2014 ലാണ് നടൻ ഹൃത്വിക് റോഷനും ഭാര്യ സൂസെയ്ന് ഖാനും വേർപിരിഞ്ഞത്. 14 വർഷത്തെ ദാമ്പത്യത്തിനു ശേഷമായിരുന്നു ഈ വേർപിരിയൽ. അതിനുശേഷം ഇരുവരും പുതിയ പങ്കാളികളെ കണ്ടെത്തുകയും അടുത്ത സുഹൃത്തുക്കളായി തുടരുകയും ചെയ്തു. മക്കളുടെ ജന്മദിനാഘോഷങ്ങളിൽ ഇരുവരും ഒരുമിച്ച് പങ്കെടുക്കാറുമുണ്ട്. എന്നാൽ അടുത്തിടെ സൂസെയ്നെതിരെ സോഷ്യൽ മീഡിയയിൽ ഗുരുതരമായ ആരോപണങ്ങൾ ഉയർന്നിരുന്നു. വിവാഹമോചന സമയത്ത് ജീവനാംശമായി ഹൃത്വിക് സൂസൈന് 400 കോടി രൂപ നൽകിയിട്ടുണ്ടെന്നായിരുന്നു ആരോപണം. ഇപ്പോഴിതാ ഇതിനെതിരെ പ്രതികരിച്ചിരിക്കുകയാണ് സൂസെയ്ന്റെ സഹോദരി ഫറ ഖാൻ അലി.
തന്റെ സഹോദരി പണത്തോട് ആർത്തി കാണിക്കുന്ന വ്യക്തിയല്ലെന്നും അവർ 400 കോടി വാങ്ങിയിട്ടില്ലെന്നും അടുത്തിടെ നൽകിയ അഭിമുഖത്തിൽ ഫറ വ്യക്തമാക്കി.
"പണത്തേക്കാൾ ബന്ധങ്ങൾക്കാണ് പ്രാധാന്യം നൽകേണ്ടതെന്നാണ് ഞങ്ങളുടെ അമ്മ ഞങ്ങളെ പഠിപ്പിച്ചിട്ടുള്ളത്. എന്റെ സഹോദരിക്ക് 400 കോടി രൂപ വാങ്ങേണ്ട ആവശ്യമില്ല. സോഷ്യൽ മീഡിയയിൽ കാണുന്നതെല്ലാം കള്ളമാണ്. ഇന്നും എന്റെ സഹോദരി മുൻ ഭർത്താവ് ഹൃത്വിക്കുമായും അദ്ദേഹത്തിന്റെ മാതാപിതാക്കളായ രാകേഷ് റോഷൻ, പിങ്കി എന്നിവരുമായും മികച്ച ബന്ധമാണ് സൂക്ഷിക്കുന്നത്. അവർ ഇപ്പോഴും അവളെ സ്നേഹിക്കുന്നുണ്ട്.
അവരുടെ ബന്ധത്തിൽ ഉലച്ചിലുകൾ വന്നപ്പോൾ ഇരുവരും ഒരുമിച്ചെടുത്ത തീരുമാനമാണ് വിവാഹമോചനം. അതൊരിക്കലും കുടുംബബന്ധങ്ങളെ ബാധിച്ചിട്ടില്ല. ഇപ്പോഴും പഴയതുപോലെ തന്നെയാണ് എല്ലാം. വളരെ മാന്യമായിട്ട് മാത്രമേ എന്റെ സഹോദരി ഇതുവരെ പെരുമാറിയിട്ടുള്ളൂ. അവർ വിവാഹമോചിതരാകുന്നുവെന്ന് പറഞ്ഞപ്പോൾ എല്ലാവരും ഞെട്ടിപ്പോയി. ചിലർക്ക് കരച്ചിലടക്കാനായില്ല. പക്ഷേ, അവരുടെ തീരുമാനം അംഗീകരിക്കാതെ മറ്റു വഴികളില്ലായിരുന്നു. വിവാഹമോചനം അവർ രണ്ടുപേരും മനോഹരമായി കൈകാര്യം ചെയ്തു. സൗഹൃദത്തോടെ തന്നെ വേർപിരിഞ്ഞു." ഫറ ഖാൻ പറഞ്ഞു.
സോഷ്യൽ മീഡിയയിലെ ആരോപണങ്ങളെ എന്തുകൊണ്ട് പ്രതിരോധിക്കുന്നില്ലെന്ന് താൻ സൂസെയ്നോട് ചോദിച്ചിരുന്നുവെന്നും ഫറ പറയുന്നു. ആളുകൾ തന്നെക്കുറിച്ച് എന്ത് വിചാരിച്ചാലും തനിക്ക് പ്രശ്നമില്ലെന്നായിരുന്നു സൂസെയ്ന്റെ മറുപടി.
വിവാഹമോചനത്തിന് ശേഷം നടൻ അർസലൻ ഗോണിയുമായി സൂസെയ്ൻ ഖാൻ പ്രണയത്തിലായി. ഇപ്പോൾ ഇരുവരും ഒരുമിച്ചാണ് താമസം. നടി സബ ആസാദാണ് ഹൃത്വിക്കിന്റെ പുതിയ പങ്കാളി. 2022 ലാണ് ഇരുവരും തമ്മിലുള്ള പ്രണയം തുടങ്ങിയത്.
