പാട്ട്, എഴുത്ത്, സംഗീതം, ഡബ്ബിംഗ്... ഇനി അഭിനയിക്കാനും റെഡി, പക്ഷേ വെയിറ്റ് കുറയ്ക്കാന്‍ പറ്റില്ല- കുടുക്കാച്ചി ബിരിയാണി മലയാളിക്കുതന്ന സയനോര പറയുന്നു

ബങ്കി ബങ്കി ബങ്കി ബൂം ബൂം

ബങ്കി ബങ്കി ബങ്കി ബൂം ബൂം

എവിടാന്നപ്പാ പോയീനു....

യൂട്യൂബിലെ ട്രെന്‍ഡായ കണ്ണൂര്‍ സോംഗ് 11 മില്യണ്‍ ലൈക്സ് കടക്കുമ്പോള്‍ ഗായിക സയനോര ഫിലിപ്പ് സ്റ്റാന്‍ഡ് അപ് എന്ന ചിത്രത്തിന്റെ വിജയാഘോഷത്തിലാണ്. വിധു വിന്‍സന്റിന്റെ ചിത്രത്തില്‍ ഡബിള്‍ റോളാണ് സയനോരയ്ക്ക്. പാട്ട് പാടിയതിനൊപ്പം നായിക നിമിഷ സജയന് ശബ്ദം നല്‍കിയതും സയനോരയാണ്. പുതിയ വര്‍ക്കുകള്‍ക്കുശേഷം തന്റെ ഡാഡിയുടെ സ്വപ്നം സഫലീകരിക്കാനുള്ള യാത്രയ്ക്കൊരുങ്ങുകയാണ് ഈ കണ്ണൂരുകാരി.

സ്റ്റാന്‍ഡ് അപ്പില്‍ സംഗീതം ചെയ്തിരുന്നത് ഡിന്‍ ചിക് നേഷന്‍ എന്ന എന്റെ ബാന്‍ഡിലെ വര്‍ക്കിയാണ്. കമ്പോസിംഗ് സമയത്ത് ഞാനും അവര്‍ക്കൊപ്പമുണ്ടായിരുന്നു. ട്രാക്ക് ഞാനാണ് പാടിയത്. ട്രാക്ക് ഇഷ്ടപ്പെട്ട വിധുവാണു പാട്ട് ഞാന്‍ പാടിയാല്‍ മതിയെന്ന് പറഞ്ഞത്. അങ്ങനെയാണ് നാലു പാട്ടില്‍ മൂന്നും ഞാന്‍ പാടിയത്. ഒപ്പം നിമിഷയ്ക്കുവേണ്ടി ഡബ് ചെയ്തതും ഞാനാണ്.

ഒരു ദിവസം ഞങ്ങള്‍ സുഹൃത്തുക്കള്‍ വെറുതെ സംസാരിച്ചുകൊണ്ടിരുന്നപ്പോള്‍ ഞാന്‍ എന്തോ തമാശ പറഞ്ഞു. അത് കേട്ട് എല്ലാവരും ചിരിച്ചു.

സൗമ്യ സദാനന്ദന്‍ മാത്രം എന്നെ നോക്കിയിരുന്നു. നീ ഡബ്ബ് ചെയ്യുമോ?? എന്ന് ചോദിച്ചു..ഞാനിതുവരെ ചെയ്തിട്ടില്ല. പിന്നെ ശ്രമിച്ചു നോക്കാം.. എന്നു ഞാന്‍ പറഞ്ഞു. അങ്ങനെയാണ് വീ ഡിയോ ജോക്കിയായിരുന്ന സൗമ്യ സദാനന്ദന്റെ ലഘുചിത്ര മായ റാബിറ്റ് ഹോളിനു ശബ്ദം കൊടുത്തത്.

