തന്റെ പിതൃത്വം സംശയിച്ച് ചാള്സ് രാജാവ് ആക്ഷേപിക്കുമായിരുന്നെന്ന് ബ്രിട്ടീഷ് രാജകുടുംബത്തിലെ ഹാരി രാജകുമാരന്റെ വെളിപ്പെടുത്തല്. ഞാന് തന്നെയാണോ നിന്റെ യഥാര്ത്ഥ പിതാവ് എന്ന ചാള്സ് രാജാവിന്റെ അധിക്ഷേപങ്ങള് കേള്ക്കേണ്ടി വന്നിട്ടുണ്ടെന്ന് പറയുന്നു.
നാളെ പുറത്തിറങ്ങാനിരിക്കുന്ന 'സ്പെയറി' ലെ പരാമര്ശങ്ങള് പുറത്തു വിട്ടിരിക്കുന്നത് ഇംഗ്ളീഷ് മാധ്യമങ്ങളാണ്. മരണപ്പെട്ട ഡയാനാ രാജകുമാരിയുടെ പുറത്തു വന്നിട്ടുള്ള അവിഹിത കഥകളിലെ കാമുകനും കൊട്ടാരത്തിലെ അംഗരക്ഷകനുമായ മേജര് ജെയിംസാണോ എന്ന രീതിയില് ആയിരുന്നു പിതാവിന്റെ ആക്ഷേപ ശരങ്ങള്. ഡയാനയുടെ കാമുകന്മാരില് ആരോ ഒരാളാണ് തന്റെ പിതാവെന്ന് ചാള്സ് തമാശ പറയുമായിരുന്നു.
പിതാവിന്റെ രണ്ടാം വിവാഹത്തോട് യോജിപ്പില്ലായിരുന്നു. കാമിലാ പാര്ക്കര് ദുഷ്ടയായ ഒരു രണ്ടാനമ്മയായി മാറുമോ എന്നായിരുന്നു ആശങ്ക. എന്നാല് പിതാവിന്റെ സന്തോഷം കണക്കിലെടുത്താണ് ചാള്സിന്റെ രണ്ടാം വിവാഹത്തിന് സമ്മതം മൂളിയത്. താന് മേഗനെ വിവാഹം കഴിക്കുന്നതില് വില്യമിന് എതിര്പ്പുണ്ടായിരുന്നു. വിവാഹവേദി സംബന്ധിച്ച കാര്യത്തിലും തര്ക്കമുണ്ടായിരുന്നുവെന്ന് ആത്മകഥയില് പറയുന്നുണ്ട്.
സൈനിക സേവനത്തിന്റെ ഭാഗമായി അഫ്ഗാനില് പോയപ്പോള് 25 താലിബാന് തീവ്രവാദികളെ കൊലപ്പെടുത്തിയിട്ടുണ്ടെന്നും അക്കാര്യത്തില് സംതൃപ്തിയോ ലജ്ജയോ തോന്നുന്നില്ലെന്നും ഹാരി പറയുന്നു. പത്തുവര്ഷം അഫ്ഗാനിലുണ്ടായിരുന്നു. 1997 ല് ഡയാന രാജകുമാരി കാറപകടത്തില് മരിക്കുമ്പോള് 12 വയസായിരുന്നു ഹാരിക്ക് പ്രായം. അമ്മയുടെ സംസ്കാര ചടങ്ങില് പൊട്ടിക്കരയാന് ആഗ്രഹം ഉണ്ടായിരുന്നിട്ടും അടക്കിപ്പിടിച്ചതായും പറയുന്നു. ജനുവരി 10 ന് നാലു ഭാഷകളിലായിട്ടാണ് പുസ്തകം പുറത്തിറങ്ങുന്നത്.
