കുട്ടികളില് ബാല്യത്തില് നിന്ന് യൗവനത്തിലേക്കുള്ള പരിവര്ത്തന സമയമാണ് കൗമാരകാലഘട്ടം. പെണ്കുട്ടികളിലും ആണ്കുട്ടികളിലും ശാരീരികമായും മാനസികമായും നിരവധി മാറ്റങ്ങളാണ് ഈ സമയത്ത് ഉണ്ടാകുന്നത്. ഒരു കുട്ടിയുടെ ജീവിതത്തില് ഏറ്റവും വെല്ലുവിളി നിറഞ്ഞ സമയം കൂടിയാണ് കൗമാരക്കാലം. സാധാരണ ഒമ്പത് മുതല് 14വയസിനിടയിലാണ് പെണ്കുട്ടികളുടെ ശാരീരിക മാനസിക മാറ്റങ്ങളില് പ്രധാനപ്പെട്ട കാര്യമായ ആര്ത്തവം ഉണ്ടാകുന്നത്.
സ്തനങ്ങളുടെ വളര്ച്ച, ആര്ത്തവം, ശരീരഭാരം, ഉയരം കൂടുക തുടങ്ങിയ പ്രധാന മാറ്റങ്ങളാണ് ഈ പ്രായത്തില് അവര്ക്കുണ്ടാകുന്നത്. പല രക്ഷിതാക്കളെയും അലട്ടുന്ന മറ്റൊരു പ്രധാന പ്രശ്നമാണ് പെണ്കുട്ടികളില് നേരത്തെ അല്ലെങ്കില് വൈകി ഉണ്ടാകുന്ന ആര്ത്തവം. കുട്ടിയുടെ അമിത ശരീരഭാരമാണ് നേരത്തെയുണ്ടാകുന്ന ആര്ത്തവത്തിന് കാരണമെന്ന് പല മിഥ്യകളും ഉണ്ട്. എന്നാല് ചില കുട്ടികളില് ഇത് സ്വാഭാവികമാണെന്നാണ് ഡോക്ടര്മാര് പറയുന്നത്. അതിനാല് മാതാപിതാക്കള് കുട്ടിയുടെ ആരോഗ്യം സംബന്ധിച്ച കാര്യങ്ങളില് വേണ്ട ശ്രദ്ധ കൊടുക്കുക. ശരിയായ ആരോഗ്യമുള്ള കുട്ടികളില് മറ്റ് പ്രവര്ത്തനങ്ങളും സ്വാഭാവികമായി നടക്കുന്നു.
പത്ത് മുതല് 13വയസിലാണ് ആണ്കുട്ടികളില് വളര്ച്ച ആരംഭിക്കുന്നത്. ഈ സമയത്ത് കുട്ടികളുടെ ശരീരഭാരം, ഉയരം എന്നിവ വര്ദ്ധിക്കുന്നു. അതോടൊപ്പം ജനനേന്ദ്രിയങ്ങളിലും മാറ്റങ്ങള് സംഭവിക്കാന് തുടങ്ങുന്നു. വിദഗ്ദ്ധര് പറയുന്നതനുസരിച്ച് പത്ത് മുതല് 15 വയസ് വരെ പ്രായമുള്ള കുട്ടികളുടെ മാതാപിതാക്കള് കുട്ടി കുറഞ്ഞത് എട്ട് മണിക്കൂര് ഉറങ്ങാന് ശ്രദ്ധിയ്ക്കണം. ദിവസവും ഒന്നോ രണ്ടോ മണിക്കൂര് വ്യായാമം ചെയ്യാനും കുട്ടിയെ പ്രോത്സാഹിപ്പിയ്ക്കണം. ജങ്ക് ഫുഡ് ഒഴിവാക്കുകയും കൊഴുപ്പ് കുറഞ്ഞ പാലുല്പ്പന്നങ്ങള് കഴിപ്പിയ്ക്കുന്നത് ശീലമാക്കുകയും ചെയ്യണം.
