ലക്നൗ: ദേശീയ പൗരത്വ നിയമത്തിനെതിരേ യുപിയില് നടക്കുന്ന പ്രതിഷേധത്തില് പങ്കെടുത്തതിന് രണ്ടു പെണ്മക്കള്ക്കെതിരേയും ക്രിമിനല് കേസ് എടുത്ത പോലീസ് നഗരത്തില് റാലി നടത്തിയ കേന്ദ്രമന്ത്രി അമിത്ഷായ്ക്ക് എതിരേ എന്താണ് കേസ് എടുക്കാത്തതെന്താണെന്ന് ചോദ്യവുമായി യുപി കവി. പൗരത്വ ഭേദഗതിക്കെതിരേ പഴയ ലക്നൗവിലെ ക്ളോക്ക് ടവറിന് കീഴില് പ്രതിഷേധം നടത്തിയതിന് മറ്റ് 160 സ്ത്രീകള്ക്കൊപ്പം പെണ്മക്കളും പെട്ടു പോയതിന് പിന്നാലെ പിതാവ് മുനാവറാണ് അമിത്ഷായ്ക്കും ബിജെപിയ്ക്കും എതിരേ രംഗത്ത് വന്നത്.
നിരോധനാജ്ഞ ലംഘിച്ചു എന്നാരോപിച്ചാണ് ഇവരെ അറസ്റ്റ് ചെയ്തത്. എന്നാല് പൗരത്വ നിയമ ഭേദഗതിയെ അനുകൂലിച്ച് ബിജെപി നഗരത്തില് റാലി നടത്തുകയും കേന്ദ്ര ആഭ്യന്തരമന്ത്രി അമിത്ഷാ പങ്കെടുക്കുകയും ചെയ്തതാണ് പ്രതിഷേധക്കാരെ ചൊടിപ്പിച്ചിരിക്കുന്നത്. കേന്ദ്രമന്ത്രി അമിത്ഷാ നിയമം ലംഘിച്ചാല് അത് നിയമ ലംഘനം അല്ലേയെന്നും അദ്ദേഹത്തിനെതിരേ എന്താ നടപടിയില്ലേ എന്നുമാണ് പോലീസിനോട് മുനാവര് റാണ ചോദിച്ചത്. ചൊവ്വാഴ്ച അമിത്ഷാ പതിനായിരങ്ങളെ ലക്നൗവില് അഭിസംബോധന ചെയ്തത് നിരോധനാജ്ഞയുടെ ലംഘനമല്ലേയെന്ന് മുനാവര് ചോദിക്കുന്നു. നാലു പേരില് കൂടുതല് റാലിയില് ഉണ്ടായിരുന്നെന്ന് ഉറപ്പായിരുന്നിട്ടും എന്തുകൊണ്ട് നടപടി എടുത്തില്ലെന്നും ചോദിച്ചു.
ഒരേ നിയമത്തില് രണ്ടുതരം പൗരന്മാരുണ്ടോയെന്നും ചോദിച്ചു. അതേസമയം അനുമതി വാങ്ങിയാണ് റാലി നടത്തിയതെന്നാണ് ബിജെപി നേതാക്കളുടെ മറുപടി. എന്നാല് അനുമതി നല്കുന്നതു പോലും നിയമലംഘനമല്ലേയെന്നാണ് മുനാവര് വീണ്ടും ചോദിക്കുന്നത്. മുനാവര് റാണയെ പിന്തുണച്ച് യുപിയിലെ കോണ്ഗ്രസ് രംഗത്ത് വന്നിട്ടുണ്ട്. എന്താ 144 ആഭ്യന്തരമന്ത്രിക്ക് ബാധകമല്ലേ എന്നാണ് അവര് ചോദിക്കുന്നത്. ബിജെപി ഭരണത്തില് നിരോധനാജ്ഞ മറികടന്നാല് സാധാരണ പൗരന്മാരെയെ പിടികൂടുകയുള്ളോ എന്നും നിയമം ലംഘിക്കാന് ഭരണകൂടം സന്തോഷത്തോടെ അനുമതി നല്കിയോയെന്നും അവര് ചോദിച്ചു.
