കൊച്ചി: അതിവേഗ റെയില്പാതയായ കെ-റെയിലിനായി വ്യക്തികളുടെ ഭൂമിയില് സര്വേ കല്ലുകള് സ്ഥാപിക്കുന്നതു ഹൈക്കോടതി താല്ക്കാലികമായി തടഞ്ഞു. സില്വര് ലൈന് അതിവേഗ റെയില്പാതയ്ക്കായി നിയമവ്യവസ്ഥകള് പാലിക്കാതെ സ്വകാര്യവ്യക്തികളുടെയും മറ്റും ഭൂമിയില് കെ റെയില് എന്നു രേഖപ്പെടുത്തിയ കോണ്ക്രീറ്റ് സര്വേ കല്ലുകള് സ്ഥാപിക്കരുതെന്നു ഹൈക്കോടതി ഉത്തരവില് വ്യക്തമാക്കി. എന്നാല് സര്ക്കാര് പുറപ്പെടുവിച്ചവിജ്ഞാപനത്തിന്റെ അടിസ്ഥാനത്തില് സര്വേ നടപടികള് തുടരുന്നതില് തടസമില്ലെന്നും ജസ്റ്റിസ് ദേവന് രാമചന്ദ്രന് വ്യക്തമാക്കി.
ഭൂമി ഏറ്റെടുക്കല് നിയമപ്രകാരം വിജ്ഞാപനം പുറപ്പെടുവിക്കുകയോ ഇതിന്റെ അടിസ്ഥാനത്തില് സ്ഥലമെടുപ്പിന് അനുമതി ലഭിക്കുകയോ ചെയ്തിട്ടില്ലെന്നിരിക്കേ നിയമവിരുദ്ധമായി സ്വകാര്യഭൂമികളില് കൈയേറി കെ റെയില് എന്നു രേഖപ്പെടുത്തിയ കോണ്ക്രീറ്റ് കല്ലുകള് സ്ഥാപിക്കുന്നതായി ചൂണ്ടിക്കാട്ടി കോട്ടയം സ്വദേശികളായ മുരളികൃഷ്ണന്, കുര്യന് ടി. കുര്യന്, പി.എ ജോണിക്കുട്ടി എന്നിവര് നല്കിയ ഹര്ജിയിലാണ് ഇടക്കാല ഉത്തരവ്. ഹര്ജി വീണ്ടും ജനുവരി 12ന് പരിഗണിക്കും.
സില്വര് ലൈന് പദ്ധതിയുടെ സ്ഥലമെടുപ്പിന് അംഗീകാരമാകും മുമ്പേയാണ് 1964ലെ കേരള സര്വേ ആന്ഡ് ബൗണ്ടറീസ് നിയമപ്രകാരം വിജ്ഞാപനം പുറപ്പെടുവിച്ചു സ്വകാര്യ ഭൂമിയില് കോണ്ക്രീറ്റ് കല്ലുകള് സ്ഥാപിക്കുന്നതെന്ന് ഹര്ജിക്കാര് ആരോപിച്ചു. ബൗണ്ടറീസ് നിയമപ്രകാരമുള്ള അളവിലുള്ള കല്ലുകളല്ല സ്ഥാപിച്ചിരിക്കുന്നതെന്നും ഹര്ജിക്കാര് കോടതിയില് അറിയിച്ചു. നിയമപ്രകരം 60 സെന്റീമീറ്റര് നീളമുള്ള കല്ലുകള് സ്ഥാപിക്കുന്നതിനു പകരം ഇതിലും വലിപ്പമുള്ള കല്ലുകളാണ് സ്ഥാപിക്കുന്നതെന്നും ഹര്ജിക്കാര് ചൂണ്ടിക്കാട്ടി. ഈ വാദം അംഗീകരിച്ചാണ് കോടതി ഇടക്കാല ഉത്തരവ് പുറപ്പെടുവിച്ചത്.
പദ്ധതിക്ക് കേന്ദ്ര റെയില്വേ മന്ത്രാലയത്തിന്റെ അനുമതി ലഭിക്കും മുമ്പ് ഭൂമി ഏറ്റെടുക്കുന്ന നടപടിയെ ചോദ്യം ചെയ്ത് സില്വര് ലൈന് വിരുദ്ധ സമര സമിതി കൊടുത്ത കേസില് ചീഫ് സെക്രട്ടറിയുടെ മറുപടി തേടിയിരിക്കുകയാണ് കോടതി.
