അഹമ്മദാബാദ്: സര്ക്കാര് ജോലിയുമായി ബന്ധപ്പെട്ട് തന്റെ ഗ്രാറ്റിവിറ്റി നല്കാന് ഉടന് നടപടിയെടുത്തില്ലെങ്കില് ശപിച്ച് ലോകത്തെ ഈ വര്ഷം കൊടും വരള്ച്ചയിലാക്കുമെന്ന് സ്വയം പ്രഖ്യാപിത ദൈവം രമേശ് ചന്ദ്ര ഫെഫാര്. താന് വിഷ്ണുവിന്റെ പത്താം അവതാരം കല്ക്കിയാണെന്ന് അവകാശപ്പെടുന്ന ഫെഫാറിനെ ദീര്ഘകാലം തുടര്ച്ചയായി ജോലിക്ക് എത്താത്തതിനെ തുടര്ന്ന് കാലാവധി പൂര്ത്തിയാകും മുമ്പ് നിര്ബ്ബന്ധിത വിരമിക്കല് ഗുജറാത്ത് സര്ക്കാര് നല്കിയിരുന്നു. ജലവകുപ്പിന് ഇയാള് ഭീഷണിക്കത്ത് അയയ്ക്കുകയായിരുന്നു.
ദുഷ്ടശക്തികളാണ് ഇപ്പോള് സര്ക്കാരില് ഇരിക്കുന്നതെന്നും കത്തില് പറയുന്നു. ഇവര് തന്റെ ഒരു വര്ഷത്തെ ശമ്പളമായ 16 ലക്ഷവും ഗ്രാറ്റിവിറ്റി ഇനത്തിലുളള മറ്റൊരു 16 ലക്ഷവും പിടിച്ചുവെച്ച് തന്നെ പീഡിപ്പിക്കുകയാണ് എന്ന് ഇയാള് പറഞ്ഞിരുന്നു. ഈ പീഡനം തുടര്ന്നാല് വിഷ്ണുവിന്റെ പത്താം അവതാരമായ സാത് യുഗ ദൈവമായ താന് താന് ഭൂമിയില് പല തരത്തിലുള്ള വരള്ച്ച കൊണ്ടുവരും എന്നും കത്തില് ഭീഷണിപ്പെടുത്തുന്നു.
സംസ്ഥാന ജലവിഭവ വകുപ്പിന്റെ ഭാഗമായ സര്ദാര് സരോവര് പുനര്വസ്വത് ഏജന്സിയുടെ സൂപ്രണ്ട് എഞ്ചിനീയറാണ് രമേശ്ചന്ദ്ര ഫെഫാര്. നര്മ്മദാ ഡാം പദ്ധതിയുടെ ഭാഗമായ പുനരധിവാസ പദ്ധതിയുമായി ബന്ധപ്പെട്ട കാര്യമെല്ലാം ചെയ്യുന്നത് ഇവരാണ്. എട്ടു മാസത്തിനിടയില് വെറും 16 ദിവസം മാത്രം ജോലിക്ക് വന്നതിന്റെ പേരില് ഷോകോസ് നോട്ടീസ് കിട്ടിയയാളാണ് രമേശ്ചന്ദ്ര.
ജോലിക്ക് വന്നില്ലെങ്കിലും ശമ്പളം നല്കണമെന്നാണ് കത്തില് ഫെഫാര് പറഞ്ഞിരിക്കുന്നത്. താന് കല്ക്കി അവതാരമായതിനാല് ഭൂമിയില് മഴ പെയ്യിക്കാന് ആവശ്യമായ കാര്യം ചെയ്യുന്ന തിരക്കിലായിരുന്നു എന്നാണ് ഇയാള് അവകാശപ്പെട്ടിരിക്കുന്നത്. താന് കല്കി അവതാരമാണെന്ന ഇയാളുടെ അവകാശ വാദത്തില് അന്വേഷണം നടക്കുകയാണെന്നും ഇയാളുടെ മാനസീക നില ശരിയായ രീതിയില് അല്ലാത്തതിനാല് പ്രീ മച്വര് റിട്ടയര്മെന്റ് അനുവദിക്കുകയാണെന്നും വാട്ടര് റിസോഴ്സ് വിഭാഗം സെക്രട്ടറി വ്യക്തമാക്കി.
കഴിഞ്ഞ രണ്ടു ദശകമായി ഇന്ത്യയ്ക്ക് നല്ല മഴ കിട്ടുന്നതിന് കാരാണം കല്ക്കിയായ താന് ഇവിടെ ഉള്ളതിനാല് ആണെന്നും ഇയാള് കത്തില് അവകാശപ്പെട്ടിട്ടുണ്ട്. ഇതിനിടയില് ഒരിക്കല് പോലും രാജ്യം വരള്ച്ച നേരിട്ടിട്ടില്ല. കഴിഞ്ഞ 20 വര്ഷം കൊണ്ട് ഇന്ത്യയില് ശക്തമായ മഴ പെയ്തതിനാല് 20 ലക്ഷം കോടിയുടെ നേട്ടമുണ്ടായി എന്നും എന്നാല് തന്റെ ശമ്പളത്തിനും ഗ്രാറ്റിവിറ്റിയ്ക്കും മുകളില് ചെകുത്താന്മാരുടെ കട്ടമായ സര്ക്കാര് കയറിയിരുന്ന് തന്നെ അപമാനിക്കുകയാണെന്നും ഇത് തുടര്ന്നാല് താന് വീണ്ടും വരള്ച്ച ഉണ്ടാക്കുമെന്നും പറഞ്ഞു.
