അരിസോണ : ഒരു വര്ഷത്തിനിടെ കാമുകി യുവാവിന് അയച്ചത് 65,000-ലധികം മെസേജുകള്. ലെക്സി എന്ന ഡേറ്റിങ് ആപ്പില് വെച്ച് പരിചയപ്പെട്ട ജാക്വലിന് എന്ന 33-കാരിയാണ് യുവാവിന് ഇത്രയധികം മെസേജുകള് അയച്ചത്. യുവതിയുടെ ശല്യം കൂടിയപ്പോള് യുവാവ് പ്രതികരിയ്ക്കാതെയായി. ഇതോടെ കാമുകി യുവാവിന്റെ വീട്ടില് അതിക്രമിച്ച് കയറുകയും ചെയ്തു.
ആദ്യത്തെ ഡേറ്റിങ്ങിന് ശേഷം കാമുകി യുവാവിന് മെസേജുകള് അയക്കുകയായിരുന്നു. ക്രമത്തില് അധികം മെസേജുകള് എത്തിയതോടെ യുവാവ് പ്രതികരിയ്ക്കാതെയായി. ഇതോടെ ജാക്വലിന് പരിഭ്രാന്തയാകുകയും പഴയതിന്റെ ഇരട്ടി മെസേജുകള് അയക്കുകയുമായിരുന്നു. യുവാവിന് ഒരു ദിവസം 500 അധികം മെസേജുകള് കിട്ടാന് തുടങ്ങി. യുവാവിനെ ശാരീരികമായി ഉപദ്രവിയ്ക്കും എന്നുള്ള തരത്തിലുള്ള ഭീഷണിപ്പെടുത്തലുകളായിരുന്നു മെസേജുകളില് അധികവും. ഇതോടെ ജാക്വലിനെ യുവാവ് ബ്ലോക്ക് ചെയ്തു. തന്നെ ബ്ലോക്ക് ചെയ്തതോടെ യുവാവിന്റെ വീട്ടില് അതിക്രമിച്ച് കയറുകയായിരുന്നു ജാക്വലിന്. മാത്രമല്ല ബാത്ത് ടബ്ബില് ഒരു കുളിയും പാസാക്കി. വീട്ടില് ഇല്ലാതിരുന്ന യുവാവ് സിസിടിവിയിലൂടെ ജാക്വലിന് വീട്ടില് കയറിയത് കണ്ടു. തുടര്ന്ന് പോലീസില് പരാതി നല്കി.
യുവാവിന്റെ വീട്ടില് അതിക്രമിച്ചു കയറിയത് എന്തിനാണെന്ന് ചോദിച്ച പോലീസിനോട് തന്നെ അവന് ബ്ലോക്ക് ചെയ്തു കളഞ്ഞതു കൊണ്ടാണെന്നും തനിക്ക് അവനോട് ബന്ധപ്പെടാന് ഇതല്ലാതെ വേറെ മാര്ഗ്ഗമില്ലായിരുന്നു എന്നുമാണ് ജാക്വിലിന് പറഞ്ഞത്.
മറ്റുള്ളവരെപ്പോലെ ഞങ്ങളും വിവാഹിതരാവും എന്ന് താന് പ്രതീക്ഷിച്ചെന്നും ജാക്വലിന് പറഞ്ഞു. അന്വേഷണത്തിന് ശേഷം ജാക്വിലിനെതിരെയുള്ള ട്രെസ് പാസിംഗ് കേസുകള് പിന്വലിക്കപ്പെടുകയും അവളെ മാനസിക ചികിത്സാ കേന്ദ്രത്തിലേക്ക് കോടതി വിടുകയും ചെയ്തു.
