മഴക്കാലത്തും മഞ്ഞുകാലത്തും കഫക്കെട്ട് ഉണ്ടാകുന്നു. കഫക്കെട്ടും ബുദ്ധിമുട്ടുകളും മാറാന്‍ ആയുര്‍വേദ മരുന്നുകളുണ്ടോ?

''ചുക്ക്, ഇഞ്ചി, ജീരകം, ദാഹശമനി പൊടി, തുളസിയില, പനിക്കൂര്‍ക്കയില ഇവയിട്ട് തിളപ്പിച്ച വെള്ളം ദിവസം ഒന്നര ലിറ്റര്‍ എങ്കിലും കുടിക്കണം''

എനിക്ക് 67 വയസ്. കഫക്കെട്ടാണ് എന്റെ പ്രശ്‌നം. മഴക്കാലത്തും മഞ്ഞുകാലത്തും വല്ലാത്ത കഫക്കെട്ട് ഉണ്ടാകുന്നു. ഇതുമൂലം ശ്വാസതടസവും ചുമയും പതിവാണ്. കഫക്കെട്ട് കൂടുമ്പോള്‍ ഉപ്പിട്ട് ആവി പിടിക്കാറുണ്ട്. അങ്ങനെ ചെയ്യുമ്പോള്‍ കുറച്ചു നേരത്തേക്ക് ചെറിയ ആശ്വാസം ലഭിക്കുന്നു. കഫക്കെട്ടും ബുദ്ധിമുട്ടുകളും മാറാന്‍ ആയുര്‍വേദ മരുന്നുകളുണ്ടോ?

..... ദേവരാജ് , കൊല്ലം

കഫ വര്‍ധകങ്ങളായ ആഹാരങ്ങള്‍ ഒഴിവാക്കുകയാണ് കഫക്കെട്ട് മാറാന്‍ ആദ്യം ചെയ്യേണ്ടത്. ചായയുടെ ഉപയോഗം കുറയ്ക്കുക, തൈര്, വറുത്ത ആഹാരങ്ങള്‍, കിഴങ്ങുവര്‍ഗങ്ങള്‍ ഇവ കുറയ്ക്കണം. രാവിലെ മാത്രം തലയില്‍ അല്‍പം എണ്ണ പുരട്ടി ഉടനേ കുളിക്കുക. വൈകിട്ട് ദേഹം കഴുകിയാല്‍ മതി. ചുക്ക്, ഇഞ്ചി, ജീരകം, ദാഹശമനി പൊടി, തുളസിയില, പനിക്കൂര്‍ക്കയില ഇവയിട്ട് തിളപ്പിച്ച വെള്ളം ദിവസം ഒന്നര ലിറ്റര്‍ എങ്കിലും കുടിക്കണം. അത്താഴം അളവു കുറച്ച്, നേരത്തെ കഴിക്കണം.

ചോറ് ഒരു നേരം കഴിക്കുക. ദശമൂല കടൂത്രയം കഷായം, ഇന്ദുകാന്തം കഷായം ചേര്‍ത്ത് 2 നേരം ആഹാരത്തിന് മുന്‍പ് സേവിക്കുക. അഗസ്ത്യ രസായനം, വ്യോഷാദി വടകം, Allergin Granules ചേര്‍ത്ത് യോജിപ്പിച്ച് പലവട്ടം സേവിക്കുക. Surpress syrup 2 ടീസ്പൂണ്‍ 3 നേരം സേവിക്കുക.

എന്റെ മകള്‍ക്കു വേണ്ടിയാണ് കത്ത്. 12 വയസ്. ആറുമാസം മുമ്പാണ് കുട്ടിക്ക് ആദ്യമായി മാസമുറയുണ്ടായത്. തുടക്കത്തില്‍ രണ്ടുമാസം കൃത്യമായിരുന്നുവെങ്കിലും പിന്നീട് 15 ദിവസം കൂടുമ്പോള്‍ മാസമുറയാകുന്നു. എന്തുകൊണ്ടാണിത്. മാസമുറ ശരിയാകാന്‍ എന്താണ് മാര്‍ഗം?

.... ശരണ്യ പ്രവീണ്‍ , കൊച്ചി

കുട്ടി ആഹാരം നന്നായി കഴിക്കുന്നു എന്ന് ഉറപ്പുവരുത്തണം. തുടക്കത്തിലെ ആയതുകൊണ്ട് പ്രശ്‌നം പരിഹരിക്കാവുന്നതേയുള്ളൂ. തിളപ്പിച്ചാറിയ വെള്ളം ധാരാളം കുടിക്കുക. എരിവ്,പുളി, ഉപ്പ് ഇവ ആഹാരത്തില്‍ കുറയ്ക്കണം. ഹോര്‍മോണ്‍ വ്യതിയാനമാണ് ഇതിന്റെ പ്രധാന കാരണം.

അശോകാരിഷ്ടം, കുമാര്യാസവം, Femitone Syrup ചേര്‍ത്ത് 3 നേരം സേവിക്കണം. സുകുമാരം കഷായം ടാബ്‌ലറ്റ് 2-0-2 രണ്ട് നേരം ആഹാരത്തിന് മുന്‍പ് സേവിക്കണം.

ശരീരത്തില്‍ വിളര്‍ച്ചയുണ്ടെങ്കില്‍ Hematone Syrup 3 ടീസ്പൂണ്‍ 2 നേരം ആഹാരശേഷം ഉപയോഗിക്കുക. 2 മാസം മരുന്നുകള്‍ സേവിക്കണം. ഒരു ആയുര്‍വേദ ഡോക്ടറെ നേരില്‍ കണ്ട് പരിശോധന നടത്തി മരുന്നുകള്‍ കഴിക്കുന്നതയാണ് ഉചിതം.

കണ്‍സള്‍ട്ടന്റ് ഫിസിഷന്‍

നാഗാര്‍ജുന ആയുര്‍വേദ, തൊടുപുഴ.