ചെന്നൈ: നായകനും വില്ലനും സഹനടന്മാരുമെല്ലാം മികച്ച പ്രകടനം നടത്തുന്ന സര്പ്പട്ടൈ പരമ്പരയില് നായകന് കബിലനൊപ്പം വില്ലന് വെമ്പുലിയെയും അത്ര പെട്ടെന്നൊന്നും ആരും മറക്കില്ല. സര്പ്പട്ട പരമ്പരയില് പെട്ട മുഴുവന് ബോക്സര്മാരെയും ഇടിച്ചിടുന്ന വെമ്പുലി ജോണ് കൊക്കനെ പാ രഞ്ജിത്ത് സിനിമയിലേക്ക് കാസ്റ്റ് ചെയ്തത് നല്ല വലിപ്പമുള്ള മൃഗം പോലെയൊരു നടനു വേണ്ടിയുള്ള തെരച്ചിലില് നിന്നായിരുന്നു.
സിനിമയില് ഇടത്തരം ബോക്സറും വെമ്പുലി ഇടിച്ചു തകര്ക്കുകയും ചെയ്യുന്ന രാമനെ അവതരിപ്പിച്ച സന്തോഷ് പ്രതാപന് വഴിയാണ് ജോണ് കൊക്കന് സിനിമയില് എത്തിയത്. പാ രഞ്ജിത്തിന്റെ സുഹൃത്തായ സന്തോഷ് പ്രതാപന്റെ സുഹൃത്താണ് ജോണ് കൊക്കന്. ബോക്സിംഗ് പശ്ചാത്തലമാക്കിയ സിനിമയില് വില്ലനാകാന് സാധാരണയില് കവിഞ്ഞ വലിപ്പമുള്ള ഒരാള്ക്ക് വേണ്ടിയുള്ള തെരച്ചിലാണ് കൊക്കനില് എത്തിയത്.
സാര്പ്പട്ടയുടെ കാസ്റ്റിംഗ് വന്നപ്പോള് രഞ്ജിത്ത് നല്ല വലിപ്പമുള്ള, ഒരു മാതിരി മൃഗം പോലെയുള്ള ആരെയെങ്കിലും അറിയുമോ എന്ന് സന്തോഷിനോട് ചോദിച്ചു. അപ്പോള് സന്തോഷ് കൊക്കനെക്കുറിച്ച് പറയുകയും കൊക്കന് പിന്നീട് രഞ്ജിത്തിനെ പോയി കാണുകയുമായിരുന്നു. കഥാപാത്രത്തിന് ഓകെയാണെന്നും എന്നാല് ശരീരം കുറച്ചു കൂടി കൂട്ടണന്നെും പറഞ്ഞു. ബോക്സിംഗ് ഒക്കെയുള്ള പടമാണെന്നും രണ്ടു മാസം കൊണ്ട് ശരീരം വലിപ്പപ്പെടുത്തുകയും കുറച്ച് ബോക്സിംഗ് മൂവ്മെന്റുകള് പരിശീലിച്ച ശേഷം വരാനും ആവശ്യപ്പെട്ടു.
ആ രണ്ട് മാസം ഒരു പരിശീലകനെ വെച്ച് ബോക്സിംഗ് ഒക്കെ പഠിച്ച ശേഷം പോയി കണ്ടപ്പോള് ബോക്സിംഗ് റിംഗിലെ മൂവ്മെന്റുകള് ചുമ്മാ കാണിക്കാന് പറഞ്ഞു. അങ്ങനെ മൂവ്മെന്റൊക്കെ നോക്കി ചെക്ക് ചെയ്ത ശേഷമാണ് പടത്തിലേക്ക് സെലക്ട് ചെയ്തത്. ബിഹൈന്ഡ് വുഡ്സിന് നല്കിയ അഭിമുഖത്തിലാണ് ജോണിന്റെ പ്രതികരണം. ചിത്രം ഇത്രയധികം ഹിറ്റ് ആകുമെന്ന് പ്രതീക്ഷിച്ചിരുന്നില്ലെന്നാണ് കൊക്കന്റെ പ്രതികരണം.
ചിത്രത്തിലെ നായകന് കബിലന് ഒപ്പം നില്ക്കുന്ന കഥാപാത്രമായിരുന്നു ജോണ് കൊക്കന്റെ വെമ്പുലിയും. ജൂലൈ 22ന് ആമസോണില് റിലീസ് ചെയ്ത സര്പാട്ട പരമ്പരൈയ്ക്ക് മികച്ച പ്രതികരണമാണ് ലഭിക്കുന്നത്. പാ രഞ്ജിത്ത് തന്നെയാണ് ചിത്രത്തിന്റെ തിരക്കഥയും എഴുതിയിരിക്കുന്നത്. 1970കളില് ചെന്നൈയില് നിലനിന്നിരുന്ന ബോക്സിംഗ് സംസ്ക്കാരവും ജാതിമഹിമയുമൊക്കെയാണ് ചിത്രത്തിന്റെ പശ്ചാത്തലം.
