാധിച്ചിരിക്കുന്നു. നമുക്ക് വേണമെന്ന് നിര്‍ബന്ധിക്കാന്‍ പറ്റില്ലല്ലോ

എല്ലാവരും വളരെയധികം പ്രതിഭയുള്ളവരാണ്. മാത്രമല്ല ഇപ്പോഴത്തെ ചെറുപ്പക്കാരായ സംവിധായകര്‍ സ്വന്തം അമ്മയെ പോലെയാണ് എന്നെ സ്‌നേഹിക്കുന്നത്. ആ സ്‌നേഹം തന്നെയാണ് എന്നെ പോലുള്ള മുതിര്‍ന്ന താരങ്ങളുടെ സൗഭാഗ്യമെന്ന് ഞാന്‍ കരുതുന്നു.

സംശയമെന്താ മഞ്ജു വാര്യര്‍ തന്നെ. ഓരോ സിനിമകളിലും അസാമാന്യമായ അഭിനയ പാടവം കാഴ്ച വെക്കാന്‍ മഞ്ജുവിന് കഴിയുന്നുവെന്നത് യാഥാര്‍ത്ഥ്യമാണ്. ഉദാഹരണം സുജാതയിലെ മഞ്ജുവിന്റെ അഭിനയം കണ്ട് ഞാന്‍ അത്ഭുതപ്പെട്ടു.

1971 മുതല്‍ 74 വരെ തുടര്‍ച്ചയായി മികച്ച സഹനടിക്കുള്ള സംസ്ഥാന സര്‍ക്കാരിന്റെ അവാര്‍ഡ് എനിക്കായിരുന്നു. മദ്രാസ് ഫിലിം ഫാന്‍സ് അസോസിയേഷന്റെ അവാര്‍ഡും എനിക്ക് ലഭിച്ചിരുന്നു.

ഞാന്‍ അഭിനയിച്ച എല്ലാ സിനിമകളിലെയും കഥാപാത്രങ്ങളെ എനിക്ക് ഇഷ്ടമാണ്. പ്രഭാതത്തിലെ നായികാ കഥാപാത്രത്തെ ഒരിക്കലും മറക്കാനാവില്ല. എങ്കിലും ഇന്നും മനസ്സില്‍ നിറഞ്ഞു നില്‍ക്കുന്നത് പ്രേക്ഷകര്‍ ഹൃദയത്തോട ചേര്‍ത്ത് നിര്‍ത്തിയ കിരീടം, തനിയാവര്‍ത്തനം, നന്ദനം തുടങ്ങിയ ചിത്രങ്ങളിലെ കഥാപാത്രങ്ങളെയാണ് ഞാന്‍ ഇഷ്ടപ്പെടുന്നത്.

സിനിമയില്‍ അഭിനയിക്കാന്‍ തുടങ്ങിയിട്ട് 54 വര്‍ഷം പിന്നിട്ടിരിക്കുന്നു. 800ലധികം സിനിമകളിലായി പുതിയ തലമുറയിലെയും പഴയ തലമുറയിലെയും ധാരാളം താരങ്ങള്‍ക്കൊപ്പം അഭിനയിക്കാനുള്ള ഭാഗ്യം എനിക്ക് ലഭിച്ചിട്ടുണ്ട്. അപ്പോഴും ഫഹദിന്റെ കൂടെ മാത്രം അഭിനയിച്ചിട്ടില്ല. ഫഹദിന്റെ ഒപ്പം അഭിനയിക്കണമെന്ന വല്ലാത്തൊരു മോഹം എന്റെ ഉള്ളിലുണ്ട്.

ഫഹദിന്റെ കണ്ണുകളിലാണ് അഭിനയം നിറയുന്നത്. സംവിധായകരും എഴുത്തുകാരും വിചാരിച്ചാല്‍ ഫഹദിന്റെ കൂടെ അഭിനയിക്കണമെന്ന എന്റെ മോഹം സഫലമാകുമെന്നാണ് ഞാന്‍ പ്രതീക്ഷിക്കുന്നത്. എനിക്ക് ഇപ്പോള്‍ 78 വയസ്സായി. കാര്യമായ അസുഖവുമില്ല.

ഞാനൊരു കൃഷ്ണ ഭക്തയാണ്. കൃഷ്ണനും ഞാനുമായി നല്ലൊരു ആത്മബന്ധമാണ്. അവസാന കാലത്ത് ആരെയും ബുദ്ധിമുട്ടിക്കാതെയും രോഗിയായി കിടക്കാതെയും കൊണ്ടുപോകണം ദൈവമേ... എന്നാണ് എന്റെ പ്രാര്‍ത്ഥന..

മാഗ്‌ന സാബു