ബംഗളൂരു: ഹിന്ദുത്വത്തെക്കുറിച്ചുള്ള ട്വീറ്റ് വിവാദമായതിനെത്തുടര്ന്ന് കന്നഡ നടന് ചേതന് അഹിംസ അറസ്റ്റില്. ഹിന്ദുത്വം നുണകളാല് കെട്ടിപ്പടുത്തതാണ് എന്ന ട്വീറ്റിലെ പരാമര്ശം മതവികാരം വ്രണപ്പെടുത്തുന്നതാണെന്ന പരാതിയിലാണു നടപടി.
ബംഗളൂരു ശേഷാദ്രിപുരം പോലീസ് കസ്റ്റഡിയിലെടുത്ത നടനെ പിന്നീട് ജില്ലാ കോടതിയില് ഹാജരാക്കി. മതവിശ്വാസത്തെ അവഹേളിച്ച് സമൂഹത്തില് ശത്രുത വളര്ത്തുന്ന പ്രസ്താവനകള് നടത്തിയെന്നതാണ് ചേതനെതിരേ ചുമത്തിയിരിക്കുന്ന കുറ്റം.
ദളിത്, ആദിവാസി വിഭാഗങ്ങള്ക്കുവേണ്ടി പ്രവര്ത്തിക്കുന്ന ആക്ടിവിസ്റ്റ് കൂടിയാണ് ചേതന് അഹിംസ എന്നറിയപ്പെടുന്ന ചേതന് കുമാര്. ട്വിറ്ററില് തിങ്കളാഴ്ച അദ്ദേഹം പങ്കുവച്ച അഭിപ്രായമാണു വിവാദമായത്. നുണകളില് കെട്ടിപ്പടുത്തതാണു ഹിന്ദുത്വം.
സത്യത്തിനു മാത്രമേ അതിനെ തോല്പ്പിക്കാന് കഴിയൂ എന്നായിരുന്നു ട്വീറ്റ്. ഇതു െവെറലായതിനു പിന്നാലെ ഹിന്ദു അനുകൂല സംഘടനകള് പ്രതിഷേധവുമായി രംഗത്തെത്തി. തുടര്ന്ന് നടനെതിരെ പരാതി നല്കുകയും കേസ് രജിസ്റ്റര് ചെയ്യുകയുമായിരുന്നു.
സമൂഹമാധ്യമങ്ങളിലെ അഭിപ്രായപ്രകടനങ്ങളുടെ പേരില് ചേതനെതിരേ മുമ്പും നിയമനടപടികള് ഉണ്ടായിട്ടുണ്ട്. കര്ണാടക െഹെക്കോടതി ജസ്റ്റിസ് കൃഷ്ണ ദീക്ഷിതിനെതിരേ ആക്ഷേപകരമായി ട്വീറ്റ് ചെയ്തതിന് 2022 ഫെബ്രുവരിയില് അദ്ദേഹത്തെ അറസ്റ്റ് ചെയ്തിരുന്നു.
