പാറ്റ്ന: ബന്ധുക്കള് തമ്മില് പോര് നടക്കുന്ന എല്ജെപിയില് ഇപ്പോള് നടക്കുന്ന കാര്യങ്ങള് മഹാഭാരത യുദ്ധത്തിന് സമാനമാണെന്ന് ചിരാഗ് പാസ്വാന്. അമ്മാവനും സഹോദരനും ഒരു ഭാഗത്തും താന് മറ്റൊരു വശത്തും. ബന്ധുക്കള് തമ്മിലാണ് ഇവിടെ യുദ്ധമെന്നും അതൊരു മഹാഭാരത യുദ്ധം പോലെയാണെന്നും ചിരാഗ് പറഞ്ഞു. പ്രശ്നം പരിഹരിക്കാനായി കഴിഞ്ഞ ദിവസം ചിരാഗ് അമ്മാവന് പശുപതിയെ കാണാന് ഡല്ഹിയില് എത്തിയിരുന്നെങ്കിലും ചിരാഗിനെ വീട്ടിലേക്ക് ക്ഷണിക്കാന് പോലും പശുപതി തയ്യാറായില്ല.
പാര്ട്ടിയില് ചിരാഗും അമ്മാവന് പശുപതിയും പരസ്പരം പുറത്താക്കല് നാടകം നടന്നുകൊണ്ടിരിക്കെ കഴിഞ്ഞ ദിവസം ഉച്ചയോടെയാണ് ചിരാഗ് പശുപതിയുടെ വീടിന് മുന്നിലെത്തിയത്. എന്നാല് ചിരാഗിനെ പശുപതിയും പ്രിന്സ് രാജും ചേര്ന്ന് മണിക്കൂറോളം സമയം പോസ്റ്റാക്കി. ഏകദേശം രണ്ടു മണിക്കൂറോളം സമയം വീടിന് മുന്നില് കാത്തു നിന്ന ശേഷം അപമാനത്തോടെ ചിരാഗ് മടങ്ങുകയും ചെയ്തു. അമ്മാവനും സഹോദരനും തന്നെ ചതിക്കുകയായിരുന്നു എന്നാണ് ചിരാഗ് പറഞ്ഞത്. പാര്ട്ടിയുടെ അവകാശം പിടിക്കാന് ശക്തമായ ഉള്പ്പോരാണ് നടക്കുന്നത്.
എല്.ജെ.പി. പാര്ട്ടിപ്രവര്ത്തകരില് 90 ശതമാനം പേരും അംഗീകരിക്കുന്നത് തന്റെ നേതൃത്വമാണെന്നാണ് ചിരാഗ് അവകാശവാദം ഉന്നയിക്കുന്നത്. ‘ദേശീയ എക്സിക്യൂട്ടീവ് യോഗത്തില് പങ്കെടുത്ത എല്ലാ പ്രവര്ത്തകരും തന്റെ നേതൃത്വത്തെ അംഗീകരിച്ചിട്ടുണ്ട്. ദല്ഹി, ജമ്മു കശ്മീര് ഒഴികെയുള്ള എല്ലാ സംസ്ഥാന ഘടകത്തിന്റെയും പിന്തുണയും തനിക്കുണ്ടെന്നാണ് ഞായറാഴ്ച ദേശീയ എക്സിക്യൂട്ടീവ് യോഗത്തിന് ശേഷം മാധ്യമങ്ങളോട് ചിരാഗ് പറഞ്ഞത്. വെറും 9 പേരുടെ പിന്ബലത്തിലാണ് പശുപതി കുമാര് പരസ് തന്നോട് മത്സരിക്കുന്നതെന്നും ചിരാഗ് കൂട്ടിച്ചേര്ത്തു.
അമ്മാവനും സഹോദരനും ചേര്ന്ന് തന്നെ ചതിക്കുമെന്ന് കരുതിയില്ല. പാര്ട്ടിയിലെ ഭൂരിഭാഗം പേരുടെ പിന്തുണ നേടിയാണ് താന് ഇതുവരെ എത്തിയത് എന്നും പറഞ്ഞു. പാര്ട്ടിയ്ക്കുള്ളില് ഭിന്നത രൂപപ്പെട്ടതിനെത്തുടര്ന്ന് ചിരാഗ് പാസ്വാനെ ദേശീയ അധ്യക്ഷ സ്ഥാനത്ത് നിന്ന് വിമതര് പുറത്താക്കിയിരുന്നു. ഒരാള്ക്ക് ഒരു പദവി എന്ന തത്വത്തില് ചിരാഗ് പാസ്വാനെ നീക്കം ചെയ്യുന്നുവെന്നായിരുന്നു വിമത എം.പിമാര് പറഞ്ഞത്. ഇതിനു പിന്നാലെ പശുപതി പരസ് അടക്കം അഞ്ചു വിമത എം.പിമാരെ ചിരാഗ് പാര്ട്ടിയില് നിന്ന് സസ്പെന്ഡ് ചെയ്ത.
ചിരാഗ് ഒഴികെയുള്ള പാര്ട്ടിയുടെ എം.പിമാര് ചേര്ന്ന് സൂരജ് ഭാനെയെ പുതിയ വര്ക്കിംഗ് പ്രസിഡന്റായും പശുപതി കുമാര് പരസിനെ പാര്ലമെന്ററി പാര്ട്ടി നേതാവായും തെരഞ്ഞെടുത്തിട്ടുണ്ട്. അഞ്ച് എം.പിമാര് ഞായറാഴ്ച ലോക്സഭാ സ്പീക്കറെക്കണ്ട് ചിരാഗിനെ പാര്ലമെന്ററി പാര്ട്ടി നേതൃസ്ഥാനത്തുനിന്ന് നീക്കിയതായും പകരം പരസിനെ നിയമിച്ചതായും അറിയിക്കുകയും ചെയ്തിട്ടുണ്ട്. ബീഹാര് തെരഞ്ഞെുപ്പ് ഫലം വന്നതിന് ശേഷം ഇവരെല്ലാം ചിരാഗിന്റെ നേതൃത്വത്തില് അതൃപ്തി പ്രകടിപ്പിച്ചിരുന്നു. നേരത്തെ നേതാക്കളും പ്രവര്ത്തകരുമായി 200 ലേറെ പേര് എല്.ജെ.പി. വിട്ട് ജെ.ഡി.യുവില് ചേര്ന്നിരുന്നു.
