തിരുവനന്തപുരം: പ്രവാസികള്ക്കും വിദേശത്ത് അവരോടൊപ്പം താമസിക്കുന്ന കുടുംബാംഗങ്ങള്ക്കുമായി നോര്ക്ക റൂട്ട്സ് ആരോഗ്യ ഇന്ഷുറന്സ് ഏര്പ്പെടുത്തുന്നു. 'പ്രവാസിരക്ഷ ഇന്ഷുറന്സ് പോളിസി' എന്ന പേരില് സംസ്ഥാന സര്ക്കാര് നടപ്പാക്കുന്ന പദ്ധതിയാണിത്. പതിനെട്ടിനും അറുപതിനും ഇടയില് പ്രായമുള്ള പ്രവാസികള്ക്കും അവരോടൊപ്പം വിദേശത്ത് കഴിയുന്നവര്ക്കും പദ്ധതിയുടെ പരിരക്ഷ ലഭിക്കും. ന്യൂ ഇന്ത്യ അഷ്വറന്സ് കമ്പനിയുമായി ചേര്ന്നാണ് പദ്ധതി നടപ്പാക്കുന്നത്.
നോര്ക്ക റൂട്സിന്റെ www.norkaroots.org എന്ന വെബ്സൈറ്റിലെ സര്വീസ് വിഭാഗത്തില് പ്രവാസി ഐഡി കാര്ഡ് സെക്ഷനില് നിന്നും ഈ പദ്ധതിയില് ഓണ്ലൈനായി ചേരാം. ഫീസും ഓണ്ലൈനായി അടയ്ക്കാം. വിശദ വിവരങ്ങള് നോര്ക്ക റൂട്ട്സ് വെബ്സൈറ്റിലും norka.raksha@gmail.com എന്ന ഇമെയില് വഴിയും ലഭിക്കും. 91-417-2770543, 91-471-2770528 എന്നീ ഫോണ് നമ്പറുകളിലും 18004253939, 00918802012345 (വിദേശത്തു നിന്നും മിസ്ഡ് കാള് സേവനം) എന്നീ ടോള്ഫ്രീ നമ്പറുകളിലും വിവരങ്ങള് ലഭിക്കും.
പ്രവാസി സമൂഹത്തിന്റെ ആരോഗ്യ സംരക്ഷണം ഉറപ്പാക്കുന്ന പദ്ധതിയാണിതെന്ന് മുഖ്യമന്ത്രി പിണറായി വിജയന് പറഞ്ഞു. പ്രവാസി സമൂഹത്തിന്റെ ക്ഷേമത്തിന് വേണ്ടി സര്ക്കാര് വിവിധ പദ്ധതികളാണ് നടപ്പാക്കിവരുന്നത്. പ്രവാസിരക്ഷ ഇന്ഷുറന്സിന്റെ പ്രയോജനം എല്ലാ പ്രവാസികളും പ്രയോജനപ്പെടുത്തണമെന്നും അദ്ദേഹം കൂട്ടിച്ചേര്ത്തു.