അതേസമയം റാലിക്ക് അനുമതി നല്കിയിരുന്നതായി ജില്ലാ മജിസ്ട്രേറ്റ് അഭിഷേക് പ്രകാശും പറയുന്നു. മുനിസിപ്പല് കോര്പ്പറേഷന്, പൊതുമരാമത്ത്, പോലീസ് എന്നിവിരില് നിന്നും അനുമതി വാങ്ങിയിരുന്നതായി അദ്ദേഹം പറഞ്ഞു. എന്നിരുന്നാലും ആഭ്യന്തരമന്ത്രിക്കെതിരേ നടപടിയെടുക്കണമെന്നാണ് മുനാവര് റാണ പറയുന്നത്. തന്റെ പെണ്മക്കള് ഉള്പ്പെടെയുള്ള പ്രതിഷേധക്കാര്ക്ക് എതിരേ കേസെടുക്കുകയും അമിത്ഷായുടെ റാലിക്ക് നിയമാനുസൃതം എന്ന് പറഞ്ഞ് അനുമതി നല്കുന്നതും അന്യായമാണെന്ന് അദ്ദേഹം പറയുന്നു.
പ്രതിഷേധത്തില് കേസെടുത്താല് ഭയപ്പെടരുതെന്നും കൂടിപ്പോയാല് തടവ് അല്ലെങ്കില് വധശിക്ഷ അതില്കൂടതലൊന്നും വരാനില്ലെന്ന് താന് പെണ്മക്കളോട് പറഞ്ഞിട്ടുണ്ടെന്നും മുനാവര് പറഞ്ഞു. പോലീസ് കഴിഞ്ഞ ദിവസം അറസ്റ്റ് ചെയ്ത 160 സ്ത്രീ പ്രതിഷേധക്കാരിലായിരുന്നു മുനാവറിന്റെ പെണ്മക്കളും പെട്ടത്. കുട്ടികള് ഉള്പ്പെടെ നൂറു കണക്കിന് പേരാണ് ഒരുമിച്ച് കൂടിയത്്. വിവിധ രാഷ്ട്രീയ പാര്ട്ടികളുടെ നേതാക്കന്മാര് ഇവിടെയെത്തുകയും സ്ത്രീകളുടെ പ്രതിഷേധത്തിന് പിന്തുണ നല്കുകയും ചെയ്തിരുന്നു. സമരത്തില് കുട്ടികളുമായിട്ടാണ് പല സ്ത്രീകളും എത്തിയത്. എന്നാല് കുട്ടികളെ റാലിയില് കൊണ്ടു വന്നതിലൂടെ കുട്ടികളടെ അവകാശ ലംഘനമാണ് നടത്തിയിരിക്കുന്നതെന്നും മാതാപിതാക്കള്ക്കെതിരേ കേസെടുക്കണമെന്നും യുപി ബാലാവകാശ കമ്മീഷന് ആവശ്യപ്പെട്ടു.
എന്നാല് സമരവേദിയിലേക്ക് കുട്ടികള് തങ്ങള്ക്കൊപ്പം സ്വമനസ്സാല് വന്നതാണെന്നും തങ്ങള് നിര്ബ്ബന്ധിച്ചു കൂട്ടിക്കൊണ്ടു വന്നതല്ലെന്നും അക്കാര്യം അവരോട് ചോദിക്കാം എന്നും കുട്ടികളുമായി എത്തിയ അമ്മമാര് പറയുന്നു. ആറും എട്ടും പ്രായത്തിലുള്ള രണ്ടു കുട്ടികളുമായിട്ടാണ് സോയാ ഹസന് എന്ന വീട്ടമ്മ പ്രതിഷേധത്തിനെത്തിയത്്്. താന് വീട്ടിലേക്ക് പോകാന് കുട്ടികളോട് പറഞ്ഞപ്പോള് അവര് അത് നിരസിക്കുകയായിരുന്നു. ഏതെങ്കിലും മാതാപിതാക്കള് സ്വന്തം കുട്ടികളെ പീഡിപ്പിക്കണമെന്ന് ആഗ്രഹിക്കുമോയെന്നും ഇവര് ചോദിക്കുന്നു. എല്ലാവരെയും പിടിച്ച് ജയിലില് ഇട്ടാലും ഇഞ്ചു പോലും മാറില്ലെന്നും ഇവര് പറയുന്നു.
