മെല്ബണ്: ഓസ്ട്രേലിയയ്ക്കെതിരേയുളള ക്രിക്കറ്റ് പരമ്പരയിലെ രണ്ടാം ടെസ്റ്റില് ആദ്യ ദിനം കളി നിര്ത്തുമ്പോള് ഇന്ത്യയ്ക്ക് മേല്ക്കൈ. ആതിഥേയരായ ഓസ്ട്രേലിയയുടെ ഒന്നാം ഇന്നിംഗ്സ് 195 ല് അവസാനിപ്പിച്ച് ബാറ്റിംഗ് തുടങ്ങിയ ഇന്ത്യ ഒരു വിക്കറ്റ് നഷ്ടത്തില് 36 റണ്സ് എടുത്ത നിലയിലാണ്. ഒന്നാം ദിവസം കളി നിര്ത്തുമ്പോള് 11 ഓവര് പൂര്ത്തിയാക്കി മടങ്ങുമ്പോള് ഓപ്പണര് ശുഭ്മാന് ഗില് 28 റണ്സുമായും ചേതേശ്വര് പൂജാര ഏഴു റണ്സുമായും നില്ക്കുകയാണ്.
നേരത്തേ ഓപ്പണര് മായങ്ക് അഗര്വാളിനെ പൂജ്യത്തിന് വിക്കറ്റിന് മുന്നില് സ്റ്റാര്ക്ക് കുരുക്കിയിരുന്നു. ഓസ്ട്രേലിയയുടെ ഒന്നാം ഇന്നിംഗ്സ് 195 റണ്സിന് അവസാനിച്ചിരുന്നു. 48 റണ്സ് എടുത്ത മാര്നസ് ലാബുസ്ചാഗ്നേയാണ് അവരുടെ ഇന്നിംഗ്സിലെ ടോപ് സ്കോറര്. 30 റണ്സ് എടുത്ത മാത്യൂവേഡ്, 38 റണ്സിന് പുറത്തായ ട്രാവിസ് ഹെഡ്, 12 റണ്സ് എടുത്ത കാമറൂണ് ഗ്രീന്, 13 റണ്സ് എടുത്ത ടിം പെയ്ന്, 20 റണ്സ് എടുത്ത നതാന് ലിയോണ് എന്നിവരാണ് രണ്ടക്കം കണ്ട മറ്റുള്ളവര്. ഓപ്പണര് ജോയി ബേണ്സും സ്മിത്തും പൂജ്യത്തിന് പുറത്തായി.
പാറ്റ് കുമ്മിസ് ഒമ്പത്, മൈക്കല് സ്റ്റാര്ക്ക് ഏഴ്, ജോസ് ഹസല്വുഡ് നാല് എന്നിങ്ങനെയാണ് മറ്റുള്ളവരുടെ സ്കോര്. നാലുവിക്കറ്റ് എടുത്ത ജസ്പീത് ബുമ്രയും മൂന്ന് വിക്കറ്റ് വീഴ്ത്തിയ അശ്വിനുമാണ് ഓസീസിനെ പിടിച്ചു കെട്ടിയത്.
ഓപ്പണര് ജോയിസ് ബേണ്സ്, ട്രാവിസ് ഹെഡ് എന്നീ അപകടകാരികളെ ബുമ്ര പറഞ്ഞുവിട്ടപ്പോള് അശ്വിന് മുന്നില് നായകന് സ്റ്റീവന് സ്മിത്ത് വീണ്ടും ചുവടുകളിടറി. പൂജാരയുടെ മനോഹരമായ ക്യാച്ച് സ്റ്റീവന് സ്മിത്തിന്റെ വിധിയെഴുതി. ടിംപെയ്നെയും പറഞ്ഞുവിട്ടത് അശ്വിനായിരുന്നു. ബോക്സിംഗ് ഡേ ടെസ്റ്റില് അരങ്ങേറ്റം നടത്തിയ മുഹമ്മദ സിറാജും മികച്ച പ്രകടനമാണ് കാട്ടിയത്. വണ്ഡൗണായി ഇറങ്ങിയ മാര്നെസിനെ ശുഭ്മാന് ഗില്ലിന്റെ കയ്യിലെത്തിച്ച സിറാജ് മദ്ധ്യനിരയിലെ കാമറൂണ് ഗ്രീനെയും അധികം പിടിച്ചു നില്ക്കാന് അവസരം കൊടുക്കാതെ പറഞ്ഞു വിട്ടു. ടെസ്റ്റ് പരമ്പരയിലെ ആദ്യ മത്സരത്തില് ഇന്ത്യ തോറ്റിരുന്നു. വിരാട് കോഹ്ലി നാട്ടിലേക്ക് മടങ്ങിയ സാഹചര്യത്തില് അജിങ്ക്യാരഹാനേയാണ് ടീമിനെ നയിക്കുന്നത്.
