ന്യൂഡല്ഹി: എല്ജെപി നേതാവ് രാംവിലാസ് പസ്വാന് മൂന്നു ദശകങ്ങളോളം ചെലവഴിച്ച ഡല്ഹിയിലെ ല്യൂട്ടന്സ് ജന്പഥ് 12 ലെ ബംഗ്ളാവിനെ ചൊല്ലി തര്ക്കം. മകന് ചിരാഗ് പസ്വാനെ ഒഴിപ്പിക്കാന് ബിജെപി പാടു പെടുമ്പോള് ബംഗ്ളാവിനെ മ്യുസിയമാക്കി മാറ്റണമെന്ന ആവശ്യം ഉയര്ത്തുകയാണ് എല്ജെപി. ദളിത് വോട്ടുകള്ക്ക് വലിയ സ്വാധീനമുള്ള യുപി തെരഞ്ഞെടുപ്പ് നടക്കാനിരിക്കെ ചിരാഗിനെ പുറത്താക്കല് താല്ക്കാലികമായി മാറ്റി വെച്ചിരിക്കുകയാണ് ബിജെപി.
പാര്ട്ടിയില് പിതാവിന്റെ പാരമ്പര്യം പിടിക്കാന് അമ്മാവനുമായി ഏറ്റുമുട്ടുന്ന മകന് ചിരാഗ് കഴിഞ്ഞ 30 വര്ഷമായി കുടുംബത്തോടൊപ്പം ഇവിടെയാണ് താമസിക്കുന്നത്. പസ്വാന്റെ കുടുംബത്തോട് ഇവിടെ നിന്നും മാറാന് കേന്ദ്രസര്ക്കാര് നിര്ദേശം നല്കിയിരിക്കുകയാണ്. ബംഗ്ളാവില് നിന്നും മാറാന് ഒക്ടോബറിലേക്ക് അന്ത്യശാസനം നല്കിയിരിക്കെ എല്ജെപി അനുയായികള് പസ്വാന്റെ ഒരു അര്ദ്ധകായ പ്രതിമ ബംഗ്ളാവില് കൊണ്ടുവെച്ചത് വലിയ തര്ക്കത്തിന് കാരണമായി മാറിയിരിക്കുകയാണ്.
ബംഗ്ളാവില് നിന്നും പസ്വാന് കുടുംബത്തെ ഒഴിപ്പിച്ച ശേഷം റെയില്വേമന്ത്രി അശ്വിനി വൈഷ്ണവിന് കൈമാറാനാണ് ഉദ്ദേശം. കഴിഞ്ഞ വര്ഷം പസ്വാന് മരിച്ച ശേഷം അശ്വിനി വൈഷ്ണവിന് അനുവദിക്കുകയും ചെയ്തിരുന്നു. എന്നാല് യുപി തെരഞ്ഞെടുപ്പ് അടുത്ത വര്ഷം നടക്കാനിരിക്കെ ബിജെപിയ്ക്ക് പസ്വാന് ശക്തമായ സ്വാധീനമുള്ളതിനാല് ദളിത് വോട്ടുകളെ പിണക്കാനും വയ്യ. അതുകൊണ്ട് ഒഴിപ്പിക്കല് തീരുമാനം രണ്ടോ മൂന്നോ മാസം തള്ളിവെച്ചേക്കുമെന്നാണ് വിവരം.
ബീഹാറില് നിന്നുള്ള എംപി കൂടിയായ ചിരാഗിന് നോര്ത്ത് അവന്യുവിലെ 23 ാം നമ്പര് വീട് നഗരവികസന മന്ത്രാലയം അനുവദിക്കുകയും ചെയ്തിട്ടുണ്ട്. എന്നാല് അതിനിടയിലാണ് പസ്വാന്റെ അര്ദ്ധകായ പ്രതിമ വെച്ച് എല്ജെപി പ്രവര്ത്തകര് വിഷയം രാഷ്ട്രീയമാക്കി മാറ്റിയിരിക്കുന്നത്. ഇതിനൊപ്പം ചിരാഗ് അടുത്തിടെ ഇന്ത്യാ - ചൈന യുദ്ധത്തില് പങ്കെടുത്തതിന്റെ പേരില് പരംവീര ചക്ര കിട്ടിയ യുപിയിലെ ഷഹീദ് അബ്ദുള് ഹമീദിന്റെ ജന്മദേശമായ ഗാസിപ്പൂരില് പോയതും ബിജെപിയ്ക്ക് സംശയം ഉയര്ത്തിയിട്ടുണ്ട്. പുതിയതായി ഒരു ദളിത് - മുസ്ളീം ഐക്യം രൂപപ്പെടാനും അത് എല്ജെപി ചൂഷണം ചെയ്യുമോ എന്നുമാണ് ബിജെപിയുടെ സംശയം.
നിലവില് ബീഹാറില് ജന് ആശീവാദ് യാത്രയിലാണ് ചിരാഗ്. പാറ്റ്നയില് സെപ്തംബര് 12 ന് പിതാവിന്റെ അനുസ്മരണവും ന ടത്തുന്നുണ്ട്. ഇതിലേയ്ക്ക് എല്ലാവരേയും ക്ഷണിച്ചിട്ടുണ്ട്. ഇത് പിഎം ല് നിന്നും സിഎമ്മിലേക്കുള്ള ചുവടുമാറ്റമാണെന്ന് എല്ജെപി നേതാക്കളും പറയുന്നു. യുപി, ബീഹാര് തെരഞ്ഞെടുപ്പുകളില് ദളിത് വോട്ടുകളുടെ പ്രാധാന്യം കൃത്യമായി അറിയാവുന്ന ബിജെപി അത് മുന് നിര്ത്തിയാണ് ചിരാഗിനെ ഒഴിപ്പിക്കുന്നത് നീട്ടി വെച്ചത്.
തെരഞ്ഞെടുപ്പ് കഴിയുമ്പോള് ചിരാഗിനെ പുറത്താക്കാമെന്നാണ് ബിജെപി കരുതുമ്പോള് ബംഗ്ളാവ് രാം വിലാസ് പസ്വാന്റെ സ്മാരകമാക്കണമെന്ന ആവശ്യം ഉന്നയിക്കുകയാണ് എല്ജെപി. ഇതിന് എന്ഡിഎയില് ദളിത് നേതാവ ജീതന്റാം മാഞ്ചിയുടെ ഹിന്ദുസ്ഥാനി അവാം മോര്ച്ച പിന്തുണയ്ക്കുന്നുമുണ്ട്. അതേസമയം ബംഗ്ളാവിനെ മെമ്മോറിയല് ആക്കാനാകില്ലെന്നും ഇക്കാരാ്യത്തില് സുപ്രീംകോടതിയുടെ വിധി മാനിക്കണമെന്നുമാണ് സര്ക്കാര് പറയുന്നത്.