പിന്നീട് ശ്യാമപ്രസാദ് സാറിന്റെ ഹേയ് ജൂഡ് എന്ന ചിത്രത്തില്‍ തൃഷയ്ക്കു ശബ്ദം കൊടുത്തു. അതില്‍ ഞാന്‍ പാടിയിട്ടുമുണ്ട്. പാട്ടിന്റെ റെക്കോര്‍ഡിങ്ങിനു പോയപ്പോള്‍, തൃഷയ്ക്കു ശബ്ദം കൊടുക്കാന്‍ ഒരാളെ തിരയുകയാണെന്ന് ശ്യാം സാര്‍ പറഞ്ഞു. ഇംഗ്ലീഷും മലയാളവും ഒരുപോലെ കൈകാര്യം ചെയ്യാന്‍ പറ്റുന്ന ആളായിരിക്കണം.

സായ ഒന്നു ശ്രമിച്ചു നോക്കാമോ?? എന്ന് അദ്ദേഹം ചോദിച്ചു. ഒരു തവണ ഡബ് ചെയ്തിട്ടുണ്ട്, ഇന്‍ട്രസ്റ്റിങ്ങായി തോന്നുന്നു, ഞാനൊന്ന് ശ്രമിച്ചു നോക്കാം.. എന്നു പറഞ്ഞു.

അങ്ങനെ തൃഷയ്ക്കു ശബ്ദം കൊടുത്തു. തൃഷയുടേത് എന്നേക്കാള്‍ ഹൈ പിച്ച് ടോണുള്ള ശബ്ദമാണ്. അതുകൊണ്ടു തന്നെ ഡബ് ചെയ്തപ്പോള്‍ സാധാരണ സംസാരിക്കുന്ന രീതിയിലല്ലാതെ കുറച്ച് ഹൈ പിച്ചിലാണ് ചെയ്തത്.

റാബിറ്റ് ഹോളില്‍ ഡിപ്രഷന്‍ ബാധിച്ച സ്റ്റാന്‍ഡ്പ് കോമഡേിയന്റെ കഥാപാത്രത്തിനുവേണ്ടിയാണ് ഞാന്‍ ഡബ് ചെയ്തത്. അതു കണ്ടിട്ടാണ് വിധു എന്നെ നിമിഷയുടെ കഥാപാത്രത്തിന് ഡബ് ചെയ്യാന്‍ വിളിക്കുന്നത്. സിനിമയില്‍ നിമിഷയുടേത് സ്ട്രോങ്ങ് കഥാപാത്രമാണ്. അതില്‍ വോയ്സ് അധികം മോഡുലേറ്റ് ചെയ്യണ്ടി വന്നില്ല.

കുട്ടന്‍പിള്ളയുടെ ശിവരാത്രികള്‍ എന്ന ചിത്രത്തിന്റെ സമയത്താണ് ഒരു സിനിമയ്ക്കുവേണ്ടി കണ്ണൂര്‍ സ്ലാംഗിലുള്ള പാട്ട് വേണമെന്നാവശ്യപ്പെട്ട് എനിക്കൊരു കോള്‍ വരുന്നത്.

കണ്ണൂര്‍ സ്ലാംഗിലുള്ള വാക്കുകള്‍ ചേര്‍ത്ത് ആദ്യത്തെ ഒരു സ്റ്റാന്‍സ ഞാന്‍ എഴുതി, ഞാനും വര്‍ക്കിയും ചേര്‍ന്നതിന് സംഗീതം നല്‍കി അയച്ചു. പക്ഷേ അവര്‍ ഉദ്ദേശിച്ച രീതിയിലുള്ളതായിരുന്നില്ല അത്. പിന്നീട് ആ പാട്ടിനെക്കുറിച്ച് ഞങ്ങള്‍ ചിന്തിച്ചില്ല.

