ഈ വർഷം ഫെബ്രുവരിയിലാണ് ദക്ഷിണ കൊറിയൻ ടെക് ഭീമന്മാരായ സാംസങ് ഗാലക്സി F62 സ്മാർട്ട്ഫോൺ ഇന്ത്യയിൽ അവതരിപ്പിച്ചത്. 6 ജിബി റാം + 128 ജിബി സ്റ്റോറേജ്, 8 ജിബി റാം + 128 ജിബി സ്റ്റോറേജ് എന്നിങ്ങനെ രണ്ട് പതിപ്പുകളിൽ വില്പനക്കെത്തിയിരിക്കുന്ന സാംസങ് ഗാലക്സി F62-ന് യഥാക്രമം 23,999 രൂപയും, 25,999 രൂപയുമാണ് വില. റിപ്പോർട്ട് പ്രകാരം 6000 രൂപ ഡിസ്കൗണ്ടിൽ ഇപ്പോൾ ഗാലക്സി F62 ഇ കോമേഴ്സ് വെബ്സൈറ്റ് ആയ ഫ്ലിപ്കാർട്ടിൽ നിന്നും സ്വന്തമാക്കാം.
ഫ്ലിപ്കാർട്ട് രണ്ടാം തിയതി ആരംഭിച്ച ബിഗ് സേവിങ് ഡേയ്സിലൂടെയാണ് സാംസങ് ഗാലക്സി F62 6,000 രൂപ ഡിസ്കൗണ്ടിൽ വാങ്ങാനുള്ള അവസരം. ഈ മാസം ഏഴാം തിയതി വരെ നീണ്ട് നിൽക്കുന്ന സെയ്ലിൽ ഗാലക്സി F62 സ്മാർട്ട്ഫോൺ 17,999 രൂപയ്ക്ക് സ്വന്തമാക്കാം. സാംസങ് ഗാലക്സി F62, ആൻഡ്രോയിഡ് 11 അടിസ്ഥാനമായ യുഐ 3.1-ൽ ആണ് പ്രവർത്തിക്കുന്നത്. ലേസർ ബ്ലൂ, ലേസർ ഗ്രീൻ, ലേസർ ഗ്രേ നിറങ്ങളിൽ ലഭ്യമാണ്.
മൈക്രോ എസ്ഡി കാർഡ് വഴി 1 ടിബി വരെ വർദ്ധിപ്പിക്കാവുന്ന 128 ജിബി ഓൺബോർഡ് മെമ്മറിയാണ് സാംസങ് ഗാലക്സി F62-ന്. ഒക്ട-കോർ എക്സിനോസ് 9825 SoC പ്രോസസ്സർ 8 ജിബി വരെ റാമുമായി ചേർന്ന് പ്രവർത്തിക്കുന്നു. 6.7 ഇഞ്ച് ഫുൾ എച്ച്ഡി + (1080x2400) സൂപ്പർ അമോലെഡ് പ്ലസ് ഇൻഫിനിറ്റി-ഒ ഡിസ്പ്ലേയാണ്. 25W ഫാസ്റ്റ് ചാർജിംഗിനെ പിന്തുണയ്ക്കുന്ന 7,000mAh ബാറ്ററിയാണ് സാംസങ് ഗാലക്സി F62ൽ. പൂർണമായും ഈ ബാറ്ററി ചാർജ് ചെയ്യാൻ രണ്ട് മണിക്കൂറിൽ താഴെ സമയമെടുക്കും. റിവേഴ്സ് ചാർജിംഗിനെയും ബാറ്ററി സപ്പോർട്ട് ചെയ്യും.
64 മെഗാപിക്സൽ സോണി ഐഎംഎക്സ് 682 പ്രൈമറി സെൻസറും 12 മെഗാപിക്സൽ സെക്കൻഡറി സെൻസറും (123 ഡിഗ്രി ഫീൽഡ്-വ്യൂവിന്റെ അൾട്രാ വൈഡ് ആംഗിൾ ലെൻസ്), 5 മെഗാപിക്സൽ മാക്രോ ഷൂട്ടർ, 5 മെഗാപിക്സൽ ഡെപ്ത് സെൻസർ എന്നിവ ചേരുന്ന ക്വാഡ് റിയർ ക്യാമറ സംവിധാനമാണ് ഗാലക്സി എഫ് 62-ൽ. സെൽഫികൾക്കും വീഡിയോ ചാറ്റുകൾക്കുമായി, മുൻവശത്ത് 32 മെഗാപിക്സൽ ക്യാമറയാണ് ഉള്ളത്. ഇരു ക്യാമറകളും 4K വീഡിയോ റെക്കോർഡിംഗ് വരെ പിന്തുണയ്ക്കും.
