മുംബൈ: അയോദ്ധ്യയില് ഉയരാനിരിക്കുന്ന രാമക്ഷേത്രത്തിന്റെ ഭൂമിപൂജയെ അഭിനന്ദിച്ച് പോസ്റ്റ് ഇട്ടതിന് തനിക്ക് ബലാത്സംഗ, വധ ഭീഷണികള് നേരിടേണ്ടി വരുന്നെന്ന് ഇന്ത്യന് ബൗളര് മുഹമ്മദ് ഷമിയുടെ മുന് ഭാര്യയും വിവാദ നായികയുമായ ഹസീന് ജഹാന്. വധഭീഷണിയുടെ സ്ക്രീന് ഷോട്ട് ഉള്പ്പെടെ എടുത്ത് പോലീസില് പരാതി നല്കിയിട്ടുണ്ടെന്ന് ഇവര് വ്യക്തമാക്കുന്നു. ഹസീന് തന്നെയാണ് വിവരം സാമൂഹ്യ മാധ്യമങ്ങളിലൂടെ അറിയിച്ചത്. പോലീസിന്റെ സൈബര്ക്രൈമിന് വിവരം കൈമാറി.
കഴിഞ്ഞ ദിവസം രാമക്ഷേത്ര നിര്മ്മാണത്തിന് തുടക്കമിട്ടതിന് പിന്നാലെ ' അയോദ്ധ്യയിലെ രാമക്ഷേത്രത്തിനുള്ള ഭൂമി പൂജയില് എല്ലാ ഹിന്ദു സഹോദരങ്ങള്ക്കും അഭിനന്ദനം' എന്ന ക്ഷേത്രത്തിന്റെയും ശ്രീരാമന്റെയും ചിത്രങ്ങളോടെ ജഹാന് പോസ്റ്റ് ഇട്ടിരുന്നു. ഇതിന് പിന്നാലെയാണ് ഭീഷണിയുമായി ചിലര് എത്തിയത്. ഇതില് ഹസീബ് ഖാന് എന്നയാള് ജഹാനെ ബലാത്സംഗത്തിന് ഇരയാക്കുമെന്ന് ഭീഷണിപ്പെടുത്തിയപ്പോള് മറ്റ് ചിലര് കൊലപ്പെടുത്തുമെന്നാണ് ഭീഷണി മുഴക്കിയിരിക്കുന്നത്. അതേസമയം ഇത്തരം പ്രതികരണങ്ങള് നിര്ഭാഗ്യകരമാണെന്നും കുറ്റക്കാര് ശിക്ഷിക്കപ്പെടുമെന്നാണ് കരുതുന്നതെന്നുമാണ് ഹസീന് ജഹാന്റെ പ്രതികരണം.
ഒരേ ആളുകള് നിരന്തരം ബലാത്സംഗ, വധഭീഷണി ഉയര്ത്തുന്നു. ഇന്സ്റ്റാഗ്രാം, ട്വിറ്റര്, ഫേസ്ബുക്ക് എന്നിവയിലൂടെയെല്ലാം ഭീഷണി ഉയരുന്ന സാഹചര്യത്തില് ഞാന് നിസ്സഹായയായി പോകുന്നു. പെണ്മക്കളുടെ സുരക്ഷിതത്വവും ആശങ്കപ്പെടുത്തുന്നു. തന്നെയും തന്റെ കുടുംബത്തെയും ഇത് ബാധിക്കുന്നുണ്ട്. ഓരോ നിമിഷവും ദു:സ്വപ്നമായി മാറുകയാണ്. കുറ്റവാളികളെ എത്രയും വേഗം പിടിക്കണമെന്നും ജഹാന് ആവശ്യപ്പെടുന്നു. ഇന്ത്യന് ബൗളര് മുഹമ്മദ് ഷമിയുടെ ആദ്യ ഭാര്യയാണ് ഹസീന് ജഹാന്.
