നെയ്യാറ്റിന്കര : നടി ആക്രമിക്കപ്പെട്ട കേസിലെ പ്രധാന സാക്ഷിയും സംവിധായകനുമായ ബാലചന്ദ്രകുമാറിനെതിരെ സര്ക്കാര് ഉദ്യോഗസ്ഥരുടെ കൈയേറ്റം ഉണ്ടായി മാസങ്ങള് കഴിഞ്ഞിട്ടും പരാതിയില് നടപടി ഉണ്ടാകുന്നിലെന്ന് ആക്ഷേപം. 2022 സെപ്റ്റംബര് 18-ന് നെയ്യാറ്റിന്കര നഗരസഭാ സൂപ്രണ്ടും ഡ്രൈവറും ചേര്ന്ന് തന്നെ അവണാകുഴിയിലെ തട്ടുകടയില് ഭക്ഷണം കഴിക്കാന് എത്തിയപ്പോള് ചീത്ത വിളിക്കുകയും കൈയേറ്റം ചെയ്തുവെന്നുമാണ് പരാതി. പരാതി നല്കിയിട്ട് അഞ്ചു മാസമാകാറായിട്ടും ഒരു നടപടിയും ഉണ്ടാകുന്നില്ലെന്നും ബാലചന്ദ്രകുമാര് മംഗളത്തോട് വ്യക്തമാക്കി .സര്ക്കാര് വാഹനത്തില് എത്തിയ നഗരസഭാ കാര്യാലയത്തിലെ സൂപ്രണ്ട് 'നീ നമ്മുടെ ദിലീപേട്ടന് പണികൊടുക്കും അല്ലേടാ' എന്ന് ആക്രോശിച്ച് കൊണ്ട് ഷര്ട്ടിന്റെ കോളറില് കുത്തിപ്പിടിച്ച് അസഭ്യം പറയുകയായിരുന്നുവെന്നും അവര് മദ്യപിച്ചിരുന്നുവെന്നും ബാലചന്ദ്രകുമാര് പറയുന്നു.
നടി ആക്രമിക്കപെട്ട കേസിലെ പ്രധാന സാക്ഷിയാണ് ബാലചന്ദ്രകുമാര് . ദിലീപിനെതിരെ ആരോപണങ്ങളുമായി മാധ്യമങ്ങളില് ഇടംപിടിച്ചിരുന്നു. നഗരസഭാ ഉദ്യോഗസ്ഥരുടെ ഭാഗത്ത് നിന്ന് തനിക്കെതിരെ ഉണ്ടായ ആക്രമണത്തില് നഗരസഭാ സെക്രട്ടറിക്കും നെയ്യാറ്റിന്കര ഡിവൈഎസ്പിക്കും സെപ്റ്റംബര് 22 ന് പരാതി നല്കിയിരുന്നു. എന്നാല് പരാതിയെ പറ്റി അറിവില്ലെന്നായിരുന്നു നഗരസഭാ ഉദ്യോഗസ്ഥരുടെ ആദ്യ പ്രതികരണം . 23 ന് വീണ്ടും ബാലചന്ദ്രകുമാര് നഗരസഭാ സെക്രട്ടറിക്ക് പരാതി നല്കി. പോലീസില് നല്കിയ പരാതിയെ തുടര്ന്ന് ഇരുകൂട്ടരേയും സേ്റ്റഷനിലേയ്ക്ക് വിളിപ്പിച്ചു. അവിടെ വച്ച് തന്നെ ഉപദ്രവിക്കരുതെന്ന് സൂപ്രണ്ട് ബാലചന്ദ്രകുമാറിനോട് ആവശ്യപെട്ടു. എന്നാല് ഡിവൈഎസ്പി സ്ഥലം മാറിയതിനെ തുടര്ന്ന് കേസില് പിന്നീട് പുരോഗതി ഉണ്ടായില്ല.
പരാതി നല്കിയിട്ടും ആരുടെ ഭാഗത്ത് നിന്നും നടപടി ഉണ്ടാകാതെ വന്നതോടെ ഒക്ടോബര് ഒന്നിന് ബാലചന്ദ്രകുമാര് നഗരസഭയില് നേരിട്ടെത്തി സെക്രട്ടറിയെ കണ്ടു . അപ്പോഴായിരുന്നു സെപ്റ്റംബറില് നല്കിയ പരാതി പ്രിന്റ്ഔട്ട് എടുത്തതും പരാതി കൈപറ്റിയതിന്റെ റസീപ്റ്റ് നല്കിയതും. നടപടി ആവിശ്യപെട്ടപ്പോള് നഗരസഭാ ചെയര്മാനുമാത്രമേ വിഷയത്തില് നടപടിയെടുക്കാനാകുവെന്നും അദ്ദേഹത്തിന് പരാതി ഫോര്വേഡ് ചെയ്തെന്നും സെക്രട്ടറി വ്യക്തമാക്കി. എന്നാല് നഗരസഭാ ചെയര്മാന് ഇരുവരെയും സംരക്ഷിക്കാന് ശ്രമിക്കുന്നതായാണ് ബാലചന്ദ്രകുമാര് ആരോപിക്കുന്നത്. വീണ്ടും സെക്രട്ടറിയുമായി ബന്ധപെട്ടങ്കിലും പഴയതുപോലെ ചെയര്മാന്റ തലയില് വച്ച് ഒഴിയുകയായിരുന്നുവെന്നും ബാലചന്ദ്രകുമാര് പറഞ്ഞു .
സര്ക്കാര് ഉദ്ദ്യോഗസ്ഥരുടെ ഭാഗത്ത് നിന്നും തനിക്ക് ആക്രമണം നേരിടേണ്ടി വന്നിട്ടും നടപടിയെടുക്കുന്നതിന് പകരം ഉദ്യോഗസ്ഥരും ജനപ്രതിനിധികളും ചേര്ന്ന് അവരെ സംരക്ഷിക്കുകയാണെന്ന് അദ്ദേഹം കുറ്റപ്പെടുത്തി. തനിക്ക് നീതി നിഷേധിക്കപ്പെടുകയാണെന്നും, വിഷയത്തില് നീതി വൈകിപ്പിക്കുന്ന ഉദ്ദ്യോഗസ്ഥര്ക്കെതിതെ നടപടിവേണമെന്നും ആവശ്യപ്പെട്ട് തദ്ദേശ സ്വയംഭരണ വകുപ്പ് മന്ത്രിക്കും പരാതി നല്കി കാത്തിരിക്കുകയാണ് ഇപ്പോള് ബാലചന്ദ്രകുമാര് .
