പത്തനംതിട്ട: താലൂക്ക് ഓഫീസില് നിന്ന് ജീവനക്കാര് കൂട്ട അവധിയെടുത്ത സംഭവം കളക്ടര് അന്വേഷിക്കും. അവധി അപേക്ഷ പോലും നല്കാതെ 22 ജീവനക്കാര് അനധികൃതമായി അവധിയെടുക്കുകയായിരുന്നെന്ന് കണ്ടെത്തിയ സാഹചര്യത്തിലും എംഎല്എ കേസില് ഇടപെട്ട സാഹചര്യത്തിലുമാണ് അന്വേഷണം. യാത്രയ്ക്ക് പുറത്ത് നിന്നുള്ള ഏതെങ്കിലും സ്പോണ്സര്ഷിപ്പ് ഉണ്ടായിരുന്നോ എന്നും അന്വേഷിക്കും.
കോന്നി താലൂക്ക് ഓഫീസില് നിന്ന് ജീവനക്കാര് കൂട്ട അവധിയെടുത്ത് വിനോദയാത്ര പോയ സംഭവം വാര്ത്തയായതിന് പിന്നാലെ കോന്നി എംഎല്എ ജനീഷ്കുമാര് ഓഫീസില് എത്തി റജിസ്റ്റര് പരിശോധിക്കുകയും തഹസീല്ദാരെ ഫോണില് വിളിച്ച് വിവരം തിരക്കുകയും ചെയ്തിരുന്നു. രണ്ടാംശനി, ഞായര് എന്നിവ തുടര്ച്ചയായി വരുന്നത് കൊണ്ട് വെള്ളിയാഴ്ച കൂടി ഉപയോഗപ്പെടുത്തിയാണ് മൂന്ന് ദിവസത്തെ ഉല്ലാസയാത്ര നടത്തിയത്. യാത്രാചെലവിനായി ഓരോരുത്തരും 3000 രൂപയാണ് മുടക്കിയത്.
ദേവികുളവും മൂന്നാറും ഉള്പ്പെടുന്ന പ്രദേശങ്ങളിലേക്ക് യാത്ര സംഘടിപ്പിച്ചത് ഓഫീസ് സ്റ്റാഫ് കൗണ്സിലാണ് എന്നാണ് റിപ്പോര്ട്ടുകള്. തഹസില്ദാര് എല് കുഞ്ഞച്ചന്റെയും ഡെപ്യൂട്ടി തഹസില്ദാര്മാരുടേയും നേതൃത്വത്തില് ജീവനക്കാര് യാത്രപോയപ്പോള് 63 ജീവനക്കാരുള്ള ഓഫീസില് ജോലിക്കെത്തിയത് 21 പേരായിരുന്നു. സീറ്റില് ഇല്ലായിരുന്ന 42 പേരില് അവധി അപേക്ഷ നല്കിയത് 20 പേര് മാത്രമായിരുന്നു. ഇതോടെ രേഖകള് പ്രകാരം 22 ജീവനക്കാര് അവധിയെടുക്കാന് അപേക്ഷ നല്കിയിരുന്നില്ല എന്ന് വ്യക്തമകുന്നു.
അനേകം ക്വാറികളും നിര്മ്മാണജോലികളും ഖനനജോലികളും നടക്കുന്ന പത്തനംതിട്ടയില് ജീവനക്കാരുടെ യാത്രക്ക് സ്പോണ്സര് ഉണ്ടോ എന്നതും കളക്ടറുടെ അന്വേഷണ പരിധിയിലാണ്. നേരത്തേ നിശ്ചയിച്ച റവന്യൂ ഉദ്യോഗസ്ഥരുടെ യോഗത്തില് പങ്കെടുക്കാന് കഴിയില്ലെന്ന് തഹസില്ദാര് അറിയിച്ചിരുന്നു. പ്രായമായവരും ദൂരെ നിന്നും എത്തിയവരും ഓഫീസില് എത്തിയപ്പോള് ജീവനക്കാര് കൂട്ടത്തോടെ സീറ്റില് ഇല്ലാത്തത് വാര്ത്തയായതോടെയാണ് കോന്നി എംഎല്എ കെയു ജനീഷ് കുമാര് താലൂക്ക് ഓഫീസിലെത്തിയത്.
