ന്യൂഡല്ഹി: സ്വന്തം പാര്ട്ടി ഭരിക്കുന്ന സംസ്ഥാനങ്ങളില് പ്രധാനമന്ത്രി മന്ത്രിയുടെയും സംസ്ഥാന മുഖ്യമന്ത്രിയുടേയും ചിത്രം സൗജന്യറേഷന് വിതരണം ചെയ്യുന്ന കടകളില് പ്രദര്ശിപ്പിക്കാന് ആവശ്യപ്പെട്ട് ബിജെപി. പ്രധാന് മന്ത്രി ഗരീബ് കല്യാണ് അന്ന യോജനയുടെ ഭാഗമായി റേഷന് ബിജെപിയുടെ ചിഹ്നമായ താമരയുടെ ചിത്രമുള്ള ക്യാരിബാഗില് നല്കാനാണ് നിര്ദേശത്തില് പറയുന്നത്.
കോവിഡിന്റെ പശ്ചാത്തലത്തില് അനേകം പേര് ദുരിതം അനുഭവിക്കുന്ന സാഹചര്യത്തില് രണ്ടു മാസത്തേക്ക് കൂടി പ്രധാനമന്ത്രി ഗരീബ് കല്യാണ് യോജന നീട്ടിയിട്ടുണ്ട്. മാസം അഞ്ചു കിലോ ധാന്യങ്ങള് ഒരാള്ക്ക് വീതം കിട്ടും. ദേശീയ ഭക്ഷ്യ സുരക്ഷാ നിയമത്തിന് കീഴില് 80 കോടി പേര്ക്കാകും ഇതിന്റെ ആനുകൂല്യം കിട്ടുക. നവംബര് അവസാനം വരെ പദ്ധതി നീട്ടിയിട്ടുണ്ട്. ഭക്ഷ്യ പദ്ധതിയ്ക്ക് പരമാവധി പ്രചാരം നല്കണമെന്ന് ബിജെപി ജനറല് സെക്രട്ടറി അരുണ് സിംഗ് അടിവരയിട്ട് പറഞ്ഞിട്ടുണ്ട്.
നിലവില് കോവിഡ് വാക്സിന് സര്ട്ടിഫിക്കറ്റില് പ്രധാനമന്ത്രിയുടെ ചിത്രം വെച്ചിട്ടുണ്ട്. എന്നാല് ഈ നീക്കം പ്രതിപക്ഷം ഭരിക്കുന്ന സംസ്ഥാനങ്ങള് എതിര്ത്തിരുന്നു. ഛത്തീസ്ഗഡും പശ്ചിമബംഗാളും പോലെയുള്ള സംസ്ഥാനങ്ങള് പ്രധാനമന്ത്രിയുടെ ചിത്രം ഇതില് നിന്നും മായ്ച്ച് പകരം മുഖ്യമന്ത്രിയുടെ ചിത്രം വെച്ചാണ് വാക്സിന് സര്ട്ടിഫിക്കറ്റ് നല്കിയിരിക്കുന്നത്. റേഷന് കാര്യത്തില് രാജ്യത്തെ എല്ലാ കടയ്ക്ക് മുന്നിലും പ്രധാനമന്ത്രിയുടെ ചിത്രം പ്രദര്ശിപ്പിക്കാന് ശ്രമിക്കണമെന്ന് എല്ലാ സംസ്ഥാന ഘടകങ്ങള്ക്കും നിര്ദേശം നല്കിയിട്ടുണ്ട്. റേഷന് വിതരണം ചെയ്യുന്ന ബാഗില് താമര ചിഹ്നം ഉണ്ടായിരിക്കാന് എംഎല്എ മാരും എംപിമാരും ഉദ്യോഗസ്ഥരും ഉറപ്പാക്കണമെന്നും ആവശ്യപ്പെട്ടിട്ടുണ്ട്.
ബി.ജെ.പി. ഭരിക്കാത്ത സംസ്ഥാനങ്ങളിലും റേഷന് ബാഗുകളില് താമര ചിഹ്നം വെക്കാന് കഴിയുമെങ്കില് അത് ചെയ്യണമെന്നും കത്തില് പറയുന്നു. ഇത്തരം സംസ്ഥാനങ്ങളില് ബാനറുകള് മുഖ്യമന്ത്രിയുടെ ഫോട്ടോയ്ക്ക് പകരം മറ്റേതെങ്കിലും പ്രതിനിധികളുടെ ചിത്രം നല്കണമെന്നും പറയുന്നുണ്ട്. ഈ പരിപാടിയ്ക്ക് സാമൂഹ്യ മാധ്യമങ്ങളില് വലിയ പ്രചാരം നല്കാനും ഗുണഭോക്താക്കളുമായി ആവശ്യമെങ്കില് കൂടിക്കാഴ്ച നടത്താനും ആവശ്യപ്പെട്ടിട്ടുണ്ട്. റേഷന്ബാഗ് പ്ലാസ്റ്റിക് വിരുദ്ധമാകണമെന്നും കോവിഡ് പ്രോട്ടോകോള് അനുസരിച്ചായിരിക്കണമെന്നും ആവശ്യപ്പെട്ടിട്ടുണ്ട്.
