തിരുവനന്തപുരം : പുതിയവര്ഷം വിനോദ സഞ്ചാരത്തിനായി തെരഞ്ഞെടുക്കാന് പറ്റിയ ഇടങ്ങളുടെ പട്ടികയില് കേരളത്തെയും തെരഞ്ഞെടുത്ത് ന്യൂയോര്ക്ക് ടൈംസ്. 2023 ല് നിര്ബന്ധമായി കണ്ടിരിക്കേണ്ട ലോകത്തെ 52 ടൂറിസം കേന്ദ്രങ്ങളില് ഒന്നായിട്ടാണ് കേരളവും ഉള്പ്പെട്ടിരിക്കുന്നത്.
മനോഹരമായ കടല്ത്തീരങ്ങളും, കായലുകളും രുചികരമായ ഭക്ഷണങ്ങളാലും സാംസ്കാരിക തനിമയാലും പ്രശസ്തമാണ് കേരളമെന്നും ന്യൂയോര്ക്ക് ടൈംസ് വ്യക്തമാക്കുന്നു. ക്ഷേത്രങ്ങളും വൈക്കത്തഷ്ടമി ഉത്സവത്തെ കുറിച്ചും കുമരകത്തെക്കുറിച്ചും റിപ്പോര്ട്ടില് പരാമര്ശിച്ചിട്ടുണ്ട്. വൈക്കത്തഷ്ടമി ഉത്സവവും, കുമരകം, മറവന്തുരുത്ത് എന്നീ സ്ഥലങ്ങളും സഞ്ചാരികള്ക്ക് ഏറെ പ്രിയപ്പെട്ട ഇടങ്ങളാണെന്നും റിപ്പോര്ട്ടില് പറയുന്നു.
ലണ്ടന്, ജപ്പാനിലെ മോറിയോക്ക, സ്കോട്ട്ലന്ഡിലെ കില്മാര്ട്ടിന് ഗ്ലെന്, ന്യൂസിലന്ഡിലെ ഓക്ലന്ഡ്, കാലിഫോര്ണിയയിലെ പാം സ്പ്രിങ്സ്, ഓസ്ട്രേലിയയിലെ കംഗാരു ഐലന്ഡ്, നോര്വേയിലെ ട്രോംസോ എന്നിവയെല്ലാമാണ് പട്ടികയിലുള്ള മറ്റ് ഇടങ്ങള്. ഇന്ത്യയില് നിന്നും പട്ടികയില് ഉള്പ്പെട്ട ഏക സംസ്ഥാനവും കേരളമാണ്.
