വാഷിംഗ്ടണ്: കോവിഡിന് ഹൈഡ്രോക്സിക്ളോറോക്വിന് മരുന്ന് ചോദിക്കുകയും തന്നില്ലെങ്കില് ഇന്ത്യയോട് പ്രതികാരം ചെയ്യുമെന്ന് ഭീഷണിപ്പെടുത്തിയ അമേരിക്കന് പ്രസിഡന്റ് ഡൊണാള്ഡ് ട്രംപിന്റെ സ്വരം മാറുന്നു. അമേരിക്കയിലേക്കുള്ള മരുന്നിന്റെ കയറ്റുമതി നിരോധനം എടുത്തുമാറ്റിയ ഇന്ത്യാക്കാര്ക്കും പ്രധാനമന്ത്രിയ്ക്കും എത്ര നന്ദി പറഞ്ഞിട്ടും ട്രംപിന് മതിയാകുന്നില്ല.
മരുന്നു നല്കിയത് മരിച്ചാലും മറക്കാത്ത കടപ്പാടുണ്ടെന്നായി മാറിയിരിക്കുകയാണ് ട്രംപിന്റെ പ്രതികരണം. ബ്രസീലിയന് പ്രസിഡന്റ് ബോള്സനാരോയും ഇന്ത്യന് പ്രധാനമന്ത്രിക്ക് നന്ദി പറഞ്ഞിട്ടുണ്ട്. തങ്ങള് ആവശ്യപ്പെട്ട ഹൈഡ്രോക്സിക്ളോറോക്വിന് നല്കാന് മനസ്സു കാണിച്ചതിന് ഇന്ത്യയ്ക്കും പ്രധാനമന്ത്രി നരേന്ദ്രമോഡിക്കും അമേരിക്കന് പ്രസിഡന്റ് നന്ദി പറഞ്ഞു. അസാധാരണ സമയത്ത് ഇന്ത്യ നല്കുന്ന സഹായം മറക്കാന് കഴിയാത്തതാണെന്ന് ട്രംപ് കുറിച്ചു. നരേന്ദ്രമോഡിയെ 'ഉഗ്രന്' എന്ന് വിശേഷിപ്പിച്ചാണ് ട്രംപിന്റെ ട്വീറ്റ്.
അമേരിക്കയില് കോവിഡ് വലിയ രീതിയില് പടരുന്ന സാഹചര്യത്തില് ഇന്ത്യയോട് ഹൈഡ്രോക്സിക്ളോറോക്വിന് ട്രംപ് ആവശ്യപ്പെട്ടിരുന്നു. ട്രംപിന്റെ ഫോണ്കോളിന്റെ പശ്ചാത്തലത്തില് ഇന്ത്യ അമേരിക്കയിലേക്ക് മരുന്ന് കയറ്റുമതി നിരോധനം എടുത്തു മാറ്റുകയും ചെയ്തിരുന്നു. ലോകത്ത് ഹൈഡ്രോക്സിക്ളോറോക്വിന്റെ ഏറ്റവും വലിയ ഉല്പാദകരായ ഇന്ത്യയില് ഗുജറാത്തിലെ മൂന്ന് കമ്പനികളാണ് അമേരിക്കയിലേക്ക് മരുന്ന് കയറ്റി അയയ്ക്കുന്നത്. ''രോഗം ശക്തമായി പടര്ന്ന് വലിയ പ്രതിസന്ധി സൃഷ്ടിക്കുന്ന സാഹചര്യത്തില് ഞങ്ങളുടെ ആവശ്യം പരിഗണിച്ച ഇന്ത്യയ്ക്കും പ്രധാനമന്ത്രി നരേന്ദ്രമോഡിക്കും നന്ദി പറയുന്നു. ഈ ഉപകാരം ഞങ്ങള് ഓര്മ്മിക്കും.'' ട്രംപ് ട്വീറ്റ് ചെയ്തു.
