കണ്ണൂര് : ആരോഗ്യമന്ത്രിയാക്കിയപ്പോള് തനിക്ക് ഭരണപരിചയമില്ലാത്തതിനാല് മറ്റേതെങ്കിലും വകുപ്പ് നല്കാമോ എന്ന് ചോദിച്ചയാളാണ് കെ.കെ. ഷൈലജയെന്ന് സിപിഎം നേതാവ് എംവി. ജയരാജന്. പാര്ട്ടിയും എല്ഡിഎഫും ജനങ്ങളും കൂടെയുണ്ടെന്ന വിശ്വാസത്തിന്റെ കരുത്താണ് ശൈലജ ടീച്ചറെ മികച്ച മന്ത്രിയാക്കിയതെന്നും ഒരാളെ ഭരണാധികാരിയാക്കുന്നതും മികച്ച ഭരണാധികാരിയാക്കുന്നതും പാര്ട്ടിയാണെന്നും പറഞ്ഞു.
കണ്ണൂരില് നടന്ന ഇ.കെ.നായനാര് അനുസ്മരണത്തിലായിരുന്നു സിപിഎം കണ്ണൂര് ജില്ലാ സെക്രട്ടറി എം.വി.ജയരാജന് ഇങ്ങിനെ പറഞ്ഞത്. കഴിഞ്ഞ മന്ത്രിസഭയിലെ ഏറ്റവും ഭരണമികവ് കാട്ടിയ മികച്ച മന്ത്രിമാരില് ഒരാളായിട്ടും കെ.കെ. ഷൈലജയെ പരിഗണിക്കാത്തതിന്റെ പേരില് വന് വിമര്ശനം ഉയരന്നതിനിടയിലാണ് പാര്ട്ടിയുടെ നിലപാടിനെ ന്യായീകരിച്ച് കണ്ണൂര് ജില്ലാസെക്രട്ടറി രംഗത്ത് വന്നത്. വ്യക്തിയല്ല പ്രസ്ഥാനമാണ് പ്രധാനം എന്നും കെ.കെ.ശൈലജയുടേത് കൂട്ടായ്മയുടെ വിജയമായിരുന്നു എന്നും എം വി ജയരാജന് വ്യക്തമാക്കി.
‘‘അഞ്ചുവര്ഷം ആരോഗ്യമന്ത്രിയായി എല്ലാവരുടെയും സ്നേഹം പിടിച്ചുപറ്റിയ ഷൈലജ ടീച്ചര് 2016-ല് പുതുമുഖമായിരുന്നു. അന്നവര് പാര്ട്ടി സെക്രട്ടറിയായ കോടിയേരി ബാലകൃഷ്ണനെ കണ്ട് തനിക്ക് ഭരണപരിചയമില്ല. ആരോഗ്യവകുപ്പിന് പകരം മറ്റേതെങ്കിലും വകുപ്പ് നല്കണമെന്ന് ആവശ്യപ്പെട്ടിരുന്നു. എന്നാല് പാര്ട്ടി സെക്രട്ടറി അവര്ക്ക് കരുത്ത് പകര്ന്നു. ജനങ്ങളും പാര്ട്ടിയും എല്ഡിഎഫും ഒപ്പം നിന്നു.’’
ആ മന്ത്രിസഭയില് ഷൈലജ മാത്രമായിരുന്നില്ല. തോമസ് ഐസക്, ടി.പി.രാമകൃഷ്ണന്, കെ.ടി. ജലീല് തുടങ്ങി എല്ലാവരും മാതൃകാപരമായി പ്രവര്ത്തിച്ചവരാണ്. ഇടതുപക്ഷം ഭരണ തുടര്ച്ച നേടാനും അധികാരത്തില് തിരിച്ചുവരാനും ഇത് കാരണമായി. അതുകൊണ്ട് മന്ത്രിസഭയാണ് മാതൃകയായി പ്രവര്ത്തിച്ചതെന്നും കൂട്ടായ്മയാണ് ആ മാതൃക സൃഷ്ടിച്ചതെന്നും കൂട്ടായ്മയുടെ വിജയമാണ് വീണ്ടും അധികാരത്തില് വരാന് ജനങ്ങളെ ഇടതുപക്ഷത്തിന് അംഗീകാരം നല്കാന് പ്രേരിപ്പിച്ചതെന്നും പറഞ്ഞു.
