ഐഫോണ്‍ 18 പ്രോ മോഡലുകള്‍ക്കൊപ്പം ഈ വര്‍ഷം അവസാനം പുറത്തിറങ്ങുമെന്ന് പ്രതീക്ഷിക്കുന്ന ആപ്പിളിന്റെ ആദ്യ മടക്കാവുന്ന (foldable) ഫോണ്‍ 'ഐഫോണ്‍ അള്‍ട്രാ' (iPhone Ultra) ഉപയോക്താക്കള്‍ക്കിടയില്‍ മികച്ച പ്രതികരണം നേടുന്നതായി റിപ്പോര്‍ട്ട്. സാംസങ്, ഓപ്പോ, ഗൂഗിള്‍ തുടങ്ങിയ ബ്രാന്‍ഡുകള്‍ നിലനില്‍ക്കുന്ന വിഭാഗത്തിലേക്കാണ് ആപ്പിള്‍ ഈ ഫോണ്‍ അവതരിപ്പിക്കുന്നത്. ഔദ്യോഗികമായി പുറത്തിറങ്ങാന്‍ ഏതാനും ആഴ്ചകള്‍ കൂടി ശേഷിക്കുന്നുണ്ടെങ്കിലും, മുന്‍കൂട്ടി ഉപയോഗിച്ചു നോക്കിയ ഒരു കൂട്ടം ആളുകള്‍ ഇതിന്റെ വലിയ ഡിസ്പ്ലേ, പോക്കറ്റില്‍ ഒതുങ്ങുന്ന ഡിസൈന്‍, മികച്ച ഹിഞ്ച് (hinge), ഐപാഡിന് സമാനമായ ആപ്പ് ലേഔട്ടുകള്‍ എന്നിവയെ പ്രശംസിച്ചു.
ഉപയോക്തൃ അനുഭവം
മാര്‍ക്ക് ഗുര്‍മാന്റെ 'പവര്‍ ഓണ്‍' ന്യൂസ്ലെറ്റര്‍ അനുസരിച്ച്, ഐഫോണ്‍ അള്‍ട്രായുടെ ലുക്കും പോക്കറ്റില്‍ എളുപ്പത്തില്‍ സൂക്ഷിക്കാന്‍ കഴിയുന്ന ഡിസൈനും ഉപയോഗിച്ചു നോക്കിയവരെ ആകര്‍ഷിച്ചു. ഫോണ്‍ മടക്കുന്നതിനുള്ള ഹിഞ്ച് സംവിധാനത്തിന്റെ ഈടും പ്രവര്‍ത്തനവും എടുത്തുപറയേണ്ട ഒന്നാണ്.
മടക്കിവെക്കുമ്പോള്‍ സാധാരണ ഫോണ്‍ പോലെയുള്ള ചെറിയ കവര്‍ സ്‌ക്രീനും, തുറക്കുമ്പോള്‍ വലിയ ഇന്റേണല്‍ ഡിസ്പ്ലേയുമാണ് ഇതിലുള്ളത്. വലിയ സ്‌ക്രീനിന് അനുയോജ്യമായ രീതിയില്‍ ഐപാഡുകളിലേതുപോലെയുള്ള ആപ്പ് ലേഔട്ടുകള്‍ ഉള്‍പ്പെടെയുള്ള സോഫ്റ്റ്വെയര്‍ മാറ്റങ്ങള്‍ ആപ്പിള്‍ വരുത്തുന്നുണ്ട്. വീഡിയോകള്‍ കാണുന്നതിനും ഗെയിമിംഗിനും ജോലി സംബന്ധമായ കാര്യങ്ങള്‍ക്കും സാധാരണ ഐഫോണിനേക്കാള്‍ ഇത് മികച്ചതായിരിക്കുമെന്ന് ഗുര്‍മാന്‍ വ്യക്തമാക്കുന്നു.
ഫോട്ടോഗ്രാഫിക്കും വീഡിയോകള്‍ക്കും വലിയ ഡിസ്പ്ലേ മികച്ചൊരു വ്യൂഫൈന്‍ഡറായി (viewfinder) ഉപയോഗിക്കാം എന്നതാണ് മറ്റൊരു പ്രത്യേകത. എന്നാല്‍, ഇതില്‍ ടെലിഫോട്ടോ ക്യാമറ ഉണ്ടാകില്ല എന്നത് പ്രധാന പോരായ്മയായി ചൂണ്ടിക്കാണിക്കപ്പെടുന്നു.
വിലയും വിപണിയും
ഏകദേശം $2,000 (ഏകദേശം 1.65 ലക്ഷത്തിന് മുകളില്‍) അല്ലെങ്കില്‍ അതില്‍ കൂടുതലോ ഇതിന് വില പ്രതീക്ഷിക്കുന്നു. സാംസങ്ങിന്റെ ഗാലക്സി ഇസെഡ് ഫോള്‍ഡ് 8 അള്‍ട്രായ്ക്ക് നിലവില്‍ $1,900 അടുത്ത് വിലയുള്ളപ്പോള്‍, അതിനേക്കാള്‍ പ്രീമിയം വിഭാഗത്തിലാണ് ആപ്പിള്‍ ഈ ഫോണ്‍ അവതരിപ്പിക്കുന്നത്.
വൈകി വിപണിയിലെത്തുന്നുവെങ്കിലും, ലോഞ്ച് ചെയ്ത് ഏതാനും മാസങ്ങള്‍ക്കുള്ളില്‍ ആഗോള ഫോള്‍ഡബിള്‍ സ്മാര്‍ട്ട്ഫോണ്‍ വില്‍പ്പനയുടെ 25 ശതമാനത്തോളം സ്വന്തമാക്കാന്‍ ഐഫോണ്‍ അള്‍ട്രായ്ക്ക് സാധിക്കുമെന്നാണ് വിലയിരുത്തല്‍. ഈ വര്‍ഷം 1 കോടിയോളം (10 million) യൂണിറ്റുകള്‍ നിര്‍മ്മിക്കാന്‍ ആപ്പിള്‍ സപ്ലയര്‍മാരോട് ആവശ്യപ്പെട്ടിട്ടുണ്ടെങ്കിലും, 2026 അവസാന പാദത്തോടെ മാത്രമേ ഫോണ്‍ പ്രീ-ഓര്‍ഡറിനായി ലഭ്യമാകൂ. ഉല്‍പ്പാദനത്തിലെയും വിലനിര്‍ണ്ണയത്തിലെയും പരിധികള്‍ കാരണം തുടക്കത്തില്‍ യു.എസ് വിപണിയില്‍ മാത്രമായിരിക്കും ഇത് ലഭ്യമാകുക.
Comments