ന്യൂഡല്ഹി: ഹോട്ടലില് 54 കാരനെ മരിച്ച നിലയില് കണ്ടെത്തി. ഗാസിയാബാദ് ഇന്ദിരാപുരം നിവാസിയായ ദീപക് സേഥിയാണ് മരണപ്പെട്ടത്. ഡല്ഹി സഫ്ദര്ജങ് എന്ക്ലേവിലെ ഹോട്ടല് മുറിയില് ദുരൂഹ സാഹചര്യത്തില് മരിച്ച നിലയിലാണ് ഇയാളെ കണ്ടെത്തിയത്. സംഭവത്തില് പോലീസ് കൊലക്കുറ്റം ചുമത്തി അന്വേഷണം ആരംഭിച്ചു.
മാര്ച്ച് 30-ാം തീയതി വ്യാഴാഴ്ച രാത്രിയാണ് ദീപക് സേഥി ഹോട്ടലില് മുറിയെടുത്തതെന്ന് പോലീസ് പറഞ്ഞു. രാത്രി 8.50-ഓടെ ഒരു സ്ത്രീക്കൊപ്പമാണ് ഇയാള് ഹോട്ടലിലെത്തിയത്. ഈ സ്ത്രീ അര്ധരാത്രി 12.30-ഓടെ ഹോട്ടല്മുറിയില്നിന്ന് പുറത്തേക്ക് പോയി. തുടര്ന്ന് പിറ്റേദിവസംമുറിയില്നിന്ന് പ്രതികരണമൊന്നും ഇല്ലാതായതോടെ ജീവനക്കാര് മുറിതുറന്ന് പരിശോധിച്ചപ്പോളാണ് 54-കാരനെ മരിച്ചനിലയില് കണ്ടത്.
വായില്നിന്ന് നുരയും പതയും വന്നനിലയിലായിരുന്നു മൃതദേഹം. ദുരൂഹസാഹചര്യത്തിലുള്ള മരണമായതിനാല് വിശദമായ അന്വേഷണം തുടരുകയാണെന്നും പോലീസ് പറഞ്ഞു.സംഭവം പുറത്തുവന്നതോടെ ദീപക്കും സ്ത്രീയും വ്യഴാഴ്ച ഹോട്ടലിലെത്തിയതിന്റെ സിസിടിവി ദൃശ്യങ്ങളും സമൂഹ മാധ്യമങ്ങളില് പ്രചരിച്ചു കഴിഞ്ഞു.