മ്യൂസിക് മോജോ യില്‍ കവര്‍ സോങ്ങുകള്‍ മാത്രമല്ലാതെ ഞങ്ങളുടേതായ എന്തെങ്കിലും പാട്ടുകള്‍ കൂടി ഉള്‍പ്പെടുത്തി പെര്‍ഫോം ചെയ്യണമെന്ന് തോന്നി. അപ്പോഴാണ് മുമ്പ് ചെയ്തുവച്ച ബങ്കി സോങ്ങിന്റെ കാര്യം ഓര്‍മ്മയില്‍ വരുന്നത്. വൈശാഖ് സുഗുണനെ കൊണ്ട് ബാക്കി വരികള്‍ എഴുതി സംഗീതം നല്‍കി ആ പാട്ട് അവതരിപ്പിച്ചു.

ഇത്ര ഹിറ്റാകുമെന്ന് പ്രതീക്ഷിച്ചില്ല, എന്തായാലും ഒരു ലക്ഷം ലൈക്ക് കിട്ടും, കണ്ണൂരിനെ ഇഷ്ടപ്പെടുന്നവര്‍ക്ക് ഈ പാട്ട് ഇഷ്ടമാകുമെന്നൊക്കെ തോന്നി. എന്നാല്‍ ഞങ്ങളുടെ പ്രതീക്ഷകള്‍ക്കുമപ്പുറം 11 മില്യണ്‍ കടന്നു ട്രെന്‍ഡിംഗ് സോങ്ങായി, അമേരിക്ക, യു.കെ എന്നിങ്ങനെ ലോകത്തിന്റെ വിവിധ ഭാഗങ്ങളില്‍ നിന്നുള്ളവര്‍ വിളിച്ച് അഭിപ്രായം പറഞ്ഞു.

അതിലെ കുടുക്കാച്ചി ബിരിയാണി എന്ന വാക്കാണ് എല്ലാവര്‍ക്കും കൂടുതല്‍ ഇഷ്ടപ്പെട്ടത്. കിടുക്കാച്ചി എന്ന വാക്കാണ് ഞാനാദ്യം ആലോചിച്ചത്, പക്ഷേ അതിനോടെന്തോ ഇഷ്ടം തോന്നിയില്ല. കുടുക്ക ബിരിയാണിയെ ച്ചി എന്ന അക്ഷരം കൂടി ചേര്‍ത്ത് കുടുക്കാച്ചി ബിരിയാണിയാക്കി.

പാട്ട് ട്രെന്‍ഡായ ശേഷം പല ഹോട്ടലുകളിലും മെനുവില്‍ കുടുക്കാച്ചി ബിരിയാണിയും സ്ഥാനം പിടിച്ചു. ഒപ്പം മലയാള ഭാഷയിലേക്ക് പുതിയൊരു വാക്ക് കൂടി സംഭാവന നല്‍കാനും കഴിഞ്ഞു.

വലിയൊരു എഴുത്തുകാരിയൊന്നുമല്ല. പാട്ട് കമ്പോസ് ചെയ്യാന്‍ ഡമ്മി ലിറിക്സ് എഴുതുന്നതാണ് പതിവ്. ആ ലിറിക്സ് വച്ചാണ് ട്യൂണ്‍ ചെയ്യുന്നത്. കുട്ടന്‍പിള്ളയുടെ ശിവരാത്രി ചെയ്യുന്ന സമയത്ത് സുരാജേട്ടന്‍ പാടുന്ന എന്റെ ശിവനേ എന്ന പാട്ടിനും ഇതേപോലെ ഡമ്മി ലിറിക്സ് എഴുതിയിരുന്നു.

ആ പാട്ട് സംവിധായകന് ഇഷ്ടപ്പെട്ടപ്പോള്‍ സിനിമയിലും അതുതന്നെ മതി എന്ന് തീരുമാനിക്കുകയായിരുന്നു. ഇപ്പോള്‍ ആഹ എന്ന സിനിമ ചെയ്തുകൊണ്ടിരിക്കുകയാണ്. അതിലെ നാലുപാട്ടുകളില്‍ ഒന്നിന് വരികളെഴുതിയതും ഞാനാണ്.

