ആഗ്ര: കൊറോണ ബാധ സ്ഥിരീകരിക്കപ്പെട്ട ഗൂഗിളില് ജീവനക്കാരനായ ഐടി വിദഗ്ദ്ധന്റെ വൈറസ്ബാധയേറ്റ 25 കാരി ഭാര്യ ഐസൊലേഷനില് നിന്നും മുങ്ങിയത് ഡല്ഹിയിലെ ആരോഗ്യ പ്രവര്ത്തകര്ക്ക് ഉണ്ടാക്കിയത് വന് തലവേദന. ബംഗലുരുവിലെ വീട്ടില് നിന്നും ഇവര് ആഗ്രയിലെ സ്വന്തം വീട്ടിലേക്ക് വിമാനത്തിലും ട്രെയിനിലുമെല്ലാം സഞ്ചരിച്ചാണ് എത്തിയത്. ഒടുവില് കളക്ടറും പോലീസും അടക്കമുള്ളവര് എത്തി ഇവരേയും ഇവര്ക്കൊപ്പം കഴിഞ്ഞ മാതാപിതാക്കള് അടക്കം ഒമ്പതു പേരെ ഐസൊലേഷനിലേക്ക് മാറ്റി.
അടുത്തിടെ വിവാഹിതരായ ഇരുവരും ഇറ്റലിയില് ഹണിമൂണ് ആഘോഷിച്ച് നാട്ടില് തിരിച്ചെത്തിയപ്പോള് ഭര്ത്താവിന് രോഗം കണ്ടെത്തുകയായിരുന്നു. തുടര്ന്ന് ഐസൊലേഷനിലേക്ക് വിടുകയും ഭാര്യയുടെ രക്ത പരിശോധനാഫലം കാത്തിരിക്കുകയും ചെയ്യുമ്പോഴാണ് മുങ്ങിയത്. ആദ്യ പരിശോധനയില് ഇവരുടെ ഫലം പോസിറ്റീവായിരുന്നു. രണ്ടാമത്തെ വിദഗ്ദ്ധ പരിശോധനയ്ക്കായി നിരീക്ഷണത്തല് കഴിയുമ്പോഴായിരുന്നു മുങ്ങിയത്.
മാര്ച്ച് 8 നായിരുന്നു ഇവര് ബംഗലുരുവില് നിന്നും ഡല്ഹിയിലേക്ക് വിമാനത്തിലാണ് പോയത്. അവിടെ നിന്നും ആഗ്രയിലേക്ക് ട്രെയിനും പിടിച്ചു. ആരോഗ്യ പ്രവര്ത്തകര് വീട്ടില് എത്തുമ്പോള് കുടുംബാംഗങ്ങളോടൊപ്പം കഴിയുകയായിരുന്നു. ഐസൊലേഷനിലേക്ക് മാറാന് ആദ്യം കൂട്ടാക്കാതിരുന്ന ഇവര് കളക്ടര് എത്തി പോലീസിനെ വിളിച്ചതോടെയാണ് കൂടെ പോയത്. മാതാപിതാക്കളും ബന്ധുക്കളും മകള് ബംഗലുരുവിന് മടങ്ങിയെന്ന് ആരോഗ്യ പ്രവര്ത്തകരോട് കള്ളം പറഞ്ഞു. എന്നാല് ജില്ലാ മജിസ്ട്രേറ്റ് ഇടപെട്ട് വീട്ടുകാരെ വിവരം ബോധവല്ക്കരിച്ചു.
ഫെബ്രുവരി ആദ്യമായിരുന്നു ഗൂഗിളില് ജോലി ചെയ്യുന്ന യുവാവുമായി യുവതിയുടെ വിവാഹം നടന്നത്. നവദമ്പതികള് ഹണിമൂണിന് പോയത് ഇറ്റലിയിലേക്കായിരുന്നു. അവിടെ നിന്നും ഗ്രീസിലേക്കും പിന്നീട് ഫ്രാന്സിലേക്കും പോയി. ഫെബ്രുവരി 27 ന് മുംബൈയില് തിരിച്ചു വിമാനം ഇറങ്ങുകയും പിന്നീട് ബംഗലുരുവിന് മടങ്ങുകയും ചെയ്തു. മാര്ച്ച് 7 ന് ഭര്ത്താവിന് കോവിഡ് 19 സ്ഥിരീകരിച്ചതോടെ ഇരുവരും ബംഗലുരുവില് ക്വാറന്റൈന് വിധേയമായി. ഇതിനിടയിലായിരുന്നു യുവതി വിവരം മാതാപിതാക്കളെ വളിച്ചു പറയുകയും പിതാവ് വിളിച്ചതിനെ തുടര്ന്ന് മാര്ച്ച് 8 ന് ആഗ്രയില് മടങ്ങുകയും ചെയ്തത്.
ഞായറാഴ്ചയാണ് യുവതി ആഗ്രയില് മടങ്ങിയെത്തിയത്. ബംഗലുരുവില് നിന്നും വിമാനത്തിലും ഡല്ഹിയില് നിന്നും ആഗ്രയിലേക്ക് ട്രെയിനിലും പോയ ഇവരുടെ റൂട്ട് മാപ്പ് ഇപ്പോള് തയ്യാറാക്കാനൊരുങ്ങുകയാണ്. കോവിഡ് 19 ബാധ സംശയിക്കുന്ന യുവതിയുടെ വിവരം അലിഗഡ് മെഡിക്കല് കോളേജ് ഡല്ഹിയിലെ ആരോഗ്യ പ്രവര്ത്തകരെ അറിയിച്ചതോടെയാണ് അവര് ജാഗരൂകരായത്. ഇതിന് പിന്നാലെ ഇവരേയും മറ്റ് ഒമ്പതു പേരെയും ഐസൊലേഷനിലേക്ക് മാറ്റി.
ഇവരെ ഇപ്പോള് പാര്പ്പിച്ചിരിക്കുന്ന എസ്എന് മെഡിക്കല് കോളേജില് റിപ്പോര്ട്ട് ചെയ്യപ്പെട്ട കൊറോണ ടെസ്റ്റ് പോസിറ്റീവായ ആദ്യ കേസാണ് യുവതിയുടേത്. കൂടുതല് ടെസ്റ്റുകള്ക്കായി പൂനെയിലെ വൈറോളജി ഇന്സ്റ്റിറ്റിയൂട്ടിലേക്ക് അയച്ചിരിക്കുകയാണ്. ഇവര്ക്കൊപ്പം വിമാനത്തിലും ട്രെയിനിലും യാത്ര ചെയ്തവരും നിരീക്ഷണത്തിലാകും. മുന്നിലും പിന്നിലും വശങ്ങളിലുമായി ഇരുന്നവര്ക്കെല്ലാം വൈറസ് ബാധയേറ്റിരിക്കാന് സാധ്യതയുണ്ടെന്നതിനാല് ഇവരെയും കണ്ടെത്തേണ്ടി വരും. വിവരം പുറത്തുവന്നതോടെ കോച്ചുകളിലും റെയില്വേ സ്റ്റേഷനിലും അണുവിമുക്തമാക്കുന്ന ജോലികള് ആഗ്ര റെയില്വേ അധികൃതര് തുടങ്ങിയിട്ടുണ്ട്.
