തിരുവനന്തപുരം: സ്വര്ണക്കടത്ത് കേസില് വിവാദത്തിനു പിന്നാലെ കാണാതായ യു.എ.ഇ കോണ്സുലേറ്റ് ജനറലിന്റെ ഗണ്മാന് ജയഘോഷിനെ കണ്ടെത്തി. ഉച്ചയ്ക്ക് ഒരു മണിയോടെ വീടിനു സമീപമുള്ള കുറ്റിക്കാട്ടില് നിന്നും റോഡിലേക്ക് വീണ നിലയിലാണ് കണ്ടെത്തിയത്. കൈഞരമ്പ് മുറിച്ച് രക്തം വാര്ന്ന നിലയിലാണ് കണ്ടെത്തിയത്.
കൈഞരമ്പ് മുറിഞ്ഞിട്ട് അധിക സമയം ആയിട്ടില്ലെന്നാണ് പ്രാഥമിക കാഴ്ചയില് വ്യക്തമാകുന്നത്. താന് ബ്ലേഡ് വിഴുങ്ങിയെന്നും ആശുപത്രിയിലേക്ക് കൊണ്ടുപോകുന്ന വഴി ഇയാള് പോലീസിനോട് പറഞ്ഞതായും റിപ്പോര്ട്ടുണ്ട്.
റോഡിലൂടെ പോയ ബൈക്ക് യാത്രികന് ഒരാള് മതിലില് നിന്നു വീഴുന്നത് കണ്ട് നോക്കിയപ്പോഴാണ് ജയഘോഷാണെന്ന് തിരിച്ചറിഞ്ഞത്. സ്ഥലത്ത് പോലീസും ഡോഗ് സ്ക്വാഡും ജയഘോഷിനായി തെരച്ചില് നടത്തുന്നതിനിടെയാണ് റോഡില് കണ്ടെത്തുന്നത്.
താന് തെറ്റു ചെയ്തിട്ടില്ലെന്നൂം കള്ളക്കടത്തിന് കൂട്ടുനിന്നിട്ടില്ലെന്നും രാജ്യദ്രോഹകുറ്റം ചെയ്തിട്ടില്ലെന്നൂം ജയഘോഷ് ഈ സമയം വിളിച്ചുപറയുന്നുണ്ടായിരുന്നു. പോലീസ് ഉടന്തന്നെ അദ്ദേഹത്തെ ആശുപത്രിയിലേക്ക് കൊണ്ടുപോയി.
ഇന്നലെ വൈകിട്ട് ഏഴു മണിയോടെ സുഹൃത്തായ ഒരു പോലീസുകാരന് ഇദ്ദേഹത്തെ വിളിച്ചിരുന്നു. തുടര്ന്ന് പുറത്തേക്ക് പോയ ജയഘോഷിനെ കാണാതാവുകയായിരുന്നു. സ്വര്ണം പിടികൂടിയ ശേഷം സ്വപ്ന സുരേഷിനെ് പല തവണ ജയഘോഷും കോണ്സുലേറ്റ് അറ്റാഷെയും പലതവണ വിളിച്ചിരുന്നതായി കണ്ടെത്തിയിരുന്നു. അേന്വഷണം തന്നിലേക്ക് വരുമെന്ന് ഭയപ്പെട്ട ജയഘോഷ്, തന്നെ കുടുക്കാനാണെങ്കില് എന്താണെന്ന് ചെയ്യേണ്ടതെന്ന് അറിയാമെന്നും തോക്ക് നിറച്ചുവച്ചിട്ടുണ്ടെന്നും സഹപ്രവര്ത്തകരോട് പറഞ്ഞിരുന്നു. ഇതോടെ എ.ആര് ക്യാംപിലേക്ക് വിളിച്ചുവരുത്തിയ ശേഷം തോക്ക് തിരിച്ചുവാങ്ങിയിരുന്നു.
തുടര്ന്ന്, തറവാട് വീട്ടില് എത്തി അമ്മയെ കണ്ടശേഷമാണ് സ്വന്തം വീട്ടിലേക്ക പോയത്. വീടിനു പിന്നിലുടെ കായല് ഭാഗത്തേക്ക് ഇറങ്ങിയ ശേഷമാണ് ഈ കാട്ടിലേക്ക് കയറിയതെന്നാണ് കരുതുന്നത്. ഡോഗ് സ്ക്വാഡ് വീടിനു പിന്നിലുടെ ഓടി കുറച്ചദൂരം താഴേക്ക് പോയിട്ട് തിരിച്ചുപോരുകയായിരുന്നു.
സ്വര്ണക്കടത്തില് സംശയത്തിന്റെ മുള്മുനയിലാണ് യു.എ.ഇ കോണ്സുലേറ്റ് അറ്റാഷെ രാജ്യം വിട്ട വന്ന വാര്ത്ത കൂടി വന്നതോടെയാണ് ജയഘോഷ് ഏറെ സമ്മര്ദ്ദത്തിലായതെന്നും പറയപ്പെടുന്നു.