ഇത്രയും നാള്‍ പിന്നണിഗാനരംഗത്ത് നിന്നിട്ടും ഒരു സംഗീത സംവിധായികയുമൊത്ത് വര്‍ക്ക് ചെയ്യാന്‍ കഴിഞ്ഞിട്ടില്ല. മ്യൂസിക് പ്രൊഡക്ഷന്‍ എന്താണെന്ന് പഠിക്കാതെ അതിന്റെ ടെക്നിക്സ് അറിയാതെ എങ്ങനെ സംഗീത സംവിധായികയാകുമെന്ന ആശങ്ക എനിക്കുണ്ടായിരുന്നു.

സുഹൃത്തായ ജോണാണ് കുട്ടന്‍പിള്ളയുടെ ശിവരാത്രികള്‍ക്ക് ഞാന്‍ മ്യൂസിക് ചെയ്യണമെന്ന് പറയുന്നത്. നിനക്കത് ചെയ്യാ ന്‍ പറ്റുമെന്ന് എനിക്ക് തോന്നുന്നുണ്ടെന്ന് ജോണ്‍ നിര്‍ബന്ധിച്ചപ്പോള്‍ ആ ഓഫര്‍ സ്വീകരിക്കുകയായിരുന്നു.

മ്യൂസിക് പ്രൊഡക്ഷനുമായി ബന്ധപ്പെട്ട ബേസിക് കാര്യങ്ങളൊക്കെ പഠിച്ചു. ആ സിനിമയ്ക്കു പശ്ചാത്തലസംഗീതം ചെയ്തതും ഞാനാണ്.

ഞാന്‍ രംഗത്തു വരുന്ന സമയത്ത് ഉഷ ഖന്നയല്ലാതെ മറ്റൊരു റോള്‍ മോഡല്‍ എനിക്കുണ്ടായിരുന്നില്ല. ഞാന്‍ സംഗീത സംവിധായികയായതോടെ മറ്റൊരു പെണ്‍കുട്ടിക്ക് അതൊരു പ്രചോദനമാകുന്നുണ്ടെങ്കില്‍ അത് നല്ല കാര്യമാണ്. അതൊരു മാറ്റമായിരിക്കും.

കൂടുതല്‍ പെണ്‍കുട്ടികള്‍ക്ക് സംഗീത സംവിധായികമാരായി കടന്നുവരാന്‍ ഞാനൊരു പ്രചോദനമാകുന്നുണ്ടെങ്കില്‍ എനിക്കുമത് സന്തോഷമാണ്.

ഡാഡി വെസ്‌റ്റേണ്‍ മ്യൂസിക് ടീച്ചറാണെങ്കിലും എന്നെ അഞ്ച് വയസുമുതല്‍ കര്‍ണ്ണാടകസംഗീതം പഠിക്കാന്‍ വിടുമായിരുന്നു. 12 വര്‍ഷം പഠിച്ചു. എന്റെ ബേസിക് ടാലന്റ് എന്താണെന്ന് ഡാഡിയ്ക്കറിയാമായിരുന്നു. സ്വന്തമായി മ്യൂസിക് ഇന്‍സ്റ്റിറ്റ്യൂട്ട് ഉള്ളതുകൊണ്ട് സംഗീത ഉപകരണങ്ങളെല്ലാം വായിക്കാന്‍ ഞങ്ങള്‍ മൂന്ന് മക്കളെയും പഠിപ്പിച്ചു.

മകള്‍ സനയ്ക്ക് എന്റെ പാട്ടുകള്‍ അത്ര ഇഷ്ടമല്ല. ഞാന്‍ പാടാന്‍ പോകുന്നതുകൊണ്ടാണ് അവള്‍ക്കൊപ്പം നില്‍ക്കാത്തത് എന്നതാണ് കാരണം. മറ്റുള്ള കുട്ടികളുടെ മമ്മിമാരൊക്കെ അവരെ സ്‌കൂളില്‍ പോകാന്‍ ഒരുക്കുന്നു, വാനില്‍ കയറ്റി വിടുന്നു. മമ്മ മാത്രം എന്താ അങ്ങനെ ചെയ്യാത്തത്?? എന്നൊക്കെ അവള്‍ ചോദിക്കാറുണ്ട്.

