ദുബായ് : ലോകത്തിന്റെ വിവിധ ഭാഗങ്ങളിലേക്ക് എമിറേറ്റ്സ് എയർലൈൻ ഇതുവരെ വിതരണം ചെയ്തത് 600 ടൺ വരുന്ന 15 കോടി ഡോസ് കോവിഡ് വാക്സിനുകൾ.
യു.എ.ഇ. വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ശൈഖ് മുഹമ്മദ് ബിൻ റാഷിദ് അൽ മക്തൂമിന്റെ നിർദേശങ്ങൾക്കനുസരിച്ചാണ് എമിറേറ്റ്സ് എയർലൈൻവഴി ലോകമെമ്പാടുമുള്ള വികസ്വരരാജ്യങ്ങളിൽ കോവിഡ് വാക്സിനുകളുടെ വിതരണം നടത്തിയത്. വാക്സിൻ നിർമാണസ്ഥലങ്ങളിൽനിന്ന് ലോകമെമ്പാടുമുള്ള വികസ്വരരാജ്യങ്ങളിലേക്ക് കോവിഡ് വാക്സിൻ വിതരണംചെയ്യുന്നതിൽ നിർണായക പങ്കുവഹിച്ചതായി എമിറേറ്റ്സ് സ്കൈ കാർഗോ അധികൃതർ വ്യക്തമാക്കി.
ആറുതരം വാക്സിനുകളാണ് ആറുഭൂഖണ്ഡങ്ങളിലെ എൺപതിലേറെ സ്ഥലങ്ങളിലേക്കായി എത്തിച്ചത്. ഒരേസമയം വലിയ അളവിൽ വാക്സിൻ ഡോസുകൾ സംഭരിക്കാനും 48 മണിക്കൂറിനുള്ളിൽ ലോകത്തെ ഏതുസ്ഥലത്തേക്കും അവയെത്തിക്കാനും വിതരണംചെയ്യാനുമുള്ള ശേഷിയുണ്ടെന്ന് ദുബായ് സിവിൽ ഏവിയേഷൻ അതോറിറ്റി പ്രസിഡന്റും ദുബായ് എയർപോർട്ട്സ് ചെയർമാനും എമിറേറ്റ്സ് എയർലൈൻ ആൻഡ് ഗ്രൂപ്പ് ചെയർമാനും ചീഫ് എക്സിക്യുട്ടീവുമായ ശൈഖ് അഹമ്മദ് ബിൻ സയീദ് അൽ മക്തൂം പറഞ്ഞു.
