തെറ്റാണെങ്കിലും ശരിയാണെങ്കിലും തീരുമാനങ്ങള്‍ സ്വന്തം; ഒറ്റ ദിവസംകൊണ്ട് മോഹന്‍ലാലിന്റെ നായികയായ മിര്‍ണ പറയുന്നു

മലയാള സിനിമയിലെ പുത്തന്‍ താരോദയമാണ് മിര്‍ണ മേനോന്‍. അഭിനയിക്കുന്ന ആദ്യ മലയാള സിനിമയില്‍ നായകന്‍ മോഹന്‍ലാല്‍, സംവിധായകന്‍ സിദ്ധിഖ്.

മലയാള സിനിമയിലെ മറ്റേത് നടിക്ക് ലഭിച്ചിട്ടുണ്ടാവും ഇങ്ങനെ ഒരു അവസരവും ഭാഗ്യവും? പക്ഷേ തനിക്കിത് ഭാഗ്യം മാത്രമായി കാണാനാവില്ല, ദൈവം നല്‍കിയ വരദാനം പോലെയാണെന്ന് മിര്‍ണ പറയുന്നു.

സ്വന്തമായി നിലപാടുകളുള്ള, ആളുകളെ മനസിലാക്കുന്ന, ചുറ്റുപാടുമുളളവരിലേക്ക് തന്നിലെ പോസിറ്റീവ് എനര്‍ജി പകര്‍ന്നുനല്‍കുന്ന പ്രകാശം പരത്തുന്ന ഒരു പെണ്‍കുട്ടിതന്നെയാണ് മിര്‍ണ.

ഞാന്‍ ആദ്യമായാണ് മലയാള സിനിമയില്‍ അഭിനയിക്കുന്നത്. മുന്‍പ് തമിഴില്‍ അഭിനയിച്ചിരുന്നു. ഡയറക്ടര്‍ അമീറിന്റെ ഒരു പ്രോജക്ടില്‍. മലയാളത്തില്‍ എന്നായാലും അഭിനയിക്കാനാവുമെന്ന് ആത്മവിശ്വാസമുണ്ടായിരുന്നു.

സിനിമ പ്രേക്ഷകര്‍ ഏറ്റെടുത്തുവെന്നറിയുന്നതില്‍ സന്തോഷമുണ്ട്. ഫാമിലി എന്റര്‍ടെയിനറും കൂടിയായതുകൊണ്ട് വളരെ നല്ല അഭിപ്രായമാണ് എല്ലായിടത്തുനിന്നും വരുന്നത്. ലാലേട്ടന്റെ ആക്ഷന്‍ മാസ് ഫീലാണ് മറ്റൊരു പ്രത്യേകത. മലയാളി പ്രേക്ഷകരുടെ സ്നേഹം ഇതാദ്യമായിട്ടാണ് ലഭിക്കുന്നത്. സ്വന്തം മണ്ണിലെ സ്നേഹത്തിന്റെ ഊഷ്മളത അനുഭവിച്ചറിയാന്‍ കഴിയുന്നുണ്ട്.

വളരെ വലിയൊരു അനുഗ്രഹമാണ് എനിക്ക് ലഭിച്ചത്. ഒരുപാടുപേര്‍ ആഗ്രഹിച്ച ഭാഗ്യമാണ് എന്നെത്തേടി എത്തിയത്. സിനിമയിലെ വിസ്മയമെന്നറിയപ്പെടുന്ന ലാലേട്ടനോടൊപ്പം അദ്ദേഹത്തിന്റെ നായികയാവാന്‍ കഴിഞ്ഞു. കരിയറിലെ ആദ്യത്തെ സ്‌റ്റെപ്പ് തന്നെ ആ ഭാഗ്യത്തോടെ ആയതില്‍ സന്തോഷമുണ്ട്.

