ബിഗ്ബോസിന്റെ ഭാഗമായി അപ്രതീക്ഷിത താരമായി മാറിക്കൊണ്ടിരിക്കുകയാണ് മത്സരാര്ത്ഥികളില് ഒരാളായ അലക്സാന്ദ്ര. തുടങ്ങുമ്പോള് അധികം പരിചിത മുഖമല്ലാതിരുന്ന താരം ദിവസങ്ങള് കൊണ്ടാണ് പ്രേക്ഷകരുടെ ഇഷ്ടം പിടിച്ചു വാങ്ങിയത്. ജീവിതത്തില് താന് നേരിട്ട കയ്പ്പേറിയ അനുഭവങ്ങള് കഴിഞ്ഞ ദിവസം പങ്കുവെച്ചു കൊണ്ട് സാന്ദ്ര കൂടുതല് പ്രിയങ്കരിയായി. തകര്ന്നുപോയ തന്റെ ഒരു പഴയ പ്രണയത്തെക്കുറിച്ചും ജീവിതത്തെ കയ്പ്പേറിയ അനുഭവങ്ങളെ കടന്ന് ഇന്നത്തെ നിലയില് എത്തിയതിനെ കുറിച്ച് കഴിഞ്ഞ ദിവസം താരം പങ്കുവെച്ചു.
ജീവിത യാത്രയില് ചെന്നൈയില് എത്തിയപ്പോഴായിരുന്നു ആദ്യ പ്രണയം ഉണ്ടാകുന്നത്. ആ ബന്ധത്തില് നൂറ് ശതമാനം ആത്മാര്ത്ഥതയും കാട്ടിയിരുന്നു. എന്നാല് താന് പ്രണയിച്ച ആള്ക്ക് വലിയ താല്പ്പര്യം ഇല്ലായിരുന്നു. കുറേ അഡ്ജസ്റ്റ് ചെയ്തു നോക്കി. തീരെ പൊരുത്തപ്പെടാന് പറ്റാതെ വന്നപ്പോള് ബ്രേക്കിനെ കുറിച്ച് ചിന്തിച്ചു. അയാളോട് അത് പറയുകയും ചെയ്തു.
ബ്രേക്കപ്പിന് ശേഷം അയാളെക്കുറിച്ച് കൂടുതല് അന്വേഷിച്ചപ്പോഴാണ് താനുമായി പ്രണയത്തിലായിരുന്നപ്പോഴും അയാള്ക്ക് മറ്റ് അനേകരുമായി ബന്ധം ഉണ്ടായിരുന്നു. അതൊക്കെ ഏറെ വൈകിയാണ് അറിഞ്ഞത്. ആദ്യമൊക്കെ വലിയ സങ്കടം ആയിരുന്നു. പിന്നെ അതില് നിന്നും താനെ മോചിതയായി. ഇപ്പോള് അത്തരം ദു:ഖങ്ങളൊന്നുമില്ല. പ്രണയകാലത്ത് അയാള് തല്ലിയിട്ടുണ്ട്. ഇപ്പോള് അതിനെല്ലാം ജീവിതം കൊണ്ടു മറുപടി പറയുകയാണ്. തോറ്റിട്ടില്ലെന്ന് താന് തെളിയിച്ചു കൊടുത്തു.
എല്ലാ ദു:ഖങ്ങളിലും എപ്പോഴും കൂടെ നിന്നത് അച്ഛനാണ്. കോഴിക്കോട്ടെ ഒരു ഉള്നാടന് ഗ്രാമത്തില് മലയാളം സ്കൂള് മാഷിന്റെ മകളായിട്ടാണ് ജനിച്ചത്. സാധാരണ രീതിയിലുള്ള സ്കൂള് വിദ്യാഭ്യാസത്തിനിടയില് സഹപാഠികളാണ് എയര് ഹോസ്റ്റസ് ജോലിയെക്കുറിച്ച് ആദ്യം പറഞ്ഞു കേള്ക്കുന്നത്. കൂടുതല് മനസ്സിലാക്കിയപ്പോള് അത് തന്നെ കരിയറാക്കണമെന്ന് സ്കൂള് പഠന കാലത്ത് തന്നെ തീരുമാനം എടുത്തു. എന്നാല് ജോലിയുടെ ഗ്ളാമറോ ശമ്പളമോ അല്ല ഈ ജോലി തെരഞ്ഞെടുക്കാന് പ്രേരിപ്പിച്ചതെന്നും സാന്ദ്ര പറയുന്നു.
തന്റെ ചെറുപ്പത്തില് വീട്ടിലെ മൂത്തമകളെ മഠത്തില് ചേര്ക്കുന്ന രീതി ക്രൈസ്തവ കുടുംബങ്ങളില് ഉണ്ടായിരുന്നു. മൂത്ത കുട്ടി എന്ന നിലയില് തനിക്ക് പോകേണ്ടി വന്നു. ബീഹാറിലേക്കാണ് പോയത്. ഇംഗ്ളീഷും ഹിന്ദിയും പഠിച്ചിട്ട് തിരികെ പോരാനാണ് വീട്ടുകാര് പറഞ്ഞത്. ബീഹാറില് മഠത്തില് ഒരു സുഹൃത്തിനെ കിട്ടി. അവിടെ ഡാന്സും മറ്റും പഠിച്ചു. എന്നാല് കൂട്ടുകാരി മഠം വിട്ടതോടെ അവിടെ നില്ക്കാന് കഴിയാതായി. ആദ്യം വീട്ടുകാര് സമ്മതിച്ചില്ലെങ്കിലും പിന്നീട് അച്ഛന് തന്നെയെത്തി നാട്ടിലേക്ക് കൂട്ടിക്കൊണ്ടു പോരുകയായിരുന്നെന്നും താരം പറഞ്ഞു.
മത്സരാര്ത്ഥികളുടെ വ്യക്തിത്വത്തെക്കുറിച്ച് മനസ്സിലാക്കാനും പ്രേക്ഷകരിലേക്ക് കൂടുതല് ഇറങ്ങിച്ചെല്ലാനുമായി പരിപാടിയില് കൊണ്ടുവന്നിരിക്കുന്ന പേഴ്സണല് ടാസ്ക്കായ 'നിന്നെ അറിയാന്' എന്നതിലാണ് ജീവിതത്തില് നേരിട്ട അനുഭവങ്ങളെ കുറിച്ച് സാന്ദ്ര പറഞ്ഞത്.