നേരത്തേ നരേന്ദ്രമോഡിയെയും അദ്ദേഹത്തിന്റെ നേതൃപാടവത്തെയും അഭിനന്ദിച്ച ട്രംപ് ദുരിതകാലത്താണ് സുഹൃത്തുക്കള് കൂടുതല് അടുപ്പത്തോടെയുള്ള സഹകരണം കാട്ടേണ്ടത് എന്നും നരേന്ദ്രമോഡിയുടെ നേതൃത്വം ഇന്ത്യയെ മാത്രമല്ല മനുഷ്യ സമൂഹത്തിന്റെ മുഴുവന് പോരാട്ടത്തിനുമാണ് സഹായകരമായതെന്നും ഇന്ത്യ നല്കിയ സഹായം മറക്കില്ലെന്നും ട്വീറ്റ് ചെയ്തു.
അമേരിക്കയില് ഇതുവരെ നാലരലക്ഷം പേരിലേക്കാണ് രോഗം പടര്ന്നിരിക്കുന്നത്. മരണനിരക്ക് ബുധനാഴ്ച വരെ 4,600 ആയി. ഹൈഡ്രോക്സിക്ളോറോക്വിന് കോവിഡ് ചികിത്സയില് കൂടുതല് ഗുണകരമാകുമെന്നാണ് യുഎസ് ഫുഡ് ആന്റ് ഡ്രഗ് അഡ്മിനിസ്ട്രേഷന്റെ വിലയിരുത്തല്. ഇതിനകം രോഗം പടര്ന്നു പിടിച്ചിരിക്കുന്ന ന്യൂയോര്ക്കിലെ 1500 രോഗികളില് പരീക്ഷിക്കുകയും ചെയ്തു. 30 ദശലക്ഷത്തിന് മുകളില് ഡോസുകള് വരുന്ന ഹൈഡ്രോക്സിക്ളോറോക്വിന് ആണ് ട്രംപ് വാങ്ങിയിരിക്കുന്നത്.
ഹൈഡ്രോക്സിക്ളോറോക്വിന്റെ 70 ശതമാനവും ഉല്പ്പാദിപ്പിക്കുന്നത് ഇന്ത്യയാണ്. മാസം തോറും 40 ടണ് ആണ് ഇന്ത്യയില് ഉല്പ്പാദിപ്പിക്കുന്നത്. 200 എംജിയുടെ 20 കോടി ഗുളികകളാണ് നിര്മ്മിക്കുന്നത്. അമേരിക്കയിലാണ് നിലവില് ഏറ്റവും കുടുതല് കോവിഡ് 19 രോഗികളുള്ളത്. 431,838 ആണ് അമേരിക്കയില് രോഗികള്. തൊട്ടുപിന്നില് 148,220 പേരുമായി സ്പെയിനും 139,422 പേരുമായി ഇറ്റലിയും നില്ക്കുന്നു.
അമേരിക്കന് പ്രസിഡന്റിന് പിന്നാലെ ബ്രസീലിയന് പ്രസിഡന്റ് ജെയ്ര് ബോള്സനോറോയും ഹൈഡ്രോക്സിക്ളോറോക്വിന് നല്കാന് തീരുമാനിച്ചതില് ഇന്ത്യന് പ്രധാനമന്ത്രിക്ക് നന്ദി പറഞ്ഞു. ഇന്ത്യയുടെ തീരുമാനം രാജ്യത്തെ മലേറിയ, ആര്ത്രൈറ്റിസ് രോഗികള്ക്കും ഗുണകരമാകുമെന്ന് ബോള്സനാറോ പറഞ്ഞു. തക്ക സമയത്ത് ബ്രസീലിലെ ജനങ്ങളെ സഹായിക്കാന് കൂട്ടാക്കിയ ഇന്ത്യയ്ക്കും നരേന്ദ്രമോഡിക്കും നന്ദി പറയുന്നതായിട്ടാണ് ബോള്സനാറോ പറഞ്ഞത്.
