ഹൃദയസംബന്ധമായ അസുഖത്തെ തുടര്ന്ന് ചികിത്സയില് കഴിയുന്ന നടന് ശ്രീനിവാസന്റെ തിരിച്ചുവരവിനായി ആശംസകള് നേര്ന്ന് തിരക്കഥാകൃത്തും സംവിധായകനുമായ രഘുനാഥ് പാലേരി. 'എന്റെ തട്ടാന് ഭാസ്കരന് ഇതും തട്ടും, ആരോഗ്യവാനായി അടുത്ത മാലപണിയും' എന്ന് ഫേസ്ബുക്കില് കുറിച്ചാണ് അദ്ദേഹം ശ്രീനിവാസനു സുഖം പ്രാപിക്കട്ടെയെന്ന് ആശംസിച്ചത്. ശ്രീനിവാസന് അഭിനയിച്ച പൊന്മുട്ടയിടുന്ന താറാവ് എന്ന ചിത്രത്തിന്റെ തിരക്കഥാകൃത്തായിരുന്നു രഘുനാഥ്. ശ്രീനിവാസന് സുഖം പ്രാപിച്ചുവരട്ടെയെന്ന് ആശംസിച്ചുകൊണ്ട് രഘുനാഥ് പാലേരിയുടെ ഫേസ്ബുക്ക് കുറിപ്പിന് നിരവധിപേര് കമ്മന്റിട്ടിട്ടുണ്ട്.
മാര്ച്ച് 30നാണ് നെഞ്ചുവേദനയേത്തുടര്ന്ന് ശ്രീനിവാസനെ ആശുപത്രിയിലെത്തിച്ചത്. ആന്ജിയോഗ്രാം പരിശോധനയില് നടന് ട്രിപ്പിള് വെസ്സല് ഡിസീസ് (ധമനികളിലെ രക്തമൊഴുക്കിന് തടസം നേരിടല്) കണ്ടെത്തി. ഇതേത്തുടര്ന്ന് മാര്ച്ച് 31 വ്യാഴാഴ്ച്ച ബൈപാസ് സര്ജറിക്ക് വിധേയനാക്കി. ശസ്ത്രക്രിയക്ക് ശേഷം മൂന്ന് ദിവസം വെന്റിലേറ്ററിലായിരുന്നു. വെന്റിലേറ്ററില് നിന്ന് മാറ്റിയതിന് പിന്നാലെ ശ്രീനിവാസന് അണുബാധയുണ്ടാകുകയും വീണ്ടും വെന്റിലേറ്ററില് പ്രവേശിപ്പിക്കുകയുമായിരുന്നു.ഉയര്ന്ന രക്തസമ്മര്ദ്ദത്തിനും പ്രമേഹത്തിനും ശ്രീനിവാസന് മുന്പ് പല തവണ ചികിത്സ തേടിയിട്ടുണ്ട്. 66കാരനായ നടന് ഹൃദ്രോഗമുള്ളതായും മുന്പ് ഡോക്ടര്മാര് സ്ഥിരീകരിച്ചിരുന്നു.
ശ്രീനിവാസന്റെ ആരോഗ്യനില തൃപ്തികരമെന്നറിയിച്ച് മെഡിക്കല് ബുള്ളറ്റിന് പുറത്തുവന്നിരുന്നു. അങ്കമാലിയിലെ സ്വകാര്യ ആശുപത്രിയില് ചികിത്സയിലുള്ള ശ്രീനിവാസന് മരുന്നുകളോട് മികച്ച രീതിയില് പ്രതികരിക്കുന്നതായി ഡോക്ടര്മാര് അറിയിച്ചു.