കുറേ കുട്ടികളുടെ അമ്മമാര്‍ വിദേശത്ത് ജോലി ചെയ്യുന്നുണ്ട് അവര്‍ക്കൊന്നും മക്കളെ കാണാന്‍ പോലും പറ്റുന്നില്ലല്ലോ, മറ്റു ചിലര്‍ കുട്ടികള നോക്കി ഇരിക്കുന്നുണ്ട്, ഇങ്ങനെ ഓരോരുത്തരും വ്യത്യസ്തരാണ്, മമ്മയുടെ ജോലി ഇങ്ങനെയാണ്, അത് ചെയ്തില്ലെങ്കില്‍ മോള്‍ക്ക് നല്ല വിദ്യാഭ്യാസവും മറ്റു സൗകര്യങ്ങളുമൊക്കെ ചെയ്തു തരാന്‍ കഴിയില്ല എന്നൊക്കെ പറഞ്ഞ് ഞാനവളെ കാര്യങ്ങള്‍ പറഞ്ഞ് മനസിലാക്കിയിട്ടുണ്ട്.

എങ്കിലും ജോലി സംബന്ധമായ യാത്രകള്‍ക്കിടയില്‍ മകള്‍ ഒപ്പമില്ലാത്തത് വലിയ വിഷമം തന്നെയാണ്, അവള്‍ക്കും സങ്കടമാണ്. ആഷിയേയും മോളേയും കൊച്ചിയിലേക്ക് പറിച്ചുനടാന്‍ ഞാന്‍ ശ്രമിച്ചതാണ്. ആഷിയുടെ മാതാപിതാക്കള്‍ നല്ല പ്രായമുള്ളവരാണ്, അവര്‍ക്കവരുടെ വീടിനോട് ഒരു ഇന്റിമസിയുണ്ടല്ലോ. എന്റെ കരിയറിന് വേണ്ടി അവരെ ബുദ്ധിമുട്ടിയ്ക്കുന്നത് ശരിയല്ല എന്ന് തോന്നിയപ്പോഴാണ് ഞാന്‍ യാത്ര ചെയ്യാന്‍ തുടങ്ങിയത്.

ജോലി സംബന്ധമായി തിരുവനന്തപുരത്തോ കൊച്ചിയിലോ ഒക്കെ ആയിരിക്കും. മകളെ എനിക്കൊപ്പം നിര്‍ത്താമെന്നുവച്ചാല്‍ എനിക്കവളെ ഞങ്ങളുടെ മാതാപിതാക്കള്‍ ഇപ്പോള്‍ നോക്കുന്നതുപോലെ വളര്‍ത്താന്‍ പറ്റില്ല. അതുകൊണ്ട് വിഷമം സഹിച്ച് ജീവിക്കും.

വര്‍ക്കെല്ലാം തീര്‍ത്ത് കണ്ണൂരിലേക്ക് ചെല്ലുമ്പോള്‍ ഞാനെന്റെ സമയം മുഴുവന്‍ കുടുംബത്തിനുവേണ്ടി മാറ്റി വയ്ക്കും. നല്ലൊരു മരുമകളും ഭാര്യയും അമ്മയുമാകും. മോള്‍ക്കൊപ്പം പെയിന്റ് ചെയ്യും, ബീച്ചില്‍ പോകും. മൊത്തത്തില്‍ അലമ്പാക്കും. അങ്ങനെ സനയ്ക്കൊപ്പം ഓടി കളിക്കുമ്പോഴാണ് വീണ് പരിക്കു പറ്റുന്നത്. ഇപ്പോള്‍ പ്ലാസ്റ്റര്‍ എടുത്തിട്ട് രണ്ടാഴ്ചയാകുന്നേയുള്ളൂ.

