കൊല്ക്കത്ത: ബംഗാളില് ഭരണം നില നിര്ത്താന് ശക്തമായ പോരിനൊരുങ്ങുന്ന മമതാ ബാനര്ജി തൃണമൂല് കോണ്ഗ്രസിന്റെ 294 സ്ഥാനാര്ത്ഥികളെ നാളെ പ്രഖ്യാപിക്കും. ബിജെപിയുടെ കളത്തിലേക്ക് ചാടിയ തന്റെ പഴയ വലംകൈ സുവേന്ദു അധികാരിയ്ക്കെതിരേ നന്ദിഗ്രാമില് മമത മത്സരിച്ചേക്കുമെന്നാണ് വിവരം. മാര്ച്ച് 11 ന് ഇവിടെ നാമനിര്ദേശ പത്രിക സമര്പ്പിക്കുമെന്നാണ് വിവരം.
ബംഗാള് ബിജെപി തെരഞ്ഞെടുപ്പ് പാനല് ഷോര്ട്ട്ലിസ്റ്റ് ചെയ്യപ്പെട്ടിട്ടുള്ള പട്ടികയില് നന്ദിഗ്രാമില് സുവേന്ദു അധികാരിയുടെ പേരാണ് നല്കിയിട്ടുള്ളത്. ഏപ്രില് 1 ന് നടക്കുന്ന രണ്ടാംഘട്ട തെരഞ്ഞെടുപ്പിലാണ് നന്ദിഗ്രാം വരുന്നത്. നന്ദിഗ്രാമില് താന് മമതയെ നേരിടുമെന്നും പരാജയപ്പെടുത്തുമെന്നും നേരത്തേ തന്നെ സുവേന്ദു അധികാരി പ്രഖ്യാപിച്ചു കഴിഞ്ഞിരിക്കുകയാണ്. ഖരക്പൂര് ചംഗ്വാളില് ബുധനാഴ്ച നടന്ന ബിജെപി റാലിയില് പങ്കെടുത്തു സംസാരിക്കുമ്പോഴാണ് താന് മമതയെ നേരിട്ടു പരാജയപ്പെടുത്തുമെന്ന് സുവേന്ദു പ്രഖ്യാപിച്ചത്.
തൃണമൂല് കോണ്ഗ്രസിന്റെ രണ്ടാം മന്ത്രിസഭയില് മമതാ ബാനര്ജിക്ക് കീഴില് ഗാഗതമന്ത്രിയായിരിക്കെയാണ് മന്ത്രിസ്ഥാനവും പാര്ട്ടി പ്രാഥമികാംഗത്വവും രാജിവെച്ച് സുവേന്ദു അധികാരി ബിജെപിയില് ചേക്കേറിയത്. 2020 ഡിസംബറില് കേന്ദ്ര ആഭ്യന്തരമന്ത്രി അമിത്ഷായുടെ സാന്നിദ്ധ്യത്തിലാണ് ബിജെപിയില് എത്തിയത്. കോണ്ഗ്രസിലൂടെ രാഷ്ട്രീയ പ്രവര്ത്തനം തുടങ്ങിയ സുവേന്ദു 2007 ല് നന്ദിഗ്രാം ഭൂപ്രശ്നവുമായി ബന്ധപ്പെട്ടാണ് മമതാബാനര്ജിക്കൊപ്പം ബംഗാള് രാഷ്ട്രീയത്തിന്റെ കേന്ദ്രബിന്ദുവിലേക്ക് വന്നത്.
2009 ലെ ലോക്സഭാ തെരഞ്ഞെടുപ്പില് താംലൂക് മണ്ഡലത്തില് സിപിഎമ്മിന്റെ കരുത്തന് ലക്ഷ്മണ് സേത്തിനെ 1,72,958 വോട്ടുകള്ക്ക് പരാജയപ്പെടുത്തി ശ്രദ്ധ നേടിയയാളാണ് സുവേന്ദു അധികാരി. 2016 ല് നടന്ന നിയമസഭാ തെരഞ്ഞെടുപ്പില് നന്ദിഗ്രാമില് ഇടതുപക്ഷവും കോണ്ഗ്രസും ഒന്നിച്ച സഖ്യത്തിലെ അബ്ദുള് ഖാദിര് ഷെയ്ഖിനെയും തോല്പ്പിച്ചു.
വെള്ളിയാഴ്ച കളിഘട്ടിലെ വീട്ടിലാണ് മമത സ്ഥാനാര്ത്ഥികളെ പ്രഖ്യാപിക്കുക. മാര്ച്ച് 7 ന് നരേന്ദ്രമോഡി ബിജെപി റാലിയില് ബ്രിഗേഡില് പങ്കെടുക്കാനെത്തുമ്പോള് അന്നു തന്നെ മമത റോഡ്ഷോയോടെ സിലിഗുരിയില് പ്രചരണം നടത്തും. മമതാബാനര്ജി തന്നെയാണ് ഇത്തവണയും തൃണമൂലിന്റെ പ്രചരണ പരിപാടികള്ക്ക് നേതൃത്വം നല്കുക. ദേശീയ നേതാക്കള് അടക്കമെത്തി ബിജെപി നടത്തുന്ന പ്രചരണത്തെ മമത നേരിടുമെന്നും തൃണമൂലിന്റെ അമിതാഭ് ബച്ചനാണ് മമതയെന്നുമാണ് മന്ത്രി ബ്രാത്യാ ബസു പ്രതികരിച്ചിരിക്കുന്നത്. ബിജെപി രണ്ടു ഘട്ടത്തിലേക്കുള്ള 60 സ്ഥാനാര്ത്ഥികളുടെ പട്ടിക ഡല്ഹിയില് വ്യാഴാഴ്ച ചേരുന്ന യോഗത്തിന് പിന്നാലെ പ്രഖ്യാപിക്കും. ബംഗാള് ബിജെപി പ്രസിഡന്റ് ദിലീപ് ഘോഷും സുവേന്ദു അധികാരിയും മുകുള്റോയിയുമെല്ലാം യോഗത്തില് പങ്കെടുക്കുന്നുണ്ട്.
അതേസമയം കോണ്ഗ്രസും ഇടതുപക്ഷവും ഐഎസ്എഫും കൈ കോര്ക്കുന്ന സംയുക്ത മോര്ച്ച ഇതുവരെ പട്ടിക പൂര്ത്തിയാക്കിയിട്ടില്ല. നഗരത്തില് അഞ്ച് സീറ്റുകള് വീതം ഇടതുപക്ഷവും കോണ്ഗ്രസും ഒരെണ്ണം ഐഎസഎഫ് എന്നും മാത്രമാണ് സൂചനകള്. സിപിഎം പോളിറ്റ് ബ്യൂറോ അംഗം മൊഹമ്മദ് സലീം ഹൂഗ്ളിയിലെ ചാന്ദിട്ടാലയില് നിന്നും അശോക് ഭട്ടചാര്യ സിലിഗുരിയില് നിന്നും സുജന് ചബ്രര്ത്തി യാദവ് പൂരില് നിന്നും മത്സരിക്കുമെന്ന് മാത്രമാണ് ഇടതുപക്ഷത്ത് നിന്നും കേള്ക്കുന്ന വാര്ത്തകള്.
