ഐ.എസ്. ഭീകരരുടെ വിധവകളായ സ്വന്തം മകള് ഉള്പ്പെടെ അഫ്ഗാനിസ്ഥാന് ജയിലില് കഴിയുന്ന ഇന്ത്യന് വനിതകളെ ഇന്ത്യയിലേക്ക് കൊണ്ടുവന്ന് എന്തു നിയമനടപടി വേണമെങ്കിലും എടുത്തുകൊള്ളൂ എന്നും മകളെ കൊല്ലാന് വിടരുതെന്ന് കേന്ദ്രത്തോട് അപേക്ഷിച്ച് നിമിഷാ ഫാത്തിമയുടെ അമ്മ ബിന്ദു. നിമിഷ ഫാത്തിമ ഉള്പ്പെടെ അഫ്ഗാനിസ്ഥാന് ജയിലില് കഴിയുന്ന ഇന്ത്യന് വനിതകളെ തിരിച്ചെത്തിക്കില്ലെന്ന കേന്ദ്ര നിലപാടിന് പിന്നാലെ പ്രതികരണവുമായി ബിന്ദു എത്തിയത്.
മകളെ ഐ.എസിലേക്ക് പോകാന് പ്രേരിപ്പിച്ചവര് ഇപ്പോഴും ഇന്ത്യയില് തന്നെ ഉള്ളപ്പോള് തന്റെ മകളെ മാത്രം എന്തിന് കൊല്ലാന് വിടുന്നു എന്നാണ് ബിന്ദു ചോദിക്കുന്നത്. ഒരു ഇന്ത്യക്കാരി എന്ന നിലയില് മനുഷ്യാവകാശമില്ലേ എന്നും ഈ പെണ്കുട്ടികളുടെ കുഞ്ഞുങ്ങള് എന്തു ദ്രോഹം ചെയ്തുവെന്നും ചോദിച്ചു. തന്റെ മകള് ഇന്ത്യ വിട്ടു പോകുന്നതിന് മുമ്പ് അന്നത്തെ സര്ക്കാരിനെയും പൊലീസ് ഉദ്യോഗസ്ഥരെയും അറിയിച്ചതായിരുന്നു. എന്നാല് അന്ന് പോലീസോ അധികാരികളോ തടയാന് ശ്രമിച്ചില്ലെന്നും പറഞ്ഞു.
തന്റെ മകളും പേരക്കുട്ടികളും അടക്കമുള്ളവര് സെപ്തംബര് 11 കഴിഞ്ഞാല് ബോംബ് ഭീഷണിയുടെ നടുവിലാണെന്നും തന്റെ മകളെ കൊല്ലാന് വിടുന്നത് എന്തിനാണെന്ന് ബിന്ദു ചോദിച്ചു. അഫ്ഗാനിസ്ഥാന് ജയിലില് കഴിയുന്ന സോണിയ, മെറിന്, നിമിഷ, റഫീല എന്നിവരെ ഇന്ത്യയിലേക്ക് മടക്കി അയക്കാന് താത്പര്യപ്പെട്ട് അഫ്ഗാന് സര്ക്കാര് സമീപിച്ചിരുന്നു എങ്കിലും ഇവരെ കൊണ്ടു വരാന് താത്പര്യമില്ലെന്ന് കേന്ദ്രം അറിയിച്ചു.
യുവതി യുവാക്കളെ തിരിച്ചു കൊണ്ടു വരുന്ന വിഷയത്തില് ഇന്ത്യന് സര്ക്കാരിനെ പല വഴികളിലൂടെ സമീപിച്ചു എങ്കിലും ആരും മറുപടി തന്നില്ല എന്നും ബിന്ദു പറയുന്നു. മകള് അഫ്ഗാനില് ജയിലില് ആണെന്ന് അറിഞ്ഞിട്ട് ഒന്നര വര്ഷമായി. അമിത് ഷായ്ക്കും വിദേശ കാര്യമന്ത്രാലയത്തിനുമെല്ലാം തിരിച്ചു കൊണ്ടു വരുന്ന വിഷയത്തില് മെയില് അയച്ചിരുന്നു. ഇന്ത്യന് സര്ക്കാര് മറുപടി പറയാത്തത് ഇന്ത്യക്കാരി എന്ന നിലയില് തന്നെ ഞെട്ടിച്ചു.
ഇന്ത്യന് സര്ക്കാര് നിമിഷ ഫാത്തിമയെ രാജ്യത്തേക്ക് മടക്കിക്കൊണ്ടുവരികയും നിയമനടപടികളിലേക്ക് കടക്കുകയും ചെയ്യുമെന്ന വിശ്വാസത്തിലായിരുന്നു താന് എന്നും ബിന്ദു പറഞ്ഞു. എന്നാല് ഇവര്ക്ക് ഇപ്പോഴും തീവ്ര മതമൗലിക വാദ നിലപാടുകള് ഉള്ളതിനാല് ഇവരെ ഇന്ത്യയിലേക്കെത്തിക്കുന്നത് സുരക്ഷാ പ്രശ്നങ്ങള് ഉണ്ടാക്കുമെന്നാണ് ഇന്റലിജന്സ് റിപ്പോര്ട്ട്.