മോള്‍ക്കിപ്പോള്‍ സംഗീതത്തോട് വലിയ താല്‍പര്യമൊന്നുമില്ല. കുട്ടികള്‍ പൊതുവേ അങ്ങനെയാണ്. ഈ പ്രായത്തില്‍ അവര്‍ക്ക് കളിക്കാനും ഓടി നടക്കാനുമാണിഷ്ടം. പക്ഷേ കുട്ടികള്‍ക്ക് എന്തെങ്കിലും ടാലന്റുണ്ടെങ്കില്‍ അവര്‍ക്കത് പഠിക്കാനുള്ള ട്രെയിനിംഗ് കൊടുക്കണം. അതുകൊണ്ട് തന്നെ ഞാന്‍ മോളെ നിര്‍ബന്ധിച്ച് കര്‍ണാടക സംഗീതവും പിയാനോയുമൊക്കെ പഠിക്കാന്‍ വിടുന്നുണ്ട്.

ആഷി തരുന്ന ഫ്രീഡമാണ് എന്റെ സ്ട്രെങ്ത്. ജോലി ചെയ്യുന്ന സമയത്ത് ഒരു രീതിയും എനിക്ക് ബുദ്ധിമുട്ടുണ്ടാക്കാറില്ല. അവനും എനിക്കും ഞങ്ങളുടേതായ സ്പേസുണ്ട്, അതാണ് ഒരു ആര്‍ട്ടിസ്റ്റിന് ആവശ്യമുള്ളതും.

ഞാന്‍ ഏറ്റവും കൂടുതല്‍ ഹാപ്പിയാകുന്നത് ജോലി ചെയ്യാനാവശ്യമായ ഫ്രീഡം എനിക്ക് തരുമ്പോഴാണ്. സ്റ്റുഡിയോയിലോ ഷോയിലോ ആയിരിക്കുമ്പോള്‍ മോള്‍ക്കെന്തെങ്കിലും അസുഖം വന്നാലും അതെന്നെ അറിയിക്കാതെ അവര്‍ മാനേജ് ചെയ്യും.

ഞങ്ങളുടെ വീടിനടുത്തുതന്നെയാണ് മമ്മിയും ഡാഡിയും താമസിക്കുന്നത്. മോളുടെ കാര്യങ്ങളൊക്കെ അവര്‍ സന്തോഷത്തോടെയാണ് നോക്കുന്നത്.

മമ്മിയാണ് സയനോര എന്ന പേരെനിക്കിട്ടത്. മമ്മിയെപ്പോഴോ വായിച്ച കഥയിലെ രാജകുമാരിയുടെ പേരാണത്. ജാപ്പനീസ് ഭാഷയില്‍ സായോനോര എന്നു വച്ചാല്‍ ഗുഡ് ബൈ എന്നാണ് അര്‍ത്ഥം. കുറച്ച് കോംപ്ലിക്കേറ്റഡായതിനാല്‍ സയനോരയെന്ന പേരെനിക്ക് ഇഷ്ടമായിരുന്നില്ല. പേര് ഐഡന്റിറ്റിയായതോടെ ആ ഇഷ്ടക്കേടങ്ങ് മാറി.

ഞാന്‍ പണ്ട് കഥാപ്രസംഗം ഒക്കെ ചെയ്യുമായിരുന്നു. ശ്യം പുഷ്‌കരന്‍ ഒരിക്കല്‍,, ഞാനൊരു തിരക്കഥ എഴുതുന്നുണ്ട്, അഭിനയിക്കുന്നോ?? എന്ന് ചോദിച്ചിരുന്നു, അഭിനയിക്കാന്‍ റെഡിയാണ്, പക്ഷേ വെയിറ്റ് കുറയ്ക്കാന്‍ പറ്റില്ല,, എന്ന് ഞാനും പറഞ്ഞും. വെയിറ്റ് കുറയ്ക്കാതെ ഇപ്പോഴുള്ള പോലെ തന്നെ അഭിനയിക്കാന്‍ അവസരം കിട്ടിയാല്‍ ഒന്നു ശ്രമിച്ചു നോക്കും.