ന്യൂഡല്ഹി: ബീഹാറില് എന്ഡിഎ സഖ്യത്തിന്റെ ഭാഗമായ എല്ജെപിയില് ഉള്പ്പാര്ട്ടി പോരിനെ തുടര്ന്ന് പാര്ട്ടിയുടെ തലവനും മുന് കേന്ദ്രമന്ത്രി രാംവിലാസ് പസ്വാന്റെ മകനുമായ ചിരാഗ് പസ്വാന് ഒറ്റപ്പെട്ടു. ചിരാഗിന്റെ പിതൃസഹോദരന് പശുപതി കുമാര് പരസിന്റെ നേതൃത്വത്തില് പാര്ട്ടിയിലെ ആറ് എംപിമാരില് അഞ്ചുപേരും തങ്ങളെ പ്രത്യേകം പരിഗണിക്കണം എന്നാവശ്യപ്പെട്ട് ലോക്സഭാ സ്പീക്കറിന് കത്ത് നല്കി. ഇവര് ഉടന് നിതീഷ്കുമാറിന്റെ ജെഡിയുവിന്റെ ഭാഗമാകുമെന്നാണ് വിവരം.
അഞ്ച് എംപിമാരും ചിരാഗിനെ തള്ളിപ്പറഞ്ഞിരിക്കുകയാണ്. ഒറ്റരാത്രി കൊണ്ടാണ് ചിരാഗ് പാര്ട്ടിയില് ഒറ്റപ്പെട്ടത്. ചിരാഗ് ഉള്പ്പെടെ ലോക്സഭയില് എല്ജെപിയ്ക്ക് ആറ് എംഎല്എമാരാണ് ഉള്ളത്. അഞ്ച് വിമതന്മാരും ചിരാഗിന്റെ സ്ഥാനത്ത് പുതിയ നേതാവിനെ കൊണ്ടുവരണമെന്ന് ആവശ്യപ്പെട്ടിരിക്കുകയാണ്. എല്ജെപിയുടെ ദേശീയനേതാവായ രാംവിലാസ് പസ്വാന്റെ ഇളയ സഹോദരന് പശുപതി കുമാര് പരസാണ് പാര്ട്ടിക്കുള്ളില് യുദ്ധം തുടങ്ങിവെച്ചതെന്നാണ് വിവരം. അതേസമയം കഴിഞ്ഞ നിയമസഭാ തെരഞ്ഞെടുപ്പില് തനിക്ക് പണി തന്ന ചിരാഗിനെതിരേ നിതീഷ്കുമാറിന്റെ പ്രതികാരമാണ് നടപ്പായതെന്നാണ് വിവരം.
നിതീഷ്കുമാറിന്റെ തന്ത്രമാണ് എല്ജെപിയില് ചിരാഗ് ഒറ്റപ്പെടാന് കാരണമായതെന്ന വിലയിരുത്തലുകള് ഉണ്ട്. ഹാജിപൂര് എംപിയായ പരസിന് കേന്ദ്രമന്ത്രിസഭയില് സ്ഥാനം വാഗ്ദാനം ചെയ്തായിരുന്നു നിതീഷ് പണികൊടുത്തത് എന്ന വിവരമുണ്ട്. തന്റെ അടുത്ത അനുയായി ലലന്സിംഗ് വഴി മറ്റ് എല്ജെപി എംപിമാരെ കൂടെ കൊണ്ടുവരാന് നിതീഷ് നേരത്തേ തന്നെ പണി തുടങ്ങിയിരുന്നു എന്നാണ് വിവരം. ചിരാഗിന്റെ ബന്ധു പ്രിന്സ് രാജ്, മറ്റുള്ളവരായ ചന്ദന് സിംഗ്, വീണാദേവി, മെഹ്ബൂബ് അലി കൈസര് എന്നിവര് വരും ദിവസങ്ങളില് ജെഡിയുവിന്റെ ഭാഗമാകും.
ബീഹാറില് എല്ജെപി ജെഡിയുവും ബിജെപിയും നയിക്കുന്ന എന്ഡിഎ യുടെ ഭാഗമാണ്. എന്നാല് കഴിഞ്ഞ നിയമസഭാ തെരഞ്ഞെടുപ്പില് എല്ജെപി ഒറ്റയ്ക്കായിരുന്നു മത്സരിച്ചത്. ചിരാഗ് സ്വന്തം നിലയ്ക്ക് സ്ഥാനാര്ത്ഥികളെ നിര്ത്തിയത് ഏറ്റവും കൂടുതല് ബാധിച്ചത് നിതീഷിന്റെ ജെഡിയുവിനെ ആയിരുന്നു. ഇതോടെ ജെഡിയു ബിജെപിയ്ക്കും പ്രതിപക്ഷമായ ആര്ജെഡിയ്ക്കും പിന്നിലാകാന് കാരണമായി.
കഴിഞ്ഞ ഒക്ടോബറില് രാംവിലാസ് പസ്വാന് മരണമടഞ്ഞതോടെയാണ് പാര്ട്ടിയില് കുഴപ്പം തുടങ്ങിയത്. ഇതിന് പിന്നാലെ പിതൃസഹോദരനെ പാര്ട്ടിയില് നിന്നും പുറത്താക്കുമെന്ന് ചിരാഗ് പിതൃസഹോദരന് മുന്നറിയിപ്പ് നല്കുകയും ചെയ്തു. നവംബറില് നടന്ന തെരഞ്ഞെടുപ്പില് സ്ഥാനാര്ത്ഥി നിര്ണ്ണയ കാര്യത്തില് തന്നോട് ചിരാഗ് അഭിപ്രായം തേടാതിരുന്നത് അപമാനിക്കുന്നതിന് തുല്യമായിരുന്നെന്നാണ് പരസ് നേരത്തേ പറഞ്ഞത്.
അതേസമയം ദീര്ഘനാളായി പാര്ട്ടിക്കുള്ളില് പുകഞ്ഞുകൊണ്ടിരുന്ന ബോംബ് ഇപ്പോള് പൊട്ടിയെന്നേയുള്ളെന്നാണ് പാര്ട്ടി അണികള് പറയുന്നത്. പാര്ട്ടിക്കുള്ളില് ആഭ്യന്തര കലാപത്തിന് സാധ്യതയുണ്ടെന്ന് നേരത്തേ കിട്ടിയിരുന്ന മുന്നറിയിപ്പുകള് ചിരാഗ് അവഗണിക്കുകയും ചെയ്തു. ചിരാഗിന്റെ ഈ അമിതവിശ്വാസമാണ് ഇപ്പോള് പൊട്ടിത്തെറിയിലേക്ക് നയിച്ചതെന്നാണ് പാര്ട്ടിക്കുള്ളിലെ സംസാരം.
