കോട്ടയം: നഗരമധ്യത്തിലെ അപ്പാര്ട്ട്മെന്റില് സ്വര്ണ വ്യാപാരിയെ എത്തിച്ച് കെണിയൊരുക്കിയ കേസില് ഫോട്ടോ എടുക്കാന് വ്യാപാരിയ്ക്കൊപ്പം നിന്ന സ്ത്രീയെ കണ്ടെത്താന് പോലീസ് അന്വേഷണം ഊര്ജിതമാക്കി. കേസിലെ പ്രധാന പ്രതിയായ ഗുണ്ടാ നേതാവിനെ ലഭിച്ചെങ്കില് മാത്രമേ ഇവരെ കണ്ടെത്താനാകൂ.
കേസില് അറസ്റ്റിലായ രണ്ടു പ്രതികളെ പോലീസ് ചോദ്യം ചെയ്തെങ്കിലും കെണിയൊരുക്കാന് എത്തിയ സ്ത്രീയെപ്പറ്റി പൊലീസിനു കൃത്യമായ സൂചനകള് ലഭിച്ചിട്ടില്ല. ഈ സാഹചര്യത്തിലാണ് പോലീസ് സംഘം ഗുണ്ടാ സംഘത്തിനു പിന്നാലെ തിരിഞ്ഞിരിക്കുന്നത്.
നഗരത്തിലെ കുപ്രസിദ്ധ ഗുണ്ടയുടെ രണ്ടാം ഭാര്യയ്ക്കു പെണ്കെണി ഒരുക്കിയതില് പങ്കുണ്ടെന്ന സൂചനകളുടെ അടിസ്ഥാനത്തില് പൊലീസ് സംഘം കഴിഞ്ഞ ദിവസം ഇവരെ വിളിച്ചു വരുത്തി ചോദ്യം ചെയ്തിരുന്നു. ചങ്ങനാശേരി സ്വദേശിയായ ഈ യുവതിയെ ചോദ്യം ചെയ്തെങ്കിലും ഇവര് അന്വേഷണവുമായി സഹകരിക്കുന്നില്ല.
ജില്ലയിലെ ചീട്ടുകളി ബ്ലേഡ് മാഫിയ സംഘത്തിനു ഈ ഹണി ട്രാപ്പുമായി ബന്ധമുണ്ടെന്നാണ് പോലീസ് സംശയിക്കുന്നത്. ചീട്ടുകളി കളങ്ങളില് എത്തുന്ന ഉന്നതന്മാരെയും രാഷ്ട്രീയക്കാരെയും ബ്ലേഡുകാരെയും വ്യവസായികളെയുമാണ് സംഘം കെണിയില്പ്പെടുത്തിയിരുന്നത്. ഇത്തരത്തില് കൂടുതല് ആളുകള് ഹണിട്രാപ്പില് കുടുങ്ങായതായും പോലീസ് സംശയിക്കുന്നുണ്ട്.
ഇതുവരെ പ്രതികളുടെ പട്ടികയില് 12 ഓളം ആളുകള് കുടുങ്ങിയിട്ടുണ്ടെന്ന സൂചനയാണ് ലഭിക്കുന്നത്. രണ്ടു മുതല് അഞ്ചു ലക്ഷം രൂപ വരെ പലര്ക്കും നഷ്ടമായിട്ടുണ്ട്. ഈ തുക ഗുണ്ടാ സംഘങ്ങള് വീതം വയ്ക്കുകയാണോ, ഇതിനു പിന്നില് മറ്റാരെങ്കിലും ഉണ്ടോ എന്നും പൊലീസ് അന്വേഷിക്കുന്നുണ്ട്. നിലവിലെ സാഹചര്യത്തില് ഗുണ്ടാ സംഘത്തെ കുടുക്കുന്നതിനു വിശദമായ അന്വേഷണം വേണ്ടി വരും.
ഹണിട്രാപ്പ് സംഘത്തിനു പെണ്വാണിഭ മാഫിയയുമായി ബന്ധമുണ്ടോ എന്നും പൊലീസ് പരിശോധിക്കുന്നു. ജില്ലയുടെ വിവിധ സ്ഥലങ്ങളില് നിന്നും സ്ത്രീകളെ എത്തിച്ചാണ് സംഘം കെണി ഒരുക്കിയിരുന്നതെന്നാണ് സൂചന.
ഇത്തരത്തില് കെണിയൊരുക്കുന്നതിനു സ്ത്രീകളെ എത്തിച്ചത് പെണ്വാണിഭ സംഘത്തില് നിന്നാണെന്ന സംശയമാണ് ഉയരുന്നത്. നിലവില് കേസില് പിടികൂടാനുള്ള പ്രതികളെല്ലാവരും കഞ്ചാവ് ബ്ലേഡ് ചീട്ടുകളി മാഫിയ സംഘാംഗങ്ങളാണ്. ഇവര്ക്കു വേണ്ടി ഉന്നതന്മാര് അര്ക്കം ഇടപെടുന്നുണ്ടെന്നാണ് സൂചന. ഈ സാഹചര്യത്തില് എത്രയും വേഗം എല്ലാ പ്രതികളെയും കുടുക്കാന് പോലീസ് നടപടികള് ആരംഭിച്ചിട്ടുണ്ട്.
