മലയാളത്തിന്റെ പ്രിയനടിയാണ് സുരഭി ലക്ഷ്മി. തന്റെ വിശേഷങ്ങളും ചിത്രങ്ങളുമൊക്കെ താരം സോഷ്യൽ മീഡിയയിൽ പങ്കുവെയ്ക്കുക പതിവാണ്.
ഇപ്പോഴിതാ, തന്റെ കുട്ടിക്കാലത്തെ ഒരു നൃത്ത വീഡിയോ ഫെയ്സ്ബുക്കിൽ പോസ്റ്റ് ചെയ്തിരിക്കുകയാണ് സുരഭി.
‘അയൽപക്കത്തെ കല്യാണത്തലേന്ന് എന്റെ വക ഒരു നൃത്തം..... നൊസ്റ്റാൾജിയോ നൊസ്റ്റാൾജിയ......
Thank you santhoshetta ( മങ്ങാട്ടച്ചാ ) 1997 april 6’.– എന്ന കുറിപ്പോടെയാണ് വീഡിയോ പോസ്റ്റ് ചെയ്തിരിക്കുന്നത്.
അയൽപ്പക്കത്തെ വിവാഹവീട് ആയിരുന്നു വേദി. 1996ൽ പുറത്തിറങ്ങിയ ‘ഹിറ്റ്ലർ’ എന്ന മമ്മൂട്ടി ചിത്രത്തിലെ ‘കിതച്ചെത്തും കാറ്റേ’ എന്ന പാട്ടിനൊപ്പമാണ് സുരഭിയുടെ ഡാൻസ്. എസ്.പി.വെങ്കടേഷ് ഈണമൊരുക്കിയ ഗാനം കെ.എസ്. ചിത്രയും എം.ജി.ശ്രീകുമാറും ചേർന്നാണ് ആലപിച്ചത്. ഗിരീഷ് പുത്തഞ്ചേരിയുടേതാണു വരികൾ.
മൂന്ന് മിനിറ്റോളം ദൈർഘ്യമുള്ള വീഡിയോയിൽ ‘കുഞ്ഞു സുരഭി’ ആവേശത്തോടെ ചുവടുവയ്ക്കുന്നതും ചുറ്റുമുള്ളവർ ആസ്വദിക്കുന്നതും കാണാം.
