നടന് ദുല്ഖര് സല്മാന് നിര്മ്മിക്കുന്ന 'മണിയറയിലെ അശോകന്' റിലീസിന് തയ്യാറെടുക്കുകയാണ്. ചിത്രത്തിലെ ഏറ്റവും പുതിയ ഗാനം ഇപ്പോള് പുറത്ത് വന്നിരിക്കുകയാണ്. പെയ്യും നിലാവ് എന്നു തുടങ്ങുന്ന റൊമാന്റിക് ഗാനമാണ് പുറത്ത് വിട്ടിരിക്കുന്നത്. അനശ്വരയും ഗ്രിഗറിയുമാണ് ഗാനത്തിലുള്ളത്. ഇരുവരുടേയും മനോഹരമായ പ്രണയമാണ് ഗാനത്തില് അവതരിപ്പിക്കുന്നത്. നാട്ടിന് പുറത്തിന്റെ ഭംഗിയും ഇരുവര്ക്കുമിടയിലെ പ്രണയത്തിന്റെ സൗന്ദര്യവുമെല്ലാം പാട്ടിലൂടെ വരച്ചിടുകയാണ്.
ദുല്ഖറും ഗ്രിഗറിയും ചേര്ന്ന് നിർമ്മിക്കുന്ന ചിത്രം സംവിധാനം ചെയ്യുന്നത് നവാഗതനായ ഷംസു സൈബയാണ്. നാട്ടിൻപുറത്തുകാരനായ അശോകന്റെ പ്രണയവും വിവാഹവും ആദ്യരാത്രിയുമൊക്കെയാണ് പേരു സൂചിപ്പിക്കുന്നത് പോലെ തന്നെ സിനിമയുടെ ഇതിവൃത്തം. ശ്യാമ എന്ന കഥാപാത്രത്തെയാണ് അനുപമ അവതരിപ്പിക്കുന്നത്.
മഗേഷ് ബോജിയുടെ കഥയെ ആസ്പദമാക്കി വിനീത് കൃഷ്ണനാണ് 'മണിയറയിലെ അശോക'ന് തിരക്കഥ ഒരുക്കിയിരിക്കുന്നത്. സജാദ് കാക്കു ഛായാഗ്രഹണം നിർവ്വഹിക്കുമ്പോൾ സംസ്ഥാന അവാര്ഡ് ജേതാവായ അപ്പു എന് ഭട്ടതിരിയാണ് ചിത്രസംയോജനം നിർവ്വഹിക്കുന്നത്. സംഗീതം നിർവ്വഹിച്ചിരിക്കുന്നത് ശ്രീഹരി കെ നായരാണ്.
സുധീഷ്, ശ്രീലക്ഷ്മി, നയന, വിജയരാഘവൻ, ഇന്ദ്രൻസ്, ശ്രിത ശിവദാസ് എന്നിവരാണ് ചിത്രത്തിലെ മറ്റു അഭിനേതാക്കളായി എത്തുന്നത്. ചിത്രത്തിനായി ദുൽഖർ ആലപിച്ച 'മൊഞ്ചത്തിപ്പെണ്ണേ ഉണ്ണിമായേ....' എന്ന് തുടങ്ങുന്ന ഗാനം ദുൽഖറിൻ്റെ പിറന്നാൾ ദിനത്തിൽ പുറത്തു വിട്ടിരുന്നു. ഈ ഗാനം ആരാധകർ സ്വീകരിച്ചത് ഇരുകൈയ്യും നീട്ടിയായിരുന്നു.
