ന്യൂഡല്ഹി: ഡല്ഹി കലാപത്തിനിടെ ഐ.ബി ഉദ്യോഗസ്ഥന് കൊല്ലപ്പെട്ട സംഭവത്തില് ഡല്ഹി മുഖ്യമന്ത്രി അരവിന്ദ് കെജ്രിവാളിനെയും എ.എ.പി പുറത്താക്കിയ താഹിര് ഹുസൈനെയും തൂക്കിക്കൊല്ലണമെന്ന് ബി.ജെ.പി നേതാവ് മനോജ് തിവാരി. ഐ.ബി ഉദ്യോഗസ്ഥന്റെ മരണത്തില് താഹിര് ഹുസൈനെതിരെ ഡല്ഹി പോലീസ് കേസെടുത്തിരുന്നു. ഇതിന് പിന്നാലെയാണ് താഹിര് ഹുസൈന എ.എ.പി പുറത്താക്കിയത്.
ഐ.ബി ഉദ്യോഗസ്ഥന്റെ മരണത്തില് താഹിര് ഹുസൈന് കുറ്റക്കാരനാണെന്ന് കണ്ടെത്തിയാല് ഇരട്ടി ശിക്ഷ നല്കണമെന്ന് കെജ്രിവാള് പ്രസ്താവിച്ചിരുന്നു. ഇരട്ടി ശിക്ഷയെന്നാല് താഹിര് ഹുസൈനും ഇയാളുടെ നേതാവ് കെജ്രിവാളിനെയും ശിക്ഷിക്കണമെന്ന് തിവാരി പറഞ്ഞു. കുറ്റകൃത്യത്തില് ആരോപണവിധേയനായ ആളെയും ഗൂഢാലോചന നടത്തിയ ആളെയും ഒരുപോലെ ശിക്ഷിക്കണമെന്നും തിവാരി ആവശ്യപ്പെട്ടു. കൊല്ലപ്പെട്ട ഐ.ബി ഉദ്യോഗസ്ഥനെതിരെ മതപരമായ അസഹിഷ്ണുതയാണ് പ്രകടമാക്കിയതെന്നും തിവാരി ആരോപിച്ചു.
ഡല്ഹിയിലെ ചാന്ദ് ബാഗില് നിന്നാണ് ഐ.ബി ഉദ്യോഗസ്ഥന് അങ്കിത് ശര്മ്മയുടെ മൃതദേഹം കണ്ടെത്തിയത്. ചൊവ്വാഴ്ച ജോലി കഴിഞ്ഞ് മടങ്ങുകയായിരുന്ന ശര്മ്മയെ ആക്രമിച്ച് കൊന്നുവെന്നാണ് റിപ്പോര്ട്ടുകള്. ഇയാളുടെ വീടിന് സമീപത്തെ മറ്റൊരു കെട്ടിടത്തില് താഹിര് ഹുസൈന് നില്ക്കുന്നതായുള്ള വീഡിയോ ഇതിനിടെ പുറത്തുവന്നിരുന്നു. താഹിര് ഹുസൈന് കൊലപാതകത്തില് പങ്കുണ്ടെന്നാണ് ആരോപണം. ആരോപണം ഉയര്ന്നതിന് പിന്നാലെ എ.എ.പി ഇയാളെ പുറത്താക്കി.
താഹിര് ഹുസൈനെതിരെ കൊലക്കുറ്റം ചുമത്തി ഇന്നലെയാണ് ഡല്ഹി പോലീസ് കേസെടുത്തത്. അതേസമയം കപില് മിശ്ര ഉള്പ്പെടെയുള്ള ബി.ജെ.പി നേതാക്കളുടെ വിദ്വേഷ പ്രസ്താനയ്ക്കെതിരെ കേസെടുക്കാന് ഡല്ഹി പോലീസ് തയ്യാറായിട്ടില്ല. കപില് മിശ്രയ്ക്കെതിരെ കേസെടുത്താല് സമാധാനാന്തരീക്ഷം തകരുമെന്നും ഇപ്പോള് കേസെടുക്കാന് ഉചിതമായ സമയമല്ലെന്നുമാണ് ഡല്ഹി പോലീസിന്റെ വാദം.
