ന്യൂഡല്ഹി: വമ്പന്മാരുടെ ഫോണ് പെഗാസസ് ചോര്ത്തിയതുമായി ബന്ധപ്പെട്ട വിവാദം കൊടുമ്പിരി കൊള്ളുമ്പോള് ഫോണ് ചോര്ത്തപ്പെട്ടവരില് സുപ്രീംകോടതി മുന് ചീഫ് ജസ്റ്റീസ് രഞ്ജന് ഗോഗോയിക്കെതിരേ ലൈംഗികാരോപണം ഉന്നയിച്ച യുവതിയും ബന്ധുക്കളും. ചാര സോഫ്റ്റ്വെയര് ഉപയോഗിച്ച് പെഗാസസ് ചോര്ത്തിയത് ഗൊഗോയിക്കെതിരെ രംഗത്ത് വന്ന യുവതിയുടെ മൂന്ന് ഫോണ് നമ്പറുകളായിരുന്നു.
യുവതിയുമായി ബന്ധപ്പെട്ട പതിനൊന്ന് ഫോണ് നമ്പറുകളാണ് ചോര്ത്തിയത്. യുവതിയുടെ നമ്പറിന് പുറമെ ഭര്ത്താവിന്റെയും ബന്ധുക്കളുടെയും എട്ട് ഫോണ് നമ്പര് പെഗാസസ് ചോര്ത്തിയിട്ടുണ്ട്. കേസില് ഗോഗോയിയ്ക്ക് നേരത്തേ ക്ലീന്ചിറ്റ് നല്കിയിരുന്നു. ചീഫ് ജസ്റ്റിസായി വിരമിച്ച ശേഷം ഗൊഗോയിയെ ബി.ജെ.പി.രാജ്യസഭയിലേക്ക് നാമനിര്ദ്ദേശം നടത്തുകയും ചെയ്തിരുന്നു. അതേസമയം ഇതില് ഇപ്പോള് ഒന്നും പറയാനില്ല എന്നാണ് ഗോഗോയിയുടെ പ്രതികരണം. 2018 ലാണ് കോടതിയിലെ ജീവനക്കാരിയായിരുന്ന യുവതി രഞ്ജന് ഗൊഗോയിക്കെതിരെ ലൈംഗിക പീഡന പരാതി നല്കിയത്. ഇതിന് പിന്നാലെ ഇവരെ ജോലിയില് നിന്നും പിരിച്ചുവിട്ടു. ഇവരുടെ പരാതി ജസ്റ്റിസ് എസ്.എ ബോബ്ഡെ അധ്യക്ഷനായ സമിതി അന്വേഷിക്കുകയും യുവതി ഉന്നയിച്ച ആരോപണങ്ങളില് കഴമ്പില്ലെന്ന് പറഞ്ഞ് പരാതി തള്ളുകയും ചെയ്തിരുന്നു.
20 രാജ്യങ്ങളില് നിന്നുള്ള 1400 പേരുടെ വിവരങ്ങളാണ് ചോര്ന്നെന്നാണ് പെഗാസസുമായി ഉണ്ടായിരിക്കുന്ന വിവാദത്തില് പറയുന്നത്. ചാര ഗ്രൂപ്പിനെതിരെ നടപടിയാവശ്യപ്പെട്ട് വാട്ട്സ്ആപ്പ് യു.എസ്. ഫെഡറല് കോടതിയെ സമീപിച്ചതോടെയാണ് വിവരം ചോര്ത്തല് അന്ന് ശരിക്കും പുറത്തുവന്നത്. ഇസ്രായേല് ആസ്ഥാനമായി പ്രവര്ത്തിക്കുന്ന സൈബര്കമ്പനിയായ എന്.എസ്.ഒ. ഗ്രൂപ്പ് വികസിപ്പിച്ച സോഫ്റ്റ്വെയര് പ്രോഗ്രാമാണ് പെഗാസസ്. മൊബൈല് ഫോണുകളില് നുഴഞ്ഞുകയറി പാസ്വേഡ് ബന്ധപ്പെടുന്ന ആളുകളുടെ വിവരങ്ങള്, വന്നതും അയച്ചതുമായ മെസേജുകള്, ക്യാമറ, മൈക്രോഫോണ്, സഞ്ചാരപഥം, ജി.പി.എസ്. ലോക്കേഷന് തുടങ്ങി മുഴുവന് വിവരവും ചോര്ത്താന് ഇതിലൂടെ സാധിക്കും.
വിവിധ രാജ്യങ്ങളില് പ്രവര്ത്തിക്കുന്ന 16 മാധ്യമസ്ഥാപനങ്ങള് നടത്തിയ അന്വേഷണത്തിലാണ് ചാരപ്പണിയുടെ വിവരങ്ങള് പുറത്തു വന്നത്. ഐഫോണ് , ആന്ഡ്രോയിഡ് ഫോണുകളില് പെഗാസസ് മാല്വയര് ഉപയോഗിച്ച് മെസേജുകള്, ഫോട്ടോ, ഇമെയില്, ഫോണ്കോളുകള് എന്നിവ ചോര്ത്തി എന്നാണ് വിവരം. മോഡി സര്ക്കാരിലെ നിലവിലുള്ള രണ്ട് മന്ത്രിമാരുടേയും മൂന്ന് പ്രതിപക്ഷ നേതാക്കളുടേയും നാല്പ്പത്തിലേറെ മാധ്യമപ്രവര്ത്തകരുടേയും ചില വ്യവസായികളുടേയും ഫോണുകളും ചോര്ത്തിയതായാണ് പുറത്തു വരുന്ന വിവരം.
