ന്യൂഡല്ഹി: കോവിഡ് കൈകാര്യം ചെയ്യുന്നതിലെ പരാജയം കേന്ദ്രസര്ക്കാരിനെതിരേ പ്രതിപക്ഷം വന് വിവാദമാക്കി മാറ്റുമ്പോള് ഉപദ്രവിക്കരുതെന്ന് സോണിയാഗാന്ധിക്കു കത്തയച്ച് ബിജെപി അദ്ധ്യക്ഷന് ജെപി ദത്ത. രാജ്യം കോവിഡിനെതിരേ പോരാടുമ്പോള് അതിനെ ദുര്ബ്ബലപ്പെടുത്തുന്ന രീതിയില് പെരുമാറരുതെന്നും ഇക്കാര്യം കോണ്ഗ്രസിന്റെ മുന് അദ്ധ്യക്ഷനും മകനുമായ രാഹുലിനോട് ഓര്മ്മപ്പെടുത്തണമെന്നും പറയുന്നു.
കോവിഡ് പ്രതിരോധത്തില് നരേന്ദ്രമോഡി സര്ക്കാര് സ്വീകരിച്ചിരിക്കുന്ന നടപടികളും അതേസമയത്ത് കോണ്ഗ്രസ് നടത്തുന്ന വിമര്ശനങ്ങളും അവര് ഭരിക്കുന്ന സംസ്ഥാനങ്ങളിലെ മുഖ്യമന്ത്രിമാര് മഹാമാരിയെ പ്രതിരോധിക്കുന്ന നടപടികള്ക്ക് പകരം രാഷ്ട്രീയം കളിക്കുന്നതിന്റെയും വിശദമായ വിവരങ്ങളോടെയാണ് കത്ത്. കേന്ദ്രം കോവിഡിനെതിരേ പൊരുതുമ്പോള് കേന്ദ്രത്തിനെതിരേ തുടര്ച്ചയായി വിമര്ശനം ഉയരുന്നത് തന്നെ വേദനിപ്പിക്കുന്നു. കോവിഡിനെതിരേ രാജ്യം പോരാടുമ്പോള് സോണിയയുടെ പാര്ട്ടി അതിനെ ദുര്ബ്ബലപ്പെടുത്തുകയാണെന്നും അക്കാര്യം ശരിയാകണമോ എന്ന് വിലയിരുത്താന് തയ്യാറാകണമെന്നും സോണിയയോട് പറയുന്നു.
പ്രധാനമന്ത്രിയും സര്ക്കാരും കോവിഡിനെതിരേ പോരാടാന് എല്ലാത്തരം പ്രയത്നങ്ങളിലും ഏര്പ്പെട്ടിരിക്കുകയാണ്. പ്രധാനമന്ത്രിയ്ക്കും കേന്ദ്രസര്ക്കാരിനും പാവപ്പെട്ടവര്ക്കാണ് മുന്തൂക്കം. എല്ലാ മുഖ്യമന്ത്രിമാരുടെ അഭിപ്രായ സ്വരൂപണവും പ്രധാനമന്ത്രി നടത്തി. അതേസമയം ഭരിക്കുന്ന സംസ്ഥാനങ്ങളിലെ മുഖ്യമന്ത്രിമാര് ഉള്പ്പെടെയുള്ള കോണ്ഗ്രസുകാര് വിവേകമില്ലാതെ രാജ്യത്തിന്റെ പ്രയത്നങ്ങളെ താഴ്ത്തിക്കെട്ടാന് പ്രചാരവേല ചെയ്യുകയാണ്.
ബിജെപി ഭരിക്കുന്ന സംസ്ഥാനങ്ങളില് വാക്സിന് സൗജന്യമായി നല്കുമ്പോള് കോണ്ഗ്രസ് ഭരിക്കുന്ന സംസ്ഥാനങ്ങളില് എന്തുകൊണ്ടാണ് അങ്ങിനെ ചെയ്യാത്തതെന്നും നദ്ദ ചോദിക്കുന്നു. 45,000 വെന്റിലേറ്ററുകള് വിതരണം ചെയ്തിട്ടും കോണ്ഗ്രസ് ഭരിക്കുന്ന സംസ്ഥാനങ്ങളില് അത് ഉപയോഗിക്കാത്തത് എന്താണെന്നും നദ്ദ ചോദിക്കുന്നു. അതുപോലെ കേന്ദ്രത്തിന്റെ നിര്ദേശങ്ങള് പതിവായി അവഗണിച്ച് കേന്ദ്രത്തില് നിന്നും നിര്ദേശം ഒന്നുമില്ല എന്ന് പ്രചരിപ്പിക്കുകയാണ് അവര് ചെയ്യുന്നത്.
നേരത്തേ ലോക്ഡൗണിനെ എതിര്ത്ത ആളാണ് രാഹുല്ഗാന്ധി. ഇപ്പോള് അത് വേണമെന്ന് പറയുന്നു. പ്രതിഷേധങ്ങള് സംഘടിപ്പിച്ച് കോവിഡ് മാനദണ്ഡങ്ങള് കാറ്റില് പറത്തി അദ്ദേഹം റാലി നടത്തി. കേരളത്തില് വലിയ ആള്ക്കൂട്ടം ഉണ്ടാക്കി തെരഞ്ഞെടുപ്പ് പ്രചരണം നടത്തിയ അദ്ദേഹം ഇപ്പോള് മറ്റിടങ്ങളില് നടത്തിയ റാലികളെ കുറ്റപ്പെടുത്തുകയാണ്.
2012 ലെ യുപിഎ സര്ക്കാരിന്റെ ആവശ്യമായിരുന്നു സെന്ട്രല് വിസ്താ പദ്ധതി. ഇപ്പോള് പ്രതിപക്ഷം അത് ഏറ്റെടുത്തിരിക്കുകയാണ്. കഴിഞ്ഞ 70 വര്ഷമായി രാജ്യത്ത് ആരോഗ്യമേഖലയില് നിക്ഷേപം നടത്തിയിട്ടില്ല. കൂടുതല് കാലം കോണ്ഗ്രസായിരുന്നില്ലേ രാജ്യം ഭരിച്ചിരുന്നതെന്നും നദ്ദ ചോദിക്കുന്നു.
