കൊല്ലം : പൗരത്വ നിയമ ഭേദഗതി ഇസ്ളാമിക വിരുദ്ധത സൃഷ്ടിക്കുന്നെന്ന വിചാരം ശക്തമാകുന്നതിനിടയില് കൊച്ചുമകന് സ്കൂളില് നിന്നും നേരിടേണ്ടി വന്ന ഞെട്ടിക്കുന്ന അനുഭവം പങ്കു വെച്ച് ജസ്റ്റീസ് കമാല് പാഷ. രണ്ടാം ക്ളാസ്സുകാരനായ കൊച്ചുമകന്റെ ഡയറി നോക്കിയ സഹപാഠികള് നീ മുസ്ളീമാണല്ലേ എന്ന് ചോദിച്ച ശേഷം ഇക്കാര്യം ടീച്ചറിനോട് പറഞ്ഞുകൊടുക്കുമെന്ന് പറഞ്ഞതായി അദ്ദേഹം പറഞ്ഞു.
സ്കൂളിന്റെ പേര് വെളിപ്പെടുത്തുന്നില്ല എന്ന ആമുഖത്തോടെയാണ് അദ്ദേഹം ഇക്കാര്യം പറഞ്ഞത്. ജാതിയും മതവും വെച്ച് കുട്ടികളെ വേര്തിരിക്കുന്ന സംഭവം സ്കൂളുകളില് പോലും ഉണ്ടെന്ന് പറഞ്ഞു. ഇസ്ളാമായി ജീവിക്കുക എന്നത് എന്തോ കുഴപ്പമുള്ളതായുള്ള തോന്നല് കുട്ടികളില് പോലും ഉണ്ടാകുകയാണെന്ന് അദ്ദേഹം പറഞ്ഞു. കൊല്ലം പത്തനാപുരത്തെ ഒരു സ്കൂളിന്റെ വാര്ഷികാഘോഷം ഉദ്ഘാടനം ചെയ്യാനെത്തിയ വേളയിലാണ് അദ്ദേഹം പ്രസംഗത്തിലൂടെ ഇക്കാര്യം പറഞ്ഞത്.
കൊച്ചുമകന് നേരിട്ട സംഭവത്തില് സ്കൂളില് പരാതിപ്പെടുകയും അവനോട് ഈ രീതിയില് ഇടപെട്ട കുട്ടികളുടെ മാതാപിതാക്കളെ വിളിച്ച് ഇക്കാര്യത്തില് ഉപദേശം നല്കണമെന്നും പറഞ്ഞതായി കമാല്പാഷ വിശദീകരിച്ചു. കൊച്ചുകുട്ടികളെ കള്ളം പറയാന് പ്രേരിപ്പിക്കരുതെന്ന് പറയുന്ന നാം മതം കൊണ്ട് മനുഷ്യ മനസ്സുകളില് വേലി കെട്ടുകയാണെന്നും പറഞ്ഞു. വിദേശ രാജ്യങ്ങളില് റോഡില് നിന്നും പരസ്യമായി കെട്ടിപ്പിടിക്കുന്നതും ചുംബിക്കുന്നതും മദ്യപിക്കുന്നതുമെല്ലാം കടമെടുക്കുന്ന നാം പക്ഷേ അവരുടെ നല്ല ശീലങ്ങളുടെ ഒരു ഭാഗവും എടുക്കാറില്ലെന്നും പറഞ്ഞു.