ലാലേട്ടനെക്കുറിച്ച് പറയാന്‍ ഒരുപാട് കാര്യങ്ങളുണ്ട്. വളരെ ഫ്രണ്ട്ലിയാണ് അദ്ദേഹം. അദ്ദേഹത്തെപ്പോലുള്ള ഒരു സൂപ്പര്‍ സ്റ്റാറിന്റെ കൂടെ ആദ്യമായിട്ടഭിനയിക്കുമ്പോള്‍ ആര്‍ക്കായാലും ടെന്‍ഷനുണ്ടാവും. പക്ഷേ ലാലേട്ടന്‍ കൂടെയുളളവരെയെല്ലാം കൂളാക്കി, ടെന്‍ഷനില്ലാതെയാണ് സെറ്റിനെ കൊണ്ടുപോകുന്നത്. എന്റെ ഓപ്പോസിറ്റ് നില്‍ക്കുന്നത് ലാലേട്ടനാണെന്ന് ഒരിക്കലും ഫീല്‍ ചെയ്തിട്ടില്ല. വളരെ പരിചയമുള്ള നല്ലൊരു സുഹൃത്ത് അല്ലെങ്കില്‍ വര്‍ഷങ്ങളായി പരിചയമുള്ള ഒരാളെപ്പോലെയാണ് തോന്നിയത്.

എന്നെ വിശ്വസിച്ചാണ് സിദ്ധിഖ്‌സാര്‍ ആ ക്യാരക്ടര്‍ നല്‍കിയത്. അദ്ദേഹത്തോട് തീര്‍ത്താല്‍ തീരാത്ത നന്ദിയുണ്ട്. കാരണം നമ്മള്‍ ചെയ്ത കുറേ സിനിമകള്‍ വിലയിരുത്തി ഒരു പ്രോജക്ട് നമ്മളെ വിശ്വസിച്ച് തരുന്നതും, നമ്മുടെ ജീവിതത്തിലെ ഒരു ടേണിങ് പോയിന്റ് തുറന്നുതരുന്നതും രണ്ടല്ലേ? സാര്‍ എനിക്ക് ജീവിതത്തിലെ ഒരു വഴിത്തിരിവാണ് കാട്ടിത്തന്നത്. അദ്ദേഹം എനിക്ക് ഗുരുതുല്യനാണ്. ചെറുപ്പത്തിലെമുതല്‍ സിദ്ധിഖ്സാറിന്റെ സിനിമകള്‍ കണ്ടിട്ടുണ്ട്.

എന്റെ അടുത്ത കുടുംബസുഹൃത്ത് ജ്യോതി ചേച്ചി സിദ്ധിഖ് സാറിന്റെയും കുടുംബ സുഹൃത്താണ്. ചേച്ചിയാണ് ഈ സിനിമയില്‍ ഞാന്‍ ഉണ്ടാവാനുള്ള ഏറ്റവും വലിയ കാരണം. എന്റെ അമ്മയുടെ സ്ഥാനമാണ് ചേച്ചിക്ക്. കൊച്ചിയില്‍വച്ച് ഒരു ഗെറ്റ് ടുഗതറിന്റെ ഭാഗമായി ജ്യോതിചേച്ചി സിദ്ധിഖ് സാറിനെ കാണാന്‍ പോയിരുന്നു. മോളുകൂടി വരൂ, സാറിന്റെ അനുഗ്രഹം വാങ്ങാം എന്നു പറഞ്ഞു. അങ്ങനെ ഞങ്ങളവിടെ ചെന്നു. അപ്പോള്‍ ബിഗ് ബ്രദറിന്റെ പ്രീപ്രൊഡക്ഷന്‍ വര്‍ക്കുകള്‍ നടക്കുകയാണ്. സാര്‍ പറഞ്ഞു, നല്ല ഫേസാണല്ലോ മിര്‍ണയുടേത്. ഓഡിഷനൊക്കെ കഴിഞ്ഞു അല്ലായിരുന്നെങ്കില്‍ നോക്കാമായിരുന്നു എന്ന്.

അത് കുഴപ്പമില്ല സാര്‍ എനിക്ക് സാറിനെ കാണാന്‍ പറ്റിയല്ലോ അത് മതിിയെന്ന് ഞാന്‍ പറയുകയും ചെയ്തു. പിറ്റേദിവസം ജ്യോതി ചേച്ചിക്ക് സാറിന്റെ ഓഫീസില്‍നിന്ന് ഒരു കോള്‍ വന്നു. നമുക്ക് ആ കുട്ടിയുടെ ഫോട്ടോഷൂട്ടെടുത്ത് നോക്കാാമെന്ന്, ഒരു മണിക്കൂറിന് ശേഷം എന്റെ ഫോട്ടോഷൂട്ട് എടുക്കുന്നു. വീണ്ടും ഒരു മണിക്കൂറിന് ശേഷം ഞാന്‍ ബിഗ്ബ്രദറിലെ ഹീറോയിനാണെന്നറിയുന്നു. എന്നെ സംബന്ധിച്ച് ഒരു ദിവസംകൊണ്ട് നടന്ന അത്ഭുതമാണ് ബിഗ് ബ്രദര്‍.

