പത്തനംതിട്ട: സെമി ഹൈസ്പീഡ് റെയില് പദ്ധതിയായ സില്വര് ലൈനിനുവേണ്ടി സ്ഥലം ഏറ്റെടുക്കുന്നതിന് മൂന്നു ജില്ലകളില് സര്വേ നടത്താന് റവന്യു വകുപ്പ് വിജ്ഞാപനമിറക്കി. പത്തനംതിട്ട, എറണാകുളം, കണ്ണൂര് ജില്ലകളിലാണ് ആദ്യഘട്ട സര്വേ നടക്കുക. മറ്റു ജില്ലകളിലും സര്വേ നടപടികള്ക്കായി അതത് ജില്ലാ കലക്ടര് വിജ്ഞാപനമിറക്കും.പദ്ധതി നടത്തിപ്പ് സംസ്ഥാന സ്ഥാപനമായ കെ-റെയിലിനാണെങ്കിലും ഭൂമി ഏറ്റെടുത്തു നല്കേണ്ടത് റവന്യു വകുപ്പാണ്. അതിനാല് ലൈന് കടന്നുപോകുന്ന ജില്ലകളിലെ കലക്ടര്മാര്ക്കാണ് ഇത് സംബന്ധിച്ച ചുമതല.
1961-ലെ കേരള സര്വേയും അതിര്ത്തിയും സംബന്ധിച്ച നിയമത്തിലെ ആറാം വകുപ്പ് പ്രകാരമുള്ള പരസ്യമാണ് ഗസറ്റില് വന്നിട്ടുള്ളത്.എറണാകുളം ജില്ലയില് കണയന്നൂര് താലൂക്കിലെ കാക്കനാട്, കുരിക്കാട്, തിരുവാങ്കുളം, കുന്നത്തുനാട് താലൂക്കിലെ കിഴക്കമ്പലം, കുന്നത്തുനാട്, പുത്തന്കുരിശ്, തിരുവാണിയൂര്, മൂവാറ്റുപുഴ താലൂക്കിലെ മണീട്, പിറവം, ആലുവാ താലൂക്കിലെ ആലുവാ ഈസ്റ്റ്, അങ്കമാലി, ചൊവ്വര, കീഴ്നാട്, നെടുമ്പാശേരി, പാറക്കടവ് എന്നീ വില്ലേജുകളിലാണ് സര്വേ നടപടികള് ആരംഭിക്കുന്നത്.
സര്വേ ചെയ്യുന്നതിനായി നിശ്ചയിച്ചിട്ടുള്ള ഭൂമിയുടെ ബ്ലോക്ക് നമ്പരും സര്വേ നമ്പരും ഗസറ്റ് പരസ്യത്തോടൊപ്പം നല്കിയിട്ടുണ്ട്. ഭൂമിയുടെ ഉടമസ്ഥര്, സര്വേ സംഘത്തിന് അതിരുകള് കാണിച്ചുകൊടുക്കണമെന്നും ഭൂമി സംബന്ധിച്ച വിവരങ്ങള് നല്കുന്നതിനൊപ്പം ജീവനക്കാര്ക്ക് പൂര്ണ സഹകരണം നല്കണമെന്നും പരസ്യത്തില് പറയുന്നു.കോട്ടയം, കൊല്ലം, തിരുവനന്തപുരം ജില്ലകളിലും സര്വേ നടപടികള്ക്കായുള്ള ജോലികള് പുരോഗമിക്കുന്നുവെന്നാണ് സൂചന. വൈകാതെ ഇതിനായി ഡെപ്യൂട്ടി തഹസില്ദാര് ചുമതലയേല്ക്കും. എത്രയും വേഗം സര്വേ പൂര്ത്തിയാക്കി കല്ലിടാനുള്ള നീക്കമാണു നടക്കുന്നത്. ഇതിനായുള്ള സര്വേക്കല്ലുകള് ദിവസങ്ങള്ക്കുള്ളില് എത്തിക്കും.
റെയില്വേയെ തെറ്റിദ്ധരിപ്പിക്കാനെന്ന് ആരോപിച്ച് സമരസമിതി
പത്തനംതിട്ട: സ്ഥലമെടുപ്പിനുള്ള സര്ക്കാര് നീക്കം കേന്ദ്ര റെയില്വേ മന്ത്രാലയത്തെ തെറ്റിദ്ധരിപ്പിക്കാനുള്ള നടപടിയാണെന്ന് സില്വര് ലൈന് വിരുദ്ധ സമരസമിതിയുടെ ആരോപണം.
പദ്ധതി സംബന്ധിച്ചുള്ള പാരിസ്ഥിതിക പഠനം തുടങ്ങിയിട്ടില്ല. പഠനം നടത്തിയ ശേഷം എസ്റ്റിമേറ്റ് പുതുക്കേണ്ടിവരും. സാമൂഹിക ആഘാത പഠനവും നടക്കേണ്ടതുണ്ട്. പദ്ധതിയുടെ രൂപരേഖയില് സമഗ്രമാറ്റം ആവശ്യമാണെന്ന് കെ-റെയില് അധികൃതരോട് ദക്ഷിണ റെയില്വേ ആവശ്യപ്പെട്ടിരുന്നു. ഇതിന് പരിഹാരം കാണാതെ പദ്ധതിക്കു കേന്ദ്ര അംഗീകാരം ലഭിക്കില്ല.
ബജറ്റില് വകകൊള്ളിച്ചിട്ടില്ലാത്ത പദ്ധതിയായതിനാല് കേന്ദ്രത്തിന് ഇതേപ്പറ്റി സമഗ്ര വിശദീകരണം നല്കാന് സംസ്ഥാനത്തിനു കഴിഞ്ഞിട്ടില്ല. ഇതിനായി കഴിഞ്ഞ ദിവസം ഡല്ഹിക്ക് പോയ കെ-റെയില് ഉന്നതര് ആരേയും കാണാതെ മടങ്ങിയെത്തിയെന്നും ആക്ഷേപമുണ്ട്.
നടപടികള് ഏറെ ശേഷിക്കുകയാണെങ്കിലും കാലേകൂട്ടി സര്വേ നടത്താന് സംസ്ഥാന സര്ക്കാര് ശ്രമിക്കുന്നത് പദ്ധതിയുമായി ഏറെ മുന്നോട്ടുപോയെന്ന് വരുത്തിത്തീര്ക്കാനായാണെന്നും സമരസമിതി പറഞ്ഞു.
സജിത്ത് പരമേശ്വരന്
