തിരുവനന്തപുരം: പാതിരാത്രിയില് വരുന്ന ഫോണ് കോളുകള് ശ്രദ്ധയോടെ കൈകാര്യം ചെയ്യണമെന്ന് ഉന്നത പോലീസ് ഉദ്യോഗസ്ഥരുടെ യോഗത്തില് സംസ്ഥാന പോലീസ് മേധാവി അനില്കാന്തിന്റെ മുന്നറിയിപ്പ്. പോലീസ് ഉദ്യോഗസ്ഥരെ ഉന്നമിട്ടു ഹണിട്രാപ്പുകള് നടക്കുന്ന സാഹചര്യത്തിലാണിത്.
പോലീസ് ഉദ്യോഗസ്ഥര് ഫോണ് കെണിയില്പെടുന്നത് അപമാനകരമാണെന്നും സേനയുടെ മനോവീര്യത്തെ ബാധിക്കുമെന്നും യോഗം വിലയിരുത്തി. ഓണ്ലൈന് യോഗത്തില് എ.ഡി.ജി.പി: മനോജ് എബ്രഹാമും സംബന്ധിച്ചു.
എസ്.എച്ച്.ഒ. മുതലുളള എല്ലാ ഉദ്യോഗസ്ഥരുടെയും പൊതുജനസമ്പര്ക്കം മാന്യമായിരിക്കണമെന്ന് ഡി.ജി.പി. കഴിഞ്ഞ ദിവസം സര്ക്കുലര് ഇറക്കുകയും ചെയ്തു. പോലീസ് ഉദ്യോഗസ്ഥരുമായി നടത്തിയ യോഗത്തില് മുഖ്യമന്ത്രി പിണറായി വിജയന് നല്കിയ മാര്ഗനിര്ദേശങ്ങള് ഉള്ക്കൊള്ളിച്ചാണ് സര്ക്കുലര്.
ഗുരുതര കൃത്യങ്ങളുടെ കുറ്റപത്രം സബ്ഡിവിഷന് ഓഫീസര്മാര് സമയബന്ധിതമായി പരിശോധിക്കണം. സ്റ്റേഷനുകളില് ലഭിക്കുന്ന എല്ലാ പരാതിയും പരിഗണിക്കണം. നിയമപരമായ പരിമിതിയുണ്ടെങ്കില് പരാതിക്കാരെ ബോധ്യപ്പെടുത്തണം. കുട്ടികളെ ലൈംഗികാതിക്രമത്തിന് ഇരയാക്കുന്നവരോട് വിട്ടുവീഴ്ച പാടില്ല. യൂണിഫോം ധരിച്ച് പൊതുപരിപാടികളില് പങ്കെടുക്കരുതെന്നും സര്ക്കുലറില് പറയുന്നു.