ഏഴിലും എട്ടിലും ഒക്കെ പഠിക്കുന്ന സമയത്തുതന്നെ നടിയാവണമെന്നും ആകുമെന്നും വിചാരിച്ചിരുന്നു. പഠനം കഴിഞ്ഞ് സിനിമ തന്നെ തിരഞ്ഞെടുക്കണമെന്ന് ആഗ്രഹിച്ചിരുന്നു. പഠിച്ച് ഡോക്ടറോ എന്‍ജി നീയറോ ആകാം. പക്ഷേ സിനിമ ആഗ്രഹിക്കുമ്പോഴേ കിട്ടന്ന ഒന്നല്ല.

ഈ ലോകവുമായി യാതൊരു ബന്ധവും ഇല്ല. ആകെ അറിയാവുന്നത് ഓഫീസിലുളള അഞ്ചോ ആറോ സുഹൃത്തുക്കളെയാണ്. നല്ല ശമ്പളം കിട്ടുമായിരിക്കാം, ജീവിതം സേഫായിരിക്കും. പക്ഷേ ആ ജീവിതത്തിന് എന്ത് അര്‍ഥമാണുള്ളത്.

സിനിമയില്‍ അങ്ങനെയല്ല. ഒരുപാട് ആളുകളെ കാണുന്നു, ഒരുപാട് സ്ഥലങ്ങളില്‍ പോകുന്നു, ധാരാളം അനുഭവങ്ങള്‍...എന്തുകൊണ്ടും സിനിമ വ്യത്യസ്തമാണ്. ചെറുപ്പംമുതല്‍ ആഗ്രഹിച്ച കാര്യമായതുകൊണ്ട് എനിക്ക് സിനിമ ഇണങ്ങുമെന്ന് തോന്നി.

സ്വയം ആശ്രയിച്ച് ജീവിക്കുന്ന വ്യക്തിയാണ് ഞാന്‍. വളര്‍ന്നതും അങ്ങനെയാണ്. അമ്മ 20 വര്‍ഷത്തോളമായി ജോലി സംബന്ധമായി കുവൈറ്റിലാണ്. അച്ഛനും ജോലിയുമായി മാറി നില്‍ക്കുമ്പോള്‍ ഞാന്‍ ഹോസ്റ്റലിലാണ് ജീവിച്ചത്.

തെറ്റാണെങ്കിലും ശരിയാണെങ്കിലും സ്വന്തമായി തീരുമാനങ്ങളെടുത്ത് ജീവിച്ച വ്യക്തിയാണ് ഞാന്‍. എന്റെ തീരുമാനങ്ങള്‍ക്കായിരിക്കും ഞാന്‍ മുന്‍തൂക്കം കൊടുത്തത്. അതുകൊണ്ട് ബോള്‍ഡാണെന്ന് അഭിമാനത്തോടെ പറയാം.

എനിക്ക് നയന്‍താരയെ ഭയങ്കര ഇഷ്ടമാണ്. അവരുടെ ബോള്‍ഡ്‌നസ് കൊണ്ടാണ് അവരെ ഇഷ്ടപ്പെടുന്നത്. വ്യക്തിപരമായി എനിക്കവരോട് എന്തോ ഭയങ്കര ഇഷ്ടമുണ്ട്. അതെന്താണെന്ന് ചോദിച്ചാല്‍ അറിയില്ല. ഒരു ഫാന്‍ ഗേള്‍ എന്ന നിലയിലുള്ള ഇഷ്ടമല്ല. ഉളളില്‍ തട്ടിയ അടുപ്പം. അവര്‍ നില്‍ക്കുന്ന സ്ഥലത്ത് അവരുടേതായ ഒരു സിഗ്നേച്ചര്‍ പതിപ്പിക്കാന്‍ അവരെക്കൊണ്ട് കഴിയുന്നുണ്ട്.

