പത്തനംതിട്ട : സില്‍വര്‍ ലൈനിനുവേണ്ടി സംസ്‌ഥാന സര്‍ക്കാര്‍ കല്ലിട്ടത്‌ ഭൂമി ഏറ്റെടുക്കല്‍ നിയമവും കഴിഞ്ഞ വര്‍ഷം ജനുവരിയിലെ ഹൈക്കോടതി ഉത്തരവും ലംഘിച്ച്‌. സില്‍വര്‍ ലൈന്‍ വിരുദ്ധ സമരസമിതി സമര്‍പ്പിച്ച ഹര്‍ജിയില്‍ ഹൈക്കോടതി നോട്ടീസയച്ചിട്ടും ചീഫ്‌ സെക്രട്ടറി പ്രതികരിക്കാന്‍ തയാറാകാത്തതു ദുരൂഹം.
വിവിധ പദ്ധതികള്‍ക്കായി വ്യക്‌തികളില്‍നിന്നു ഭൂമി ഏറ്റെടുക്കുന്നതിനു മുന്നോടിയായി പാലിക്കേണ്ട വ്യവസ്‌ഥകള്‍ 2013-ല്‍ പാര്‍ലമെന്റ്‌ പാസാക്കിയ "ലാന്‍ഡ്‌ അക്വിസിഷന്‍, റീ ഹാബിലിറ്റേഷന്‍ ആന്‍ഡ്‌ റീസെറ്റില്‍മെന്റ്‌" നിയമത്തില്‍ നിഷ്‌കര്‍ഷിച്ചിട്ടുണ്ട്‌. ഇതിനായി റവന്യു വകുപ്പിനു കീഴില്‍ ഒരു അഡ്‌മിനിസ്‌ട്രേറ്ററെ നിയോഗിക്കണം. ഏതൊക്കെ ഭൂമിയാണ്‌ ഏറ്റെടുക്കുന്നതെന്ന്‌ അതത്‌ ഗ്രാമസഭയെ മുന്‍കൂട്ടി അറിയിച്ചശേഷം പ്രത്യേകം വിജ്‌ഞാപനം ഇറക്കണം. തഹസില്‍ദാര്‍, ആര്‍.ഡി.ഒ. എന്നിവരുടെ നേതൃത്വത്തില്‍ കലക്‌ടര്‍ക്കാണ്‌ ഭൂമി ഏറ്റെടുക്കാന്‍ അവകാശം.
ഭൂമി ഏറ്റെടുക്കുന്നതിന്‌ മുമ്പ്‌ നഷ്ടപരിഹാരം പൂര്‍ണമായും കൊടുത്തിരിക്കണം. ഏറ്റെടുത്ത ആവശ്യത്തിനായി അഞ്ചു വര്‍ഷത്തിനുള്ളില്‍ ഉപയോഗിച്ചില്ലെങ്കില്‍ ഭൂമി ഉടമയ്‌ക്കു തിരിച്ചുനല്‍കാനും വ്യവസ്‌ഥയുണ്ട്‌. ഈ നടപടികളൊന്നും പൂര്‍ത്തിയാക്കാതെയാണു കെ-റെയില്‍ അധികൃതര്‍ ഇപ്പോള്‍ ഭൂമി ഏറ്റെടുക്കുന്നതെന്നു വിദഗ്‌ധര്‍ പറയുന്നു.
അനധികൃതമായി ഭൂമി ഏറ്റെടുക്കാനുള്ള നടപടിയാണ്‌ സര്‍ക്കാര്‍ നടത്തുന്നതെന്നാരോപിച്ച്‌ സില്‍വര്‍ ലൈന്‍ വിരുദ്ധ സമരസമിതി കഴിഞ്ഞ വര്‍ഷം ജനുവരിയില്‍ ഹൈക്കോടതിയെ സമീപിച്ചിരുന്നു. നിയമം പാലിച്ചുകൊണ്ട്‌ ഭൂമി ഏറ്റെടുക്കാന്‍ ഹൈക്കോടതി,അനുമതി നല്‍കി. പദ്ധതിക്ക്‌ കേന്ദ്രാനുമതി ലഭിക്കുന്നതുവരെ തുടര്‍നടപടി ഉണ്ടാകില്ലെന്നു കെ-റെയില്‍ അധികൃതര്‍ കോടതിയില്‍ ഉറപ്പുനല്‍കുകയും ചെയ്‌തു. എന്നാല്‍, ഈ ഉറപ്പ്‌ ലംഘിച്ചാണ്‌ കഴിഞ്ഞ ഓഗസ്‌റ്റ്‌ 18-ന്‌ കെ-റെയില്‍ അധികൃതര്‍ ഭൂമി ഏറ്റെടുക്കുന്നതിനായി പദ്ധതി കടന്നുപോകുന്ന ഓരോ ജില്ലയിലും തഹസില്‍ദാര്‍ ഉള്‍പ്പെട്ട 11 അംഗ സെല്‍ രൂപീകരിച്ചത്‌. സാമൂഹിക ആഘാത പഠനം നടത്താനെന്ന പേരിലായിരുന്നു ഇത്‌. തുടര്‍ന്നാണു കഴിഞ്ഞ മാസം സംസ്‌ഥാനത്ത്‌ കെ റെയില്‍ എന്നു രേഖപ്പെടുത്തിയ കല്ലുകള്‍ സ്‌ഥാപിക്കാന്‍ തുടങ്ങിയത്‌.
സമരസമിതി വീണ്ടും സമീപിച്ചതിനെത്തുടര്‍ന്നു ഹൈക്കോടതി സര്‍ക്കാരിന്റെ വിശദീകരണം തേടി ചീഫ്‌ സെക്രട്ടറിക്കും കെ-റെയില്‍ എം.ഡി: വി.അജിത്തിനും കത്തയച്ചു. അജിത്ത്‌ മറുപടി നല്‍കിയെങ്കിലും ചീഫ്‌ സെക്രട്ടറി പ്രതികരിക്കാത്തതിനാല്‍ കേസില്‍ തീര്‍പ്പുകല്‍പ്പിക്കാന്‍ കഴിഞ്ഞിട്ടില്ല.
കല്ലിടീല്‍ അടിയന്തരമായി പൂര്‍ത്തീകരിക്കാന്‍ സര്‍ക്കാര്‍ തിടുക്കം കാട്ടുന്നതിനു പിന്നിലെ രഹസ്യം ഇതാണ്‌. കെ റെയിലെന്നു രേഖപ്പെടുത്തിയ കല്ലുകള്‍ സ്‌ഥാപിക്കുന്നതു കഴിഞ്ഞ 23-ന്‌ ഇടക്കാല ഉത്തരവിലൂടെ ഹൈക്കോടതി തടഞ്ഞിരുന്നു.
സജിത്ത്‌ പരമേശ്വരന്‍
Comments