ഗാനരചയിതാവ്, നിര്മാതാവ്, അഭിനേതാവ് എന്നീ നിലകളില് പ്രശസ്തനാണ് ജസ്റ്റിന് ബീബര്. 2010-ലെയും 2012-ലെയും അമേരിക്കന് സംഗീത പുരസ്കാരം ഉള്പ്പെടെ നിരവധി പുരസ്കാരങ്ങള് നേടിയിട്ടുള്ള ഇദ്ദേഹത്തിന്റെ ആരാധകവൃന്ദം'ബിലി ബേര്സ്' എന്നറിയപ്പെടുന്ന മധ്യ-കൗമാര പെണ്കുട്ടികളാണ്. 2018ല് ആണ് ജസ്റ്റിനും ഹെയ്ലി ബാള്ഡ്വിനും വിവാഹിതരായത്. ജസ്റ്റിനുമായുള്ള വിവാഹ ജീവിതത്തെ കുറിച്ചുള്ള ഹെയ്ലിയുടെ തുറന്നു പറച്ചിലാണ് ശ്രദ്ധേയമാകുന്നത്. ഒരു മാഗസിനു നല്കിയ അഭിമുഖത്തിലാണ് ഹെയ്ലി വിവാഹജീവിതത്തെക്കുറിച്ചു മനസ്സു തുറന്നത്.
'' എനിക്ക് 22 വയസ്സ് ആകുന്നതിനു കൃത്യം 2 മാസം മുമ്പായിരുന്നു ഞങ്ങളുടെ വിവാഹം. ഞങ്ങള് നന്നേ ചെറു പ്രായത്തില് ആയിരുന്നു. അതിന്റെ പേരില് സൈബര് ആക്രമണങ്ങളും നേരിടേണ്ടി വന്നിട്ടുണ്ട്. എന്റെ മാതാപിതാക്കള് 19-ാം വയസ്സിലാണ് കണ്ടുമുട്ടിയതും പ്രണയിച്ചതും വിവാഹിതരായതും. അവരുടെ ആദ്യ കൂടിക്കാഴ്ച മുതലുള്ള സംഭവങ്ങള് ഓരോന്നും കുട്ടിക്കാലം മുതല് ഞാന് കേള്ക്കാറുണ്ട്. അതൊക്കെ എന്നെയും സ്വാധീനിച്ചിട്ടുണ്ടാകാം. അതുകൊണ്ടായിരിക്കാം ഞാനും ചെറുപ്രായത്തില്ത്തന്നെ വിവാഹം കഴിച്ചത്.
വിവാഹ ശേഷം ജസ്റ്റിനില് നിന്നു ഞാന് ഒരുപാട് കാര്യങ്ങള് പഠിച്ചു. അതിലുപരി എന്നെക്കുറിച്ച് ഒരുപാട് മനസ്സിലാക്കി. ഞങ്ങള് രണ്ടു പേരും ഞങ്ങള്ക്കിഷ്ടമുള്ളതൊക്കെ ചെയ്യുന്നു. ഞങ്ങള്ക്ക് എന്തൊക്കെയാണോ ആവശ്യം അതൊക്കെ നേടുന്നു. ഇടയ്ക്കൊക്കെ ചില വഴക്കുകളും പിണക്കങ്ങളും അഭിപ്രായവ്യത്യാസങ്ങളും ഉണ്ടാകാറുണ്ട്. പക്ഷേ അതൊന്നും അധികം നീണ്ടു പോകില്ല. കാരണം, ഞാന് അവനെ ഒരുപാട് സ്നേഹിക്കുന്നു. എനിക്കെന്നും അവനൊപ്പം ജീവിക്കണം.
സിനിമാ രംഗത്തും സംഗീതരംഗത്തും മറ്റേതു മേഖലയിലും ബന്ധങ്ങള് തകരാന് ഒരുപാട് സാധ്യതകള് ഉണ്ട്. പക്ഷേ പൊതുസമൂഹം അതിനെ എന്തിനാണ് തെറ്റായിക്കാണുന്നത്. ഞങ്ങള് രണ്ടുപേരും ഞങ്ങളുടെ ബന്ധത്തില് ഉറച്ചു നില്ക്കുന്നത് പരസ്പര വിശ്വാസത്തിന്റെ ബലത്തിലാണ്. അതൊരിക്കലും അത്ര എളുപ്പമാണെന്നു ഞാന് പറയില്ല. എങ്കിലും ഒരുമിച്ചു നില്ക്കാന് വേണ്ടി ആവശ്യമുള്ളതെല്ലാം ഞങ്ങള് ചെയ്യാറുണ്ട് ''-ഹെയ്ലി ബാള്ഡ്വിന് പറഞ്ഞു.