ആര്‍ക്കും ആരെപ്പറ്റിയും ചിന്തിക്കാനില്ലാത്ത ലോകത്ത് നമ്മുടേതായ സിഗ്നേച്ചര്‍ പതിപ്പിക്കാന്‍ കഴിയുക എന്ന് പറയുന്നത് ഒരു വലിയ കാര്യം തന്നെയാണ്.

ഒരുപാട് ആളുകളോട് ഇടപഴകുന്ന ഫീല്‍ഡാണ്. എത്തരത്തിലാണ് ഇന്‍ഡസ്ട്രിയെ കൈകാര്യം ചെയ്യാന്‍ പോകുന്നത്?

പഠനത്തിന്റെ ഭാഗമായി ഹോസ്റ്റലുകളിലാണ് ഞാന്‍ കൂടുതല്‍ സമയവും ചെലവഴിച്ചത്. ഫ്രണ്ട്സിന്റെ ഒപ്പം. വീട്ടിലേക്കാള്‍ കൂടുതല്‍ പുറത്തുള്ള ആളുകളുമായി ഇടപഴകിയാണ് വളര്‍ന്നത്.

ഗോസിപ്പിനെ പേടിയില്ല. ഞാനത് ശ്രദ്ധിക്കാന്‍ പോകാറില്ല. കാരണം ഇത് നമ്മുടെ ഇഷ്ടം, നമ്മുടെ മനസ്, നമ്മുടെ ചിന്തകള്‍. മറ്റുള്ളവര്‍ എന്ത് ചിന്തിക്കുന്നു എന്നതിനെക്കുറിച്ച് തലപുകയ്ക്കേണ്ട കാര്യമില്ല. ഞാനൊരാളെക്കുറിച്ച് എന്തെങ്കിലും പറഞ്ഞതുകൊണ്ട് അയാള്‍ക്ക് ഒന്നും സംഭവിക്കാന്‍ പോകുന്നില്ല. അതുപോലെ തന്നെയാണ് ഗോസിപ്പും. ഗോസിപ്പ് എന്നുപറഞ്ഞാലേ വ്യക്തതയില്ലാത്ത ഇന്‍ഫര്‍മേഷന്‍ എന്നാണ്. ഞാന്‍ അതിനെയൊക്കെ അവഗണിക്കുന്നു.

പ്രണയം വളരെ മനോഹരമായ ഒരു ഫീലാണ്. കോളജ്, സ്‌കൂള്‍ കാലത്താണ് പ്രണയം അതാണ് ഇതാണ് എന്നൊക്കെ വിചാരിക്കുന്നത്. പക്വതയുള്ള ഒരു ജീവിതത്തിലേക്ക് വരുമ്പോള്‍ നമ്മുടെ പ്രണയം നമ്മുടെ പ്രൊഫഷനോടാവും. എന്റെ പ്രണയം സിനിമയോടുതന്നെയാണ്. വിവാഹത്തെക്കുറിച്ച് ഇപ്പോള്‍ ചിന്തിക്കുന്നില്ല.

അച്ഛന്‍ സന്തോഷ് കുമാര്‍, അമ്മ ശോഭന സന്തോഷ് സഹോദരിമാര്‍ ആര്യ, അരുണ്യ. സിനിമ കണ്ട് അച്ഛനും അമ്മയും വളരെ നല്ല അഭിപ്രായമാണ് പറഞ്ഞത്. അമ്മയും ഇളയ അനിയത്തിയും ദുബായിലാണ് സിനിമ കണ്ടത്. അച്ഛനും അച്ചച്ചനും അച്ചമ്മയും ഇടുക്കിയിലാണുള്ളത്. അവര്‍ അവിടുത്തെ തീയറ്ററില്‍ പോയി സിനിമ കണ്ടു. മറ്റൊരു സഹോദരി എറണാകുളത്താണ് സിനിമ കണ്ടത്. സിദ്ധിഖ് സാറിനെപ്പോലൊരു ഡയറക്ടറുെട സിനിമയില്‍ മോഹന്‍ലാലിന്റെ നായികയായി അഭിനയിക്കാനായത് വലിയ ഭാഗ്യമായിട്ടാണ് അവരും കാണുന്നത്.

കോസ്റ്റിയൂംം ഷെഫീന കെ. എസ്സ്(ദിവ വിമണ്‍സ് ക്ലോത്തിങ് സ്‌റ്റോര്‍, എറണാകുളം)